TAGBILARAN CITY, Bohol, July 19 (PIA)–Wala sa teritoryo sa Pilipinas ang 30 ka Chinese fishing vessel bisan naa kini sulod sa Spratly Group of Islands.
Kini ang gitin-aw sa Armed Forces of the Philippines Western Command (AFP WesCom) nga may sakop sa mga islang gi-okupahan sa Pilipinas sa Spratlys.
Matud pa ni WesCom Commander Lt. Gen. Juancho Sabban, 100 milya gikan sa Pag-Asa Island ang Kagitingan Reef ug dugay na kining gi-okupar sa China.
Kun sukdon, mokabat sa kapin 300 nautical miles ang gilay-on sa Kagitingan Reef sa Puerto Princesa, Palawan nga lapas na sa 200 nautical mile exclusive economic zone (EEZ) sa nasud.
Kalabot usab sa misadsad nga Navy vessel sa China sa Hasa-Hasa Shoal nga nasulod sa EEZ sa nasud, giingong posibleng miagi lang kini ug wala man nag-angkla ug gipugngan ang mga mangingisdang Pilipino sa maong lugar. (PIA-Bohol/ecb)
DOH: 2 ka batang nagpositibo sa Enterovirus, maayo na ang kahimtang
TAGBILARAN CITY, Bohol, July 19 (PIA)–Maayo na ang kahimtang sa duha ka batang Pinoy nga nagpositibo sa Enterovirus.
Matud pa ni Department of Health (DOH) Assistant Secretary Eric Tayag, gitino na lang nila kun nakagawas na sa tambalanan ang duha ka bata.
Padayon usab nga nagdumili si Tayag nga ibutyag kun asa nga tambalanan na-confine ang mga bata hangtud wala pa napagawas sa Research Institute for Tropical Medicine (RITM) ang resulta sa laboratory tests niini.
Giingong gipaabot nga karon o ugma mogawas ang resulta sa pagsusi sa RITM kun unsang strain sa Enterovirus ang mi-igo sa mga bata, kun susama ba sa EV-71 nga nakaingon sa kamatayon sa daghang mga bata sa Cambodia.
Apan bisan pa niini, nagtuo si Tayag nga mild form lang sa Enterovirus ang mi-igo sa duha ka bata.
Gitataw usab sa DOH nga walay rason aron maalarma ang publiko taliwala sa taho tungod kay aduna gayud hand, food and mouth disease (HFMD) sa Pilipinas nga mild form lamang ug dili makamatay.
“The reason we reported this case is we wanted hospitals to report any suspected cases of HFMD and this is of course to also alert the public that the HFMD doesn’t have to come from other countries because we have them except that we don’t have fatal form of the disease,” matud pa ni Tayag. (PIA-Bohol/ecb)
