TAGBILARAN CITY, Bohol, Feb. 13 (PIA)–MAGPADAYON ang implementasyon sa airtime limit rule human wala ni-isyu og temporary restraining order ang Korte Suprema batok niini.
Gimanduan sa SC—sa ilang en banc session—ang Commission on Elections (Comelec) nga tubagon sulod sa 10 ka adlaw ang mga alegasyong nakalatid sa manag-lahing petisyo nga giduso sa GMA Network Corp. ug ABC Broadcasting Corp. (TV5).
Sa usa ka pahayag, miingon si Comelec Chairman Sixto Brillantes Jr. nga ilang gi-konsiderar nga “good news” ang maong lakang sa SC ug ila nang gi-andam ang gipangayong komento sa korte kalabot sa gidusong petisyon sa GMA7 ug TV5 aron babagan ang implementasyon sa aggregated airtime limit nga 120 minutes sa TV ug 180 minutes sa tanang estasyon sa radyo.
Sa habig sa Kapisanan ng mga Brodkasters ng Pilipinas (KBP), gitumbok nila ang hugot nga patakaran sa airtime sa mga political ads nga nangahulugan usab sa posibilidad nga dili na maabot sa impormasyon kalabot sa mga kandidato ang mga katawhang tua sa lagyong lugar.
Apan gitumbok ni Brillantesa nga ang ilang gipatuman agig pagsunod lamang sa nakalatid ubos sa Fair Election Act.
Tungod niini, si Brillantes nagkanayon nga hingpit na nilang ipatuman ang balaod ug pag-monitor sa campaign hours sa mga kandidato tungod kay wala may TRO nga gipagawas ang korte. (PIA-Bohol/ecb/i-gg)
Comelec, nipasidaan sa mga lokal nga kandidatong nakigdungan
sa kampanya sa mga senatorial ug party-list bets
TAGBILARAN CITY, Bohol, Feb. 13 (PIA)–NIHULGA og diskwalipikasyon ang Commission on Elections (Comelec) sa mga lokal nga pulitikong nakigdungan sa pagpangampanya karon sa mga senatorial ug party-list group candidates.
Gahapon, nagsugod ang 90 ka adlaw nga kampanya sa national candidates, apan nabantayang pipila ka local politicians ang nakikaway usab sa publiko.
Matud pa sa komisyon, sa Marso 29 pa magsugod ang opisyal nga campaign period alang sa mga modagan sa regional, provincial, city ug municipal positions.
Parehong mahuman ang kampanya sa Mayo 11, duha ka adlaw sa dili pa ang adlaw sa piniliay.
Giingong mag-atubang og election offense o diskwalipikasyon ang mapamatud-ang sayo nangampanya.
Samtang gikalipay usab sa Comelec ang daghang sumbong nga gipaabot sa publiko pinaagi sa ilang social media. (PIA-Bohol/ecb/i-gg)
