by admin | Jan 5, 2017 | Headlines, National News
MANILA, January 5 (PIA)–Gi-awhag sa Malakanyang ang mga lokal nga kagamhanan ug mga ahensiya sa gobyerno nga suportahan ang Miss Universe beauty pageant nga ipahigayon dinhi sa nasod karong bulana.
Base sa Memorandum Circular number 13 nga gilagdaan ni Executive Secretary Salvador Medialdea, gi-awhag niini ang tanang mga lokal nga kagamhanan nga ihatag ang tibuok suporta ug kooperasyon alang sa Miss Universe pageant.
Gitumbok usab dinhi ang gahom sa Department of Tourism (DOT) aron ipatawag ang usa ka buhatan, kawanihan o ahensya sa gobyerno ug mga LGUs alang sa kinahanglanong tabang kun kinahanglanon kini.
Hugot usab ang direktiba sa mga local executive ug sa tanang ahenisya sa gobyerno sa dili paggamit sa pondo sa gobyerno alang sa Miss Universe pageant.
Gipaabot nga sa sunod semana na mangabot sa kaulohan ang mga kandidata sa nagkalain-laing nasod nga mosalmot sa maong beauty contest. (ecb/PIA7-Bohol)
by admin | Jan 5, 2017 | Headlines, National News
TAGBILARAN CITY, January 5 (PIA)–Ang Department of Social Welfare and Development (DSWD) bukas sa pagdawat og bisan unsang reklamo kalabot sa ilang disaster response services pinaagi sa Disaster Response Assistance and Management Bureau’s (DReAMB’s) e-Reklamo nga platform.
Ang e-Reklamo usa ka web-based complaints management ticket system nga gi-disenyo aron modawat og mga reklamo sa Disaster Risk Reduction and Management (DRRM) services sa departamento.
Kini ma-access pinaagi sa mga mosunod nga ICT channels: Una ang ereklamo.dswd.gov.ph website diin matag reklamo gi-assign sa usa ka unique ticket number nga magamit sa pagsubay sa progreso ug tubag online. Usa ka valid email address ang kinahanglanon aron makagamit niining sistema.
Ikaduha, ang SMS gamit ang mosunod nga syntax: Text DSWDereklamo “Pangalan sa Complainant”lokasyon”Complaint Message” ug ipadala sa 3456 (bisan unsang network). Ang matag text message nagkantidad og P1.00.
Ug ang ikatulo mao ang pag email ngadto sa ereklamo@dswd.gov.ph.
Ang departamento hingpit nga mag-monitor sa response efforts sa mga local government units aron ang relief assistance moabot gayud ngadto sa mga naapektuhan sa bagyong Nina, dili lamang pinaagi sa FFPs apan pinaagi usab sa ubang food ug non-food items (FNIs).
Ang mga issues pinaagi sa relief distribution, kinahanglan ang hingpit nga koordinasyon sa mga LGUs sa departamento pinaagi sa ilang nagkadaiyang Field Offices (FOs). (ecb/PIA7-Bohol)
by admin | Jan 4, 2017 | Major Events, Malakanyang Updates, National News
MANILA, January 4 (PIA)–Makuti pang gitun-an ni Presidente Rodrigo Duterte ang planong dugang nga P2,000 sa Social Security System (SSS) pension alang sa mga miyembro niini.
Kini ang tubag sa Palasyo sa nagkadaghang panawagan nga aprubahan na ni Duterte ang maong pension hike.
Matud pa ni Presidential Communications Office (PCO) Kalihim Martin Andanar, nangita pa ang presidente og usa ka “win-win solution” aron masulbad na kining diskusyon nga nasugdan gikan pa niadtong administrasyong Aquino.
Giingong gitakda na usab nga makigpulong si Duterte sa iyang mga economic managers nga gilangkoban nila Department of Finance (DOF) Kalihim Carlos Dominguez, National Economic and Development Authority (NEDA) Director General Ernesto Pernia ug Department of Budget and Management (DBM) Kalihim Benjamin Diokno, aron pangayuon ang ilang tambag kalabot sa dugang pension sa SSS.
Giseguro ni Andanar nga tinguha sa gobyerno nga balansehon ang interes sa mga pensioners ug ang kaayohan usab sa ahensiya.
Pasabot pa ni Andanar, dili usab gusto sa Palasyo nga gamiton ang kwarta sa mga nagbayad og buhis ilabi na sa mga dili miyembro sa SSS, aron lang mahatag ang pension increase.
Kahidumdoman nga nagduha-duha si Presidente Duterte nga aprubahan ang moang plano ilabi na nga miingon ang mga economic managers sa administrasyon nga posibleng mabangkaruta ang SSS kun himuon kini. (ecb/PIA7-Bohol)
by admin | Jan 4, 2017 | Headlines, National News
MANILA, January 4 (PIA)–Gipahibalo sa Philippine Coconut Authority (PCA) nga epektibo sugod niadtong Enero 3, 2017 ang moratorium sa pagputol sa punoan sa lubi sa nasod gawas lamang sa mga lalawigan sa Basilan ug syudad sa Isabela.
Matud pa ni PCA Administrator Billy Andal, ang national moratorium sa pagputol sa mga punoan sa lubi molanat og tulo ka bulan sugod niadtong Enero 3.
Giingong kinahanglang ipatuman ang moratorium tungod kay wala man gi-seryoso sa mga coco loggers ang nakalatid sa RA 8048.
Matud pa nga kun dili ipatuman ang moratorium, mabutang sa peligro ang industriya sa lubi sa nasod tungod kay mas daghang punoan sa lubi ang gipangputol kaysa gipangtanom.
Gawas kang Andal, ang moratorium sa pagputol sa punoan sa lubi gilagdaan usab nila Cabinet Secretay Leoncio Evasco Jr: ug mga miyembro sa PCA Governing Board nga sila si Alan Tanjuakio, Edicio dela Torre ug Ponciano Batugal.
Gipasabot ni Andal nga ipaubos usab sa makuting pagtuon ang Implementing Rules and Regulations sa RA 10510593 nga nag-amyenda sa RA 8048 nga tuyong tarongon ang pag-isyu sa permit ug clearance sa mga coco loggers.
Exempted sa maong moratorium ang probinsiya sa Basilan ug syudad sa Isabela tungod sa nasinati nilang problema didto sa cocolisap. (ecb/PIA7-Bohol)
by admin | Jan 4, 2017 | BFAR Advisory, Health and Medicine, Local News / Bohol Balita, National News
MANILA, January 4 (PIA)–Subling nagpagawas og shellfish ban sa 9 ka kabaybayonan ang Bureau of Fisheries and Aquatic Resources (BFAR) sa Visayas human mag-positibo sa red tide toxins ang mga gisusing sample nga mga shellfish.
Apil sa mga apektado sa red tide ang mga baybayon sa Biliran, Calubian, Leyte, Gigantes Islands sa Iloilo; Carigara Bay sa Leyte; Cambatutay Bay ug Daram Island sa Western Samar; ug Dauis ug Tagbilaran City sa Bohol.
Giseguro ni BFAR Director Eduardo Gongona nga padayon ang ilang monitoring sa mga apektadong lugar aron malikayang makapalit ug makakaon ang mga residente sa mga shellfish nga apektado sa red tide.
Subling nanawagan ang BFAR sa mga residente sa mga apektadong lugar nga likayan una ang pagpanguha, pagpamaligya, pagpamalit ug pagkaon sa tanang matang sa shellfish sama sa tahong, talaba ug tulya. (ecb/PIA7-Bohol)
