TAGBILARAN CITY, Bohol, Jan. 17 (PIA)–NAGPAGAWAS na og bag-ong tamdanan ang Commission on Elections (Comelec) kalabot sa gipaabot nga grabeng pagpangampanya sa mga mokandidato sa umaabot nga eleksyon.
Matud pa ni Comelec Chairman Sixto Brillantes, 120 minuto na lamang ang mahimong i-ere sa telebisyon ug 180 minuto sa radyo ang mga campaign ad sa matag kandidato alang sa mga national positions.
Gi-klaro ni Brillantes nga dili na “per station” ang pag-ihap sa airtime alang sa mga campaign ad ug ang maong gitas-on sa panahon alang sa campaign ads nga napatik sa bag-ong tamdanan sa Fair Elections Act o Republic Act 9006 “aggregate” o usahon na sa pag-ihap.
Samtang 60 minuto lamang sa telebisyon ug 90 minuto lamang sa radyo alang sa mga campaign ads ang tugtan sa Comelec alang sa mga kandidato sa mga lokal nga posisyon.
Si Brillantes nagkanayon nga maapil na sa giingong mga gitugtang gitas-on sa panahon sa campaign ads ang mga TV ug radio guesting sa mga politiko.
Matud pa ni Brillantes nga kinahanglang mohatag ang mga istasyon sa telebisyon og report sa Comelec kalabot sa broadcast advertisement contract niini sa mga politiko.
Katambayayong sa Comelec ang citizen’s arm nga Parish Pastoral Council for Responsible Voting (PPCRV) ug National Citizens’ Movement for Free Elections (NAMFREL) sa pag-monitor sa mga pagpangampanya sa telebisyon ug radyo.
Giingong hingpit ang himuon nilang monitoring sa mga campaign ads ug mahimong epektibo lamang ang bag-ong tamdanan sa pagsugod sa campaign period.
Sa unang higayon, bantayan na usab sa Comelec ang pagpangampanya sa Internet, partikular sa social networking sites nga Facebook ug Twitter. (PIA-Bohol/ecb/i-gg)
