TAGBILARAN CITY, Bohol, Feb. 11 (PIA)–SUGOD unyang alas-12 sa tungang-gabii, hingpit nang tutokan sa Commission on Elections (Comelec) ang tanang istasyon sa radyo ug telebisyon aron ma-monitor ang gitakdang air time limits sa mga kandidato sa piniliay sa Mayo 2013.
Matud pa ni Comelec Chairman Sixto Brillantes, Jr., agig pagsunod kini sa gipatuman nga regulasyon sa mga political ads sa mga kandidato sa broadcast.
Pasabot ni Brillantes, hangtud wala pa’y tubag ang Korte Suprema sa gipangayong TRO sa KBP ug pipila ka media network, padayon ang ilang monitoring.
Kahinumdoman nga midulog sa Korte Suprema ang Kapisanan ng mga Brodkaster sa Pilipinas (KBP) ug duha ka istasyon sa TV aron ibasura ang gitakdang limitasyon sa Comelec sa mga political ads o mas gi-ila isip aggregated airtime limit nga 120 minutes sa TV ug 180 minutes sa tanang istasyon sa radyo.
Sa ilang petisyon, gi-kuwestiyon sa maong mga network ang Comelec ruling tungod sa gi-ingong nakalapas kini sa balaod ilabi na nga mahikawan ang mga kandidato nga maabot ang mga katawhan sa lagyong lugar.
Depensa usab ni Brillantes, ang gipatuman nilang patakaran agig pagsunod lamang sa Fair Election Act. Apan giingong kun ibasura sa Korte Suprema ang maong regulasyon, andam silang sundon kini.
Samtang gi-aghat usab sa Comelec ang publiko nga magbinantayon ug kuhaan og hulagway ang mga magbutang og campaign poster ug uban pang election paraphernalia nga molapas sa gitakda sa komisyon kalabot sa pagpangampanya.
Giingon siguradohon lamang nga may petsa kini kun kanus-a gikuhaan aron mapasakaan og tukmang kaso ang kandidatong nagpaluyo niini. (PIA-Bohol/ecb/i-gg)
