APEC 2015 chairmanship, gidawat na sa PHL
MANILA, Nov. 11(PIA)–Pormal nang gidawat kagahapon sa Pilipinas ang chairmanship ug pag-host sa Asia-Pacific Economic Cooperation (APEC) Summit sa 2015.
Si Tony Tan Caktiong sa Jollibee Foods Corporation ang midawat sa maong simbolo isip chairman sa APEC CEO.
Matud pa ni Caktiong sa iyang mensahe nga naghinam-hinam na ang Pilipinas nga dawaton ang mga delegado sa APEC sa sunod tuig ug ipasinati ang init nga pag-abiabi.
Dugang pa ni Caktiong, gidapit nila ang mga kaubang negosyante aron pahimoslan ang momentum sa Philippine economy ug mosalmot sa paglambo.
Dungan niini, gipagawas na usab sa APEC CEO Summit ang invitational video alang sa pag-host sa Pililinas sa APEC Summit sa 2015.
Dinhi gipakita ang mga ma-anindot nga mga lugar sa Pilipinas, mga malamboong industriya ug imprastraktura sa nasud, apil na ang mga maayong mamumuong Pilipino.
Kahinumdoman nga unang nag-host ang nasud sa APEC Summit niadtong administrasyong Ramos nga gipahigayon sa Subic. (ecb/PIA7-Bohol)
