by admin | Dec 28, 2016 | Headlines, Malakanyang Updates
MANILA, December 28 (PIA)–Magdeklarar lamang og martial law si Presidente Rodrigo Duterte kun kinahanglanon na gayud kini ug aron maprotektahan ang kahilwasan sa katawhan.
Kini ang gitataw ni Presidential spokesperson Ernesto Abella dungan sa pag-ingon nga walay plano ang Presidente nga basta na lamang magdeklarar og martial law nga walay igong basehan.
Kahinumdoman nga ning bag-o lang sa iyang mensahe sa Pampanga, gusto niini nga ang Chief Executive na lamang ang may gahom nga magdeklarar og martial law ug dili na kini ipaagi pa sa pag-uyon sa Kongreso ug Korte Suprema.
Pagtumbok pa ni Abella, dili angay ‘literal’ nga dawaton ang gihimong pahayag sa Presidente.
Dugang pa ni Abella nga kun giingong sabton ang gihimong mensahe ni Presidente Duterte, tataw nga wala sa plano niining magpatuman og martial law sa umaabot. (ecb/PIA7-Bohol)
by admin | Dec 28, 2016 | DOLE Updates, Headlines, Local News / Bohol Balita
TAGBILARAN, December 28 (PIA)–Mahimo na karong tigoman sa mga Pinoy ang ilang retirement pinaagi sa pagpamuhunan sa Perso¬nal Equity Retirement Account (PERA), ang labing unang voluntary retirement account nga adunay tax incentives sa nasod.
Ang PERA gilusad ning bag-o lang sa Bangko Sentral ng Pilipinas (BSP), walo ka tuig human nahimong balaod ang Republic Act 9505 o ang PERA Act of 2008.
Base sa datos, daghang mga Pinoy ang dili tig-tigom o tig-invest mao nga kining balaod sa PERA ang maghatag og insentibo sa mga Pinoy sa pagpamuhunan alang sa ilang retirement.
Tinguha sa PERA nga palambuon ang savings mobilization ug capital market development aron makatabang na usab sa fiscal sustainability sa nasod.
Matud pa sa gipahigayong pagtuon sa BSP, nikabat lang sa 10.8% sa mga Pinoy ang nagtigom alang sa ilang pagretiro.
Bukas kini sa tanang nag-trabahong Pilipino — sa gobyerno, pribadong sektor, self-employed ug professio¬nals ug bisan ang mga overseas Filipino workers.
Ang bisan kinsang mag-invest og P100,000, kuwa¬lipikado sa P5,000 income tax credit nga i-deduct sa gibayarang income tax matag tuig. (ecb/PIA7-Bohol)
by admin | Dec 28, 2016 | DOH Updates, Headlines, National News
MANILA, December 28 (PIA)–Ilusad karong adlawa sa Department of Health (DOH) ang pagtumbok sa mga lokal nga kagamhanan nga makonsiderar nga pinakakuyaw sa pagsugat sa Bag-ong Tuig.
Matud pa sa tigpamaba sa DOH nga si Asec. Eric Tayag, ipagawas nila karon ang listahan sa mga lungsod o munisipyo nga nakatala og daghang biktima sa paboto.
Giingong gihimo ang pag-tally niini base sa gidaghanon sa mga nabiktima sa paboto sa usa ka lugar kun itandi sa natala sa susamang petsa sa niaging tuig.
Samtang subling nanawagan ang DOH sa mga lokal nga kagamhanan nga suportahan ang kampanya sa ahensya aron malikayan ang gidaghanon sa mga masamdan sa pagsugat sa Bag-ong Tuig.
Bisan tulo ka adlaw na lang ang nahabilin sa pagsugat sa tuig 2017, miingon si Tayag nga may mahimo pang paagi aron malikayan ang mga madisgrasya sa paboto. (ecb/PIA7-Bohol)
by admin | Dec 27, 2016 | Headlines, Local News / Bohol Balita
CORTES, Bohol, December 27, (PIA)—Gimandu na ni Gob Edgar Chatto ngadto sa Buhatan sa Provincial Engineer (PEO) ang pagsusi ug paghimo sa mga lakang aron pugngan na ang mga disgrasya nga nagpanghitabo sa eskina sa Tinago-San Isidro, Dauis.
Niadtong Disyembre 26 lamang, o upat ka adlaw human gireklamo ang disgrasyadong dalan, duha ka aksidente sa kadalanan ang nahitabo didto sa nahisgutang eskina.
Una na nga gireklamo sa mga motorista ug manakayay ang kakuwang sa mga traffic signs nga ibutang unta sa mga nasudnon ug provincial roads.
Didto sa Provincial Peace and Order Council (PPOC) Meeting Disyembre 22, giduso na usab ni Mayette Gasatan, sakop sa Bohol Chamber of Commerce and Industry, ug manager sa South Palm Resort ang kakuyaw sa nahisgutang mga dalan.
Daghan na ang nadisgrasya tungod sa dili makita ang kasugat ug walay igo nga mga pahimatngon sa dalan alang sa mga motoristang nagsubay sa Tinago-San Isidro Road, obserbasyon ni Gasatan, kansang kapikas nagtrabaho usab sa PEO.
Ang dalan usab nga gikan sa Mayacabac-Biking nga kasagaran tul-id, mohinay og liko subay sa San Isidro, diin dili makit-an ang kasugat.
Walay piho usab nga mga sinyales ug pahimangno bisan pa sa nasudnong dalan sa Biking-San-Isidro ug Dao nga maka-pahibaw sa mga motorista sa apike nga dalan. Matud ni Gasatan.
Gibutyag ni Gob Edgar Chatto nga kon ang dalan, sama sa Panglao Circumferential Road, sakop sa nasudnong kagamhanan, obligado ang Department of Public Works and Highways sa pagbutang sa mga karatola ug traffic signs.
Apan, ang dalan nga nagtadlas niini, ang Tinago-San Isidro lagbas sa Flushing Meadows sakop sa lalawigan sa Bohol ang kasagarang hinungdan sa disgrasya.
Tungod niini, giaghat ni Gob Chatto ang PEO sa paghimog inspeksyon niini aron sa labing dali nga panahon, kabutangan na sa tukmang road signs.
Nataho usab sa PPOC nga daghang kaso sa krimen ang nalista apan ang hinungdan, mao ang aksident nga may kalambigitabn sa trapiko. (rac/PIA-7/Bohol)
by admin | Dec 27, 2016 | Headlines, Local News / Bohol Balita, Price Updates
CORTES, Bohol, December 27 (PIA)—Buksan sa mga kalungsuran sa Bohol inabagan sa Department of Trade and Industry (DTI) ang duha ka sentro nga maghatag og tambag alang sa mga bag-ong negosyante, Disyembre 28 didto sa lungsod sa Carmen ug sa Tubigon.
Kini human gibuksan na usab ang Go Negosyo Centers sa Talibon, Disyembre 27.
Sa Disyembre 29, magbukas usab ang Jagna ug Loboc.
Ang Go Negosyo Centers nga magbukas sa lima ka mga kalungsuran napahaum gayud sa pagbukas usab sa bag-ong tuig kanus-a magsugod na usab ang bag-ong tuig sa pagrehistro sa mga negosyo sibo usab sa bag-ong tuig sa negosyo.
Agi og pagtubag sa Go Negosyo Act o ang Republic Act 10644, ang Go Negosyo Centers buksan sa katapusang nga mga adlaw sa 2016, nangandoy nga palig-onon ang micro, small ug medium enterprises (MSMEs).
Ang unang Go Negosyo Center sa Bohol gibuksan sa mismong buhatan sa Bohol DTI, gisundan usab sa Bohol Investment Promotion Center ug sa lungsod sa Loon.
Kini aron magtanyag og mga bag-ong kapanarbaho-an sa nasud.
Batakang palisiya sa Go Negosyo Act ang magpasugod sa nasudnong kaugmaran, pagduso sa mas lanat nga kaugmaran aron kunhoran ang kawad-on pinaagi sa pagtukod sa MSMEs nga magpasugod sa mga kapanarbaho-an, produkston ug patigayon sa nasud.
Gimandu na sa kagamhanan ang pagpabarug sa “Negosyo Centers” sa tanang lalawigan, syudad ug kalungsuran aron iduso ang kasayun sa pagpasugod og negosyo ug pagtabang pinaagi sa paghatag serbisyo alang sa mga duol nga buot magsugod sa pamuhunan.
Tumong sa Go Negosyo Centers and technology transfer, bansay alang sa production and ug pagdumala, ug sa paghatag tabang sa mga MSMEs alang sa pagbaligya sa ilang produkto.
Mapasayun usab sa Go Negosyo Centers and pagpuno sa Philippine Business Registry Databank ilawom sa Department of Trade and Industry (DTI) aron malista ang tanang negosyo sa nasud.
Matud ni DTI Regional Director Asteria Caberte, tumong nila nga buksan ang susamang mga centers sa tanang kalungsuran sa Bohol, sama nga aghaton usab nila ang labing dali nga pagpabarug niini aron mas makatabang sa mga gusto mamuhunan.
(rac/PIA-7/Bohol)
