TAGBILARAN CITY, Bohol, June 15 (PIA)–Giseguro mismo ni Presidente Benigno “Noynoy” Aquino III ngadto sa mga mag-uuma nga ipanghatag na ang tanang yuta nga napasulod sa Comprehensive Agrarian Reform Program (CARP) sa Hunyo 2014.
Gihimo kini sa Presidente dungan sa pakig-atubang niini sa Task Force Mapalad sulod sa Malacañang kagahapon.
Apil sa mga nitambong ang mga tinugyanan sa simbahan nga silang Bishop Ledesma, Bishop Cortez ug Fr. Anton Pascual sa Caritas Manila, mga mag-uuma gikan sa Negros ug mga tinugyanan sa gobyerno nga sila si Presidential Spokesman Edwin Lacierda ug Budget Sec. Florencio “Butch” Abad.
Matud pa ni Lacierda nga tanang mga yuta nga adunay gidak-on nga 25 ektarya mahatagan na og notice of coverage hangtud sa Disyembre 2012 samtang hangtud Hulyo 2013 usab ang 10 ektarya paubos.
Dugang pa ni Lacierda, nauyonan usab ang pagpatukod og multi-stakeholders mechanism nga magmonitor sa implementasyon sa mga nasabotan.
Mi-commit usab si Presidente Aquino nga magpagawas og P1 bilyon alang sa socialized credit program sa mga apektadong mag-uuma.
Gimando usab sa Presidente ang imbestigasyon sa reklamo sa mga mag-uuma nga giingong pipila sa ilang mga kauban ang gipatay taliwala sa ilang hunger strike. (PIA-Bohol/ecb)
Palasyo – walay ‘revamp’
TAGBILARAN CITY, Bohol, June 15 (PIA)–Gihimakak sa Malacañang nga adunay mahitabong ‘revamp’ sa Gabinete ni Presidente Benigno “Noynoy” Aquino III.
Matud pa ni Presidential Spokesman Edwin Lacierda sa media briefing kagahapon, walay kamatuoran nga niluwat na sa pangatungdanan si DAR Sec. Virgilio delos Reyes ug ang nabalitang paghawa ni Energy Sec. Rene Almendras aron mahimong bag-ong mangulo sa Presidential Management Staff (PMS) isip hulip ni Sec. Julia Abad.
Miingon si Lacierda nga walay nabag-o sa miyembro sa Gabinete ni Presidente Aquino ug kun aduna man gani mahitabong ‘revamp’ ay mismong ang Presidente ang mo-anunsiyo niini. (PIA-Bohol/ecb)
Balay ni CPG, usa na ka heritage ug tour destination
TAGBILARAN CITY, Bohol, June 15 (PIA)–Gisubhan sa kagamhanang probinsyal sa Bohol ubos sa pagpanguna ni Gob. Edgar Chatto ang pagpanindot sa balay ni kanhi Presidente Carlos P. Garcia isip usa na sa mga dapit nga duawon sa mga turista ug mga kabataan nga buot masayod sa kinabuhi sa Bol-anon nga kanhi pangulo sa atong nasud.
Atol sa maong kalihokan nga mao usab ang ika-41 ka tuig nga anibersaryo sa kamatayon ni CPG, mipadayag sa ilang kalipay ug pasalamat sa mga Bol-anon sa pagpanguna ni Gov. Chatto ang duha sa mga apo ni CPG nga sila si Jose Carlos ug Carla Garcia Campos.
Gidayeg sa mga apo ni CPG ang gihimo sa kagamhanang probinsyal sa Bohol nga magpabiling buhi sa panumdoman sa mga Bol-anon ilabi na sa mga kabataan ang kasaysayan sa kinabuhi sa kanhi pangulo sa atong nasud.
Tungod niini, gitunol na kagahapon sa mga apo ni CPG kang Gob. Chatto ang deed of donation sa 393 sq. m. nga maong kabtangan nga naa nahimutang sa dalan F. Rocha ug Hontanosas ning dakbyayan sa Tagbilaran.
Gikalipay usab ni Gob. Chatto nga nahatagan na og katumanan ang dugay na niyang gi-damgo nga magpabilin sa panumdoman sa mga Bol-anon ang kasaysayan sa kinabuhi ni Garcia.
Gipanghatag usab kagahapon ang mga certificates alang sa dugang 50 pa ka mga CPG scholars gikan sa mga nagkalain-laing dapit dinhi sa lalawigan sa Bohol.
Sa kinatibuk-an, aduna nay 172 CPG scholars gikan first year hangtud fourth year sa kolehiyo ang nakabenepisyo niining scholarship nga nagsugod niadtong tuig 1996. (PIA-Bohol/ecb)