NI-abut na si Presidente Benigno Aquino III gikan sa iyang byahe sa Estados Unidos niadtong Martes og niingon nga ang $2.4 bilyones nga bag-ong investments atol sa iyang byahe makamugna og 43,650 ka bag-ong trabaho sa mosunod nga tulo ka tuig.
Ang mga kompanya nga interesadong mobutang og puhonan sa atong nasud mao ang: Coca-Cola, Pfizer, AES Corp., Hewlett-Packard, J.P. Morgan Chase, Global Services Inc., Century Properties, ug General Electric.
Matud pa sa Presidente nga ang maong mga investments nag-apil sa power generation, consumer products, business ug knowledge process outsourcing, health care, garments, ug leather goods.
Dugang pa ni Aquino nga nakakuha sila og pasalig nga dili mo ubos sa 43,650 ka bag-ong trabaho sa mosunod nga tulo ka tuig, apil na sa 4,500 ka construction-related nga trabaho ang magpa-abut. Ug tungod sa multiplier effect, gi tantiya nga adunay 200,000 nga dugang trabaho ang ma benepisyo sa katawhan.
Sa kinatibuk-an, ang pagbisita sa Presidente sa Estados Unidos nakakuha og $2.4 bilyones nga bag-ong investments.
Gawas pa niini ang nadawat nga dugang hinabang nga $434 milyones gikan sa Millennium Challenge Corp. nga magpalapad sa existing social programs sa atong nasud. (PIA-Bohol)
