TAGBILARAN CITY, Bohol, April 18 (PIA)–Gimanduan sa Malakanyang ang mga buhatan sa gobyerno nga sundon gayud ang Anti-Red Tape Act of 2007 diin nahisulod ang hapsay ug sistematikong serbisyo sa publiko.
Base sa gipahigayong survey sa Civil Service Commission (CSC), naa sa 150 ka buhatan sa gobyerno ang hagbong o wala misunod sa balaod.
Matud pa ni Deputy Presidential Spokesperson Abigail Valte, angay susihon sa mga hingtungdang buhatan ang CSC survey aron tarungon ang ilang serbisyo ug walay malangan nga transaksyon sa frontline desks.
Si Valte nagkanayon nga gawas sa “no lunch break policy” kinahanglang tarungon pa ang trabaho sa mga buhatan sa gobyernon.
“Kailangan sundin…Hindi tingnan nila ‘yong mga rekomendasyon ng CSC at tingnan nila kung ano pa ‘yong puwede nilang i-enhance further,” matud pa ni Valte.
Base sa survey, wala nakontento ang mga gipangutana kalabot sa serbisyo sa 150 ka buhatan sa gobyerno ug giingong wala usab sila atimana og maayo.
Apil sa mga buhatan nga pakyas sa pagsunod sa sumbanan sa CSC ang GSIS, Customs, NBI ug uban pang regional offices sa mga buhatan sa gobyerno. (PIA-Bohol/ecb/p-gg)
2 bag-ong Comelec Commissioners, gihinganlan na sa Malakanyang
TAGBILARAN CITY, Bohol, April 18 (PIA)–Opisyal nang gihinganlan sa Malakanyang ang duha ka bag-ong komisyoner sa Commission on Elections (Comelec) nga gitudlo ni Presidente Benigno ‘Noynoy’ Aquino III.
Sa pahayag ni Presidential spokesperson Edwin Lacierda, gikumpirmar niini nga sila Luie Guia ug Al Parreño ang molingkod isip mga bag-ong komisyoner sa poll body.
Si Parreño usa ka miyembro sa Land Transportation Franchising and Regulatory Board (LTFRB) samtang gikan usab sa grupong Legal Network for Truthful Elections (Lente) ug kanhi International Election Consultant sa nasud sa Papua New Guinea ug Kenya si Guia.
Giingong gitudlo ni PNoy ang duha niadtong Abril 15 ug matapos ang ilang termino sa Pebrero 2, 2020.
Ang duha maoy mohulip sa gibiyaang puwesto sa niretirong sila kanhi Commissioners Rene Sarmiento ug Armando Velasco.
Giingong posibleng mo-report na ang duha ka bag-ong komisyoner sa Lunes. (PIA-Bohol/ecb/i-gg)