TAGBILARAN CITY, Bohol, Sept. 20 (PIA)–Tungod kay usa na ka balaod human gilagdaan ni Presidente Benigno ‘Noynoy’ Aquino III ang Anti-Bullying Act, giseguro sa Department of Education (DepEd) nga hugot kini nilang ipatuman.
Dungan niini, gidayeg sa DepEd si Presidente Aquino sa paglagda sa Republic Act 10627 o ang “Anti-Bullying Act of 2013” tungod kay daku kining tabang sa kasamtangang polisiya sa DepEd nga proteksyon sa mga tinun-an.
“The Anti-Bullying Law is a big boost in our continuing push to develop our schools into a safe and caring learner-centered institution,” pahayag pa ni DepEd Secretary Armin Luistro.
Pagasugdan na sa DepEd ang paghimo sa implementing rules and regulations (IRR) niini pinaagi sa pakigkonsulta sa mga ginikanan, magtutudlo ug uban pang sektor.
Ubos sa maong balaod, tanang mga tunghaan sa elementary ug high school gimanduan sa paghimo og polisiya aron masumpo ang bullying diin tanang mga ginikanan, mga magtutudlo ug guardians hatagan og kopya sa maong IRR.
Apan gipahinumdoman usab sa DepEd ang mga magtutudlo nga sakop usab sila sa anti-bullying policy diin ubos sa DepEd Order Number 40, series of 2012, ang mga magtutudlo nga pakaulawan ang mga tinun-an mahimong mag-atubang og administrative sanctions. (PIA-Bohol/ecb)
14th month pay sa gov’t, private employees giduso
TAGBILARAN CITY, Bohol, Sept. 20 (PIA)–Usa ka balaodnon ang giduso gahapon sa Senado nga nagtinguhang hatagan og 14th-month pay ang tanang mga empleyado sa nasud.
Ubos sa Senate Bill 1645, na giduso ni Senator Vicente Sotto III, makadawat ang mga “rank-and-file” nga mga empleyado og dugang nga midyear pay matag tuig.
Matud pa sa maong balaodnon, dili angay mo-ubos sa katunga sa sweldo sa empleyado ang 14th-month pay.
Matud pa ni Sotto, kinahanglan ang 14th-month pay tungod kay dili na igo ang sweldo sa mga kawani sa nagkasaka nga presyo sa mga panaliton. Giingong ang kasamtangang 13th-month pay mahurot lamang sa galastohan matag Pasko.
Apan nakalatid sa maong balaodnon ang silot sa mga employer kun dili niini mapatuman ang 14th-month pay. Tungod niini, gitahasan ang Department of Labor and Employment (DOLE) nga mohimo og sumbanan alang sa maong balaodnon.
Giingong mo-agi pa sa pagdungog sa komite kining balaodnon sa dili pa ipasaka sa plenaryo sa Senado aron pagabotaran kun mopasar kini. (PIA-Bohol/ecb)