TAGBILARAN CITY, Bohol, April 01 (PIA)–Gipahayag sa Department of Foreign Affairs (DFA) nga gisaka na ang alert level 1 sa South Korea human sa pagdeklarar og state of war sa North Korea.
Matud pa ni DFA Spokesperson Raul Hernandez, padayon silang nakig-alayon sa Embahada sa Pilipinas sa Seoul, United Nations ug Estados Unidos aron susihon ang sitwasyon didto.
Gipaseguro nila ang kaluwasan sa mga Pinoy didto nga gibanabanang naa sa 40,000.
Gi-alerto ug gitambagan na usab sa DFA ang mga Pinoy didto nga magbinantayon ug padayon nga i-monitor ang tensyon tali sa South Korea ug North Korea.
Giseguro ni Hernandez nga andam na ang contigency plan alang sa mga Pinoy sa South Korea.
Giingong apil na niini ang pagbakwit sa mga Pinoy didto nga kadaghanan mga propesyunal ug household workers.
Wala usab nila gisalikway ang pasidaan nga nuclear war sa North Korea nga apil usab sa ilang gipangandaman.
Nagdeklarar og “state of war” ang Nokor sa kaaway nga Sokor niadtong Sabado human ang nahi-unang pasidaan sa North Korean leader nga si Kim Jong-Un nga ilang bombahan ug i-wipeout ang lima ka lugar sa South Korea nga duol sa border sa Nokor. (PIA-Bohol/ecb/i-gg)
PH, nakab-ot na ang investment grade gikan sa Fitch Ratings
TAGBILARAN CITY, Bohol, April 01 (PIA)–Sa labing unang higayon, nakab-ot sa Pilipinas ang gitinguha nga investment grade gikan sa Fitch Ratings – usa ka ahensyang motumbok sa mga nasud o institusyon nga mahimong mamohunan.
Ang mas taas nga rating nga gihatag sa Fitch nga “BBB-“ gikan sa “BB+” giinong mahimong mo-resulta sa pamuhunan og mas daghang investor sa nasud tungod kay giseguro niining maong ratings nga “stable” o maayo na ang pagdumala sa ekonomiya niini.
“This rating is unprecedented in the Philippines and can trigger the kind of investment that will help carry the country into its next phase of development,” matud pa ni Norio Usui, Country Economist sa Asian Development Bank.
“The Philippines’ sovereign external balance sheet is considered strong,” matud pa usab sa Fitch sa usa ka pahayag.
Giingong nakatabang sa ekonomiya sa nasud ang nagkadaghang remittances sa mga overseas Filipinos nga nakatabang usab sa paglambo sa ekonomiya taliwala sa nahitabong global financial crisis niadtong 2007, pasabot pa sa ahensya. (PIA-Bohol/ecb/i-ed)