MANILA, April 18 (PIA)–Pagabuksan og balik sa Department of Education (DepEd) pinaagi sa Private Education Assistance Committee (PEAC) ang aplikasyon alang sa Senior High School (SHS) Voucher Program ning semanaha.
Ang SHS Voucher Program gitagana alang sa mga nakatapos og Grade 10 nga gustong mopadayon sa SHS education sa mga private schools, private universities ug colleges, local o state universities ug colleges nga nagtanyag og SHS ug technical ug vocational institutions nga nagtanyag og SHS sugod School Year 2016-2017.
Maghatag kini sa mga estudyante og subsidiya nga maghatag kanila og katakos sa pagkuha og diskwento sa bayronon sa tuition ug uban pang school fees alang sa SHS.
Sa pagkakaron, labaw sa 50,000 non-ESC private school grade 10 completers ang nahatagan na sa vouchers. Ang tanang nakatapos sa Grade 10 sa mga pampublikong tunghaan ug nakatapos sa Grade 10 sa mga pribadong tunghaan nga Education Service Contracting (ESC) grantees awtomatikong kwalipikado isip voucher recipients. Kining mga estudyante dili na kinahanglang mo-apply pa alang sa vouchers.
Ang aplikasyon pagabuksan og balik aron mahatagan pa og kapilian ang ubang nakatapos og Grade 10 sa pag-enroll sa SHS sa private schools, private universities ug colleges, local o state universities ug colleges o technical vocational institutions sa Hunyo 2016.
Tanang aplikasyon estriktong pagahimuon online pinaagi sa pag-access sa PEAC’s Online Voucher Application Portal (OVAP) sa http://ovap.deped.gov.ph.
Ang mga aplikasyon pagadawaton gikan Abril 22 taman Mayo 6, 2016 lamang. Wala nay lugway ang maong deadline. Ang resulta ipahibalo sa Mayo 20, 2016 o mas sayo pa niini.
Kun adunay mga pangutana kalabot sa ESC ug SHS Voucher programs, mahimong ipaabot kini pinaagi sa gastpe@deped.gov.ph o sa DepEd Action Center sa telepono (02) 636-1663 ug (02) 633-1942. (ecb/PIA7-Bohol)
