by admin | Jan 19, 2016 | Headlines, Local News / Bohol Balita
BOHOL, Jan. 19 (PIA)–Aprubado na sa Senado ang balaodnong dugangan ang maternity leave sa mga babayeng kawani sa pribado ug pampublikong sektor ug himuong tulo ka buwan o 100 ka adlaw.
Sa kasamtangang balaod, mokabat lamang sa 60 ka adlaw ang maternity leave alang sa mga kawani sa gobyerno ug 60 taman 78 usab sa mga kawani sa pribadong sektor, depende sa ‘mode of delivery’ niini.
Matud pa ni Sen. Pia Cayetano, sponsor sa Senate Bill No. 2982, ang kasamtangang maternity leave mas ubos sa 98 ka adlaw nga minimum requirement sa International Labor Organization (ILO).
Giingong ang Pilipinas naulahi usab sa ubang nasud sa ASEAN region kalabot sa “maternity leave duration”.
Pasabot pa ni Cayetano, ubos sa SBN 2982 o Expanded Maternity Leave Law of 2015, tuyo niining mahatagan og igong panahon ang mga inahan nga mabalik ang ilang kusog ug mahimo ang ilang ‘maternal roles’ sa dili pa mobalik sa ilang trabaho. (ecb/PIA7-Bohol)
by admin | Jan 19, 2016 | Headlines, Local News / Bohol Balita
BOHOL, Jan. 19 (PIA)–Ang Civil Service Commission (CSC) mi-klaro sa polisiya sa mga lalaking kawani sa pribado ug pampublikong sektor nga nag-planong mo-file og paternity leave.
Sa usa ka resolusyon nga gi-proklamar niadtong Disyembre 21, 2015, ang CSC mi-preparar og mando ug patakaran sa implementasyon sa Republic Act 8185 o ang Paternity Leave Act of 1996.
Matud pa sa Section 20 sa RA 8185, ang paternity leave nga 7 ka adlaw kinahanglang non-cumulative ug non-convertible to cash.
Pareho kining magamit sulod sa 7 ka adlaw nga way bugto o putol-putol nga paagi sa adlaw mismo, sa dili pa, atol ug human sa pagpanganak o pagkakuha sa bata sa iyang lihitimong asawa.
Kining maong leave ma-avail sa dili pa matapos ang 60 ka adlaw human sa petsa sa pagpanganak o pagkakuha sa bata. (ecb/PIA7-Bohol)
by admin | Jan 18, 2016 | Major Events, National News
MANILA, Jan. 18 (PIA)–Gikumpirmar sa Malakanyang ang pagtudlo kang Atty. Isabel Dasalla-Agito isip ad interim Commissioner sa Commission on Audit (COA).
Matud pa ni Executive Secretary Paquito Ochoa Jr., si Agito ang gihulip sa gibiyaang posisyon ni Commissioner Heidi Mendoza nga natudlo isip pangulo sa Internal Overight Office sa United Nations sa New York nga may 5 ka tuig nga non-renewable term.
Sa wala pa nibiya si Mendoza, may tour of duty kini taman Pebrero 2, 2018 isip Commissioner sa COA.
Samtang si Agito nangalagad isip senior external auditor sa United Nation Board of Auditors diin gawas sa pagka-abogado, usa usab siya ka Certified Public Accountant (CPA).
Ang bag-ong natudlong COA Commissioner nangalagad usab isip resident auditor sa nagkalain-laing ahensiya sa gobyerno. (ecb/PIA7-Bohol)
by admin | Jan 14, 2016 | Major Events, National News
MANILA, Jan. 14 (PIA)–Ilusad sa Commission on Elections (Comelec) ang debate sa mga kandidato sa pagka-presidente alang sa piniliay sa Mayo 9, 2016 sa sunod buwan dungan sa gipahigayong paglagda sa Memorandum of Agreement niini.
Gipangunahan ni Comelec Chairman Andres Bautista ang MOA signing kagahapon sa Palacio del Gobernador didto sa kaulohan nga gitambungan sa mga tinugyanan sa TV network, print media ug Kapisanan ng mga Brodkaster ng Pilipinas (KBP).
Matud pa ni Bautista, tulo ka klase sa diskusyon ang gamiton sa organizers ug maglangkob kini og mga managlahing hisgotanan.
Unang ipahigayon ang debate sa Mindanao sa Pebrero 21, 2016 ug adunay dual moderator diin hisgotan ang posisyon sa mga kandidato kalabot sa grabeng traffic sa Manila, electoral ug political reforms, foreign policy, tax reform ug national defense.
Sa Marso 20, 2016 usab ang ikaduhang debate sa Visayas nga mo-sentro sa disaster preparedness ug climate change, kahimsog, edukasyon ug korupsyon sa gobyerno.
Ug sa Abril 24, 2016 ang ikatulo nga usa ka town hall debate.
Samtang ang vice presidential debate ipahigayon sa Metro Manila sa Abril 10, 2016.
Alang kang Bautista, maayong kahigayonan kini alang sa mga kandidato aron mapahatud nila ang ilang mga posisyon kabahin sa nagkalain-laing hisgotanan.
Tuyo usab sa Comelec nga mahatagan og patas nga oportunidad ang tanang mga kandidato agig pagsunod sa Fair Elections Act.
Gipasabot ni Bautista nga dili nila mapugos ang mga kandidato apan ang di nila pagtambong adunay klarong mensahe alang sa mga botante. (ecb/PIA7-Bohol)
by admin | Jan 14, 2016 | Major Events, National News
MANILA, Jan. 14 (PIA)–Gipahibalo sa pipila ka ahensiya sa gobyerno ang liboang trabaho nga buksan duha ka bulan sa dili pa magsugod ang election ban sa hiring o appointment sa employees.
Nipahibalo ang Department of Health (DoH) nga plano nilang mang-hire og 21,000 doctors ug uban pang health workers karong tuig.
Matud pa ni Mary Ruth Politico, planning ug standards division medical officer sa DoH nga nanginahanglan pa ang ilang ahensiya og mga doctor, nurses, dentists ug medical technologists nga e-deploy sa mga government-run health facilities sa tibuok nasud.
Gawas sa DoH, mang-hire usab og empleyado and Department of Education (DepEd), Department of Social Welfare and Development (DSWD), Department of Finance (DoF), Department of Transportation and Communication (DOTC) ug ang Public Private Partnership Center.
Ang DepEd giingong nanginahanglan og mga abogado samtang ang DoE nanginahanglan og administrative officers.
Ang ubang ahensiya usab nanginahanglan og mga engineers, planning officers, information system analysts, economists, financial analysts, information officers, accountants ug clerks.
Ning bag-o lang, ang DepEd, DSWD, DoF-BLGF, DOTC, ug PPPC nakig-kumbuya sa Kalibrr, usa ka job-matching online platform aron mapausbaw ang recruitment ug contracting services sa maong mga ahensiya.
Sa Kalibrr, makita ang mga espisipkong bakanteng posisyon nga gibuksan sa maong mga ahensiya sa gobyerno. (ecb/PIA7-Bohol)
