by admin | Jan 10, 2017 | Major Events
MANILA, January 10 (PIA)–Gipagawas na sa Department of Budget and Management (DBM) niadtong Enero 5 ang National Budget Circular No. 568 ug ang Local Budget Circular No. 113 nga gilagdaan ni Kalihim Benjamin Diokno.
Alang kini sa ikaduhang tranche sa dugang sweldo sa mga kawani sa gobyerno karong tuig.
Kini tungod kay ipadayon pa sa DBM ang pagpatuman sa Executive Order ni kanhi Presidente Benigno ‘Noynoy’ Aquino III niadtong mga katapusang bulan niya sa pangatungdanan kalabot sa pagpasaka sa sweldo sa mga kawani sa gobyerno.
Pinaagi niini, tugotan na ang mga ahensiya sa gobyerno nga i-adjust ang sweldo sa mga empleyado nga retroactively effective gikan pa Enero 1, base sa Executive No. 201 nga gipagawas niadtong 2016.
Nakalatid sa EO 201 nga isaka ang sweldo sa mga sibilyang empleyado sa gobyerno ug mahatagan usab og bag-o ug dugang allowance ang mga military ug uniformed personnel.
Mandato sa maong EO nga i-adjust ang mga sweldo sa mga kawani sa gobyerno sulod sa upat ka annual tranches hangtud 2019. (ecb/PIA7-Bohol)
by admin | Jan 10, 2017 | Malakanyang Updates, National News
MANILA, January 10 (PIA)–Gipangunahan ni Presidente Rodrigo Duterte kagahapon ang oathtaking sa mga bag-ong appointed government officials sa Malakanyang diin gi-awhag niya sila sa pag-alagad sa katawhan nga may integridad ug dedikasyon.
Gipahalipayan ni Duterte ang 200 ka mga bag-ong appointees sa nagkalain-laing pwesto sa gobyerno nga nanumpa sa pangatungdanan ilabi na kadtong nibalik sa pag-alagad sa gobyerno.
Gihagit niya ang mga bag-ong opisyal nga tarongon ang ilang trabaho tungod kay dili tanan ang mahatagan og kahigayonan sa pag-alagad sa gobyerno.
“Six years from now, I do not think that you’d be in a position to work some more. So this is the last call para may magawa tayo sa kababayan natin. Just give it to them,” matud pa sa Presidente sa iyang mensahe human sa oathtaking ceremony.
“It’s your last call to serve your nation and because I am pleading to you and I hope that we can work together, trust each other and I said give it to the people this time,” dugang pa niini.
Hugot ang gihimong pasidaan ni Duterte kanila sa paglikay gayud nga malambigit sa korapsiyon ug misaad usab nga iyang batokan ang red tape sa burukrasya.
Subling gitataw ni Duterte nga i-agi gayud sa saktong proseso ang mga transaksiyon sa gobyerno dungan sa pasidaan nga dili niya gusto mga adunay mag-lobby sa iyang buhatan nga pipila ka mga negosyanteng mohangyo og kontrata sa gobyerno.
Apil sa mga nanumpa sa Presidente sila Mocha Uson isip miyembro sa board sa Movie Television Review and Classification Board (MTRCB), ang aktor nga si Ceasr Montano isip Chief Operating Officer sa Tourism Promotions Board, Terry Ridon isip Chairperson sa Commission on Urban Poor ug kanhi General Reynaldo Berroya isip Light Rail Transit Administrator. (ecb/PIA7-Bohol)
by admin | Jan 10, 2017 | Headlines, Local News / Bohol Balita
TAGBILARAN CITY, January 10 (PIA)–Gipahibalo sa buhatan sa Land Transportation Office (LTO) Tagbilaran nga nang-release na sila karon sa mga driver’s license card nga na-backlog gikan Agosto 2015 taman Oktubre 2016.
Matud pa sa tigpamaba sa LTO-Tagbilaran nga si Florencio “Aloy” Balazuela, kinahanglan lamang moduso sa ilang photocopy sa opisyal nga resibo kun OR nga may nakasulat nga cellphone number sa luyo niini.
Apan alang sa mga lisensiyang gi-isyu o gi-renew gikan Nobyembre 2016 pataas, i-release kini sa LTO sa ikaduhang kwarter sa 2017.
Alang sa dugang kasayoran, mahimong motawag sa buhatan sa LTO-Tagbilaran sa telepono (038) 501 7781. (ecb/PIA7-Bohol)
by admin | Jan 10, 2017 | Civil Service, Headlines, National News
TAGBILARAN CITY, January 10 (PIA)–Gipahibalo sa Civil Service Commission (CSC) Bohol Field Office nga sa Enero 20 na ang gitakdang deadline sa aplikasyon alang sa unang Career Service Examination Professional ug Sub-Professional ning tuig dinhi sa dakbayan sa Tagbilaran.
Nagsugod na sa pagpangdawat og applications ang buhatan sa CSC ug ipahigayon ang maong pasulit karong Marso 12, 2017.
Ang Career Service Examination bukas sa tanang Filipino citizens nga 18 anyos sa adlaw sa pag-file sa iyang aplikasyon.
Kinahanglang personal nga moduso ang aplikante sa iyang application form ngadto sa buhatan sa CSC nga nahimutang sa Circumferential Road, Barangay. Dampas ning syudad.
Gawas sa application form, kinahanglan usab ang 4 ka Philippine passport size I.D. pictures nga adunay handwritten (dili computer-generated) nga name tag sa atubangan nga gilagdaan ibabaw sa pangalan, original ug photocopy sa valid ID ug adunay bayaran nga P500.00 isip exam fee.
Ang dawaton nilang valid ID mao lamang ang mosunod: Driver’s license, SSS ID, GSIS ID, Philhealth ID, kasamtangang company/office/school ID, Postal ID, BIR ID, Barangay ID, Voter’s ID, Valid passport o Police clearance.
Alang sa dugang kasayoran, mahimomg motawag sa buhatan sa CSC sa (038) 501-7046.
(ecb/PIA7-Bohol)
by admin | Jan 9, 2017 | Kontra Droga, Major Events, Malakanyang Updates
MANILA, January 9 (PIA)–Gihimakak sa Palasyo ang napatik nga artikulo sa “The Guardian” nga nag-ingon nga “out of control” na ang gilusad nga drug war sa administrasyong Duterte mao nga angay na kining mahunong.
Gitumbok ni Presidential Communications Operations Office (PCOO) Kalihim Martin Andanar nga “in full control” si Presidente Rodrigo Duterte sa gilusad nga kampanya batok sa ilegal nga droga.
Isip pagmatuod niini, giingong nahimong malamposon ang Pilipinas sa pagsumpo sa negosyo sa ilegal nga droga diin nikabat sa 1,017,869 ang gidaghanon sa mga drug personalities nga boluntaryong nitahan hangtud niadtong Enero 5 karong tuig base sa datos gikan sa Philippine ¬National Police (PNP).
Gipasabot usab ni Andanar nga ang resulta sa Disyembre 3-6 Social Weather Stations (SWS) survey diin nagpakita nga 9 sa 10 ka Pilipino nituo nga ang problema sa droga nikunhod sa ilang mga lugar sukad nilingkod sa pagka-Presidente si Duterte.
Sa maong survey, nigawas nga kadaghanan sa mga Pilipino nihatag og 77% nga excellent rating sa drug war ni Presidente Duterte.
“The Guardian’s call for economic sanctions by foreign countries on the Philippines is uncalled for. Threats of withdrawal of development aid and other forms of assistance are totally unfounded. The President remains undaunted as he will never compromise the dignity of the nation for foreign aid. There is an enormous drug problem in the Philippines and he is trying his best to keep the country from becoming a narco-state,” dugang pa sa Kalihim.
Naglaom si Andanar nga i-tratar sa ubang mga nasod ang Pilipinas isip usa ka “sovereign nation” nga adunay pagtahod. (ecb/PIA7-Bohol)
