TAGBILARAN CITY, Bohol, Aug. 13 (PIA)–Sa pagkakaron, duha pa lamang ang deklaradong public holiday karong buwan. Kini ang Agosto 21 ug 27.
Pagtin-aw kini ni deputy presidential spokesperson Abigail Valte sa nagkadaghang pangutana kun deklarado ba usab nga holiday ang Agosto 20 nga maoy adlaw sa pagtapos sa Ramadan o gitawag nga Eid’l Fitr.
Matud pa ni Valte, wala pay opisyal nga proklamasyon alang sa maong selebrasyon nga isaulog sa tanang Muslim sa tibuok kalibotan.
“No declaration yet,” ang mubong tubag ni Valte.
Ang Agosto 21 ang paghandom sa death anniversary ni kanhi Sen. Benigno Aquino Jr., amahan ni PNoy, samtang ang Agosto 27 ang pagsaulog sa National Heroes’ Day.
Base kini sa Proclamation No. 295 nga gilagdaan ni PNoy niadto pang Nobyembre 24, 2011. (PIA-Bohol/ecb)
Mga nabahang may utang sa NHMFC, dili una singlon
TAGBILARAN CITY, Bohol, Aug. 13 (PIA)–Dili una singlon sa National Home Mortage Finance Corporation (NHMFC) ang mga adunay utang nila nga naapektuhan sa mga pagbaha tungod sa Habagat.
Matud pa ni Vice President Jejomar Binay nga maoy chairman sa board of directors sa NHMFC, mahimong dili una mobayad ang mga may housing loan sa ahenya sa mosunod nga unom ka buwan kun naapektuhan sila sa baha.
Ang unom ka buwang moratorium magsugod sa MiyerkUles, Agosto 15 ug mahuman sa Pebrero 15 sa sunod tuig isip tabang na usab sa ahensya sa mga gibahang may housing loan.
Sulod sa maong panahon, dili usab ipatuman ang interest ug multa.
Mahimong mo-apply sa unom ka buwang moratorium ang mga naapektuhan sa baha nga may kasamtangang housing loan sa NHMFC hangtud sa Septyembre 1 ug kinahanglan lang dalhon ang barangay certification nga apil sila sa mga naapektuhan sa baha.
Samtang ang mga adunay housing loan sa maong ahenya nga dili na gustong balikon pa ang mga gibahang balay ilabi na kadtong naguba tungod sa baha, mahimong boluntaryong itugyan ang ilang balay pinaagi sa gitawag nga “dacion en pago” nga apil sa settlement of loan obligation nga i-base sa terms and condition ubos sa balaod. (PIA-Bohol/ecb)