by aimee | Jan 17, 2014 | Headlines, Local News / Bohol Balita
MANILA, Jan. 17 (PIA)–Giseguro karon sa Malakanyang nga dili magamit ang mga substandard nga puthaw ug ubang materyales sa mga gitukod nga mga edipisyo nga naigo sa kalamidad.
Una nang nabulgar ang pagkuyanap sa mga substandard nga mga puthaw sa merkado ug isip pagmatuod niini ang pahayag mismo ning bag-o lang sa Philippine Iron and Steel Institute (PISI) nga maong daghang mga edipisyo ang nangahugno sa magnitude 7.2 nga linog sa Bohol ug sa bagyong Yolanda sa Eastern Visayas tungod sa mga puthaw nga gipanggamit didto.
Matud pa ni Presidential Communications Operations Office (PCOO) Sec. Sonny Coloma, dili kini tugotan sa Department of Public Works and Highways (DPWH) tungod kay hugot nga gipatuman sa gobyerno ang mga sumbanan aron lig-on ang mga edipisyo nga ipatukod sama nalang sa mga gitukod karon sa Bohol ug Eastern Visayas.
“Hugot nga gipatuman sa DPWH ang mga sumbanan aron mahimong ‘disaster resilient’ ang mga edipisyong itukod. Gipatuman kini sukad pa niadtong linog sa Bohol ug apil na ang mga lugar nga naigo sa bagyong Yolanda,” matud pa ni Coloma. (PIA7-Bohol/ECB)
by aimee | Jan 17, 2014 | Headlines, National News
MANILA, Jan. 17 (PIA)–Pangunahan ni Presidente Benigno ‘Noynoy’ Aquino III sa Enero 20, Lunes ang National Day of Prayer and Solidarity nga adunay temang ‘One Nation in Prayer’.
Usa ka yanong programa alang sa malampusong pagbangon sa nasud human naigo sa lain-laing kalamidad ang nasud gikan sa giyera sa Zamboanga, magnitude 7.2 nga linog sa Bohol ug ang labing kusog nga pagpanghasi sa bagyong Yolanda ang ipahigayon sa Malakanyang diin si Manila Archbishop Luis Antonio Cardinal Tagle ang officiating priest.
“Usa kini ka pag-ila sa katawhang Pilipinhon sa gahum sa Ginoo nga naggiya sa dungan natong panimpad paingon sa mas hayag nga kaugmaon, matud pa ni Presidential Communications Operations Office (PCOO) Sec. Herminio “Sonny” Coloma Jr.
Dugang pa ni Coloma, gipaabot nga makighiusa sa Presidente sa Lunes ang mga tinugyanan sa mga apektadong komunidad sa giyera sa Zamboanga, linog sa Bohol ug sa bagyong Yolanda, apil na usab sa mga tinugyanan sa nagkalain-laing relihiyon sama ni Cardinal Tagle, Imam Ebra Moxair sa Imam Council sa Pilipinas, Komisyoner Zenaida Pawid sa National Commission of Indigenous Peoples, Isaias Samson sa Iglesia ni Cristo ug mga representante sa Philippine Council of Evangelical Churches.
Miingon si Coloma nga apil usab sa gi-imbitar sa Malakanyang ang mga lider sa Kongreso, mga pangulo sa nagkalain-laing buhatan sa gobyerno ug mga tinugyanan sa civil society groups, apil na usab ang nagkalain-laing grupo sa pagtuo. (PIA7-Bohol/ECB)
by aimee | Jan 15, 2014 | Headlines, National News
TAGBILARAN CITY, Bohol, Jan. 15, 2014 (PIA)–Gipahibalo sa Civil Service Commission Bohol Field Office nga gitakda ang unang Career Service Examination ning tuig dinhi sa dakbayan sa Tagbilaran alang sa Professional ug Sub-Professional sa Abril 6, 2014.
Nagsugod na sa pagpangdawat og applications ang buhatan sa CSC ug ang deadline sa ilang pagpangdawat hangtud lamang sa Pebrero 20, 2014.
Makuha ang application form (CS Form No. 100, Revised 2012) sa buhatan sa CSC nga naa nahimutang sa Circumferential Road ning dakbayan sa Tagbilaran.
Apan mahimo ra usab nga ma download ang maong application form sa CSC website nga www.csc.gov.ph.
Gawas sa application form, kinahanglan usab ang 4 ka Philippine passport size I.D. pictures nga adunay handwritten (dili computer-generated) nga name tag sa atubangan nga gilagdaan ibabaw sa pangalan, original ug photocopy sa valid ID ug adunay bayaran nga P500.00 isip exam fee.
Ang dawaton nilang valid ID mao lamang ang mosunod: Driver’s license, SSS ID, GSIS ID, Philhealth ID, kasamtangang company/office/school ID, Postal ID, BIR ID, Barangay ID, Voter’s ID, Valid passport o Police clearance.
Alang sa dugang kasayuran, mahimomg tawagan ang buhatan sa CSC sa (038) 501-7046.
(PIA7-Bohol/ECB)
by aimee | Jan 15, 2014 | Headlines, National News
MANILA, Jan. 15, 2014 (PIA)–Gikunhoran na og 10 ka adlaw ang pagproseso sa identification cards sa mga miyembro sa Social Security System (SSS) ubos sa Unified Multi-Purpose Identification (UMID) System.
Tungod niini, gilauman nga mokabat sa kapin 3 milyones ka identification cards ang ma-proseso sa SSS.
Ang 10 ka adlaw nga proseso magsugod sa date of application hangtud sa adlaw nga ma-release sa Philippine Postal Corporation ang UMID card package.
Alang sa mga miyembro sa SSS nga ni-apply ug nagpaabot sa ilang UMID cards, mahimong susihon nila ang status niini sa SSS website nga www.sss.gov.ph. (PIA7-Bohol/ECB)
by aimee | Jan 15, 2014 | Headlines
MANILA, Jan. 15, 2014 (PIA)–Nipagawas og sumbanan ang Department of Education (DepEd) alang sa ilang ‘antimeasles campaign’ agig tubag sa nagkadaghang kaso sa nataptan sa makatakod nga sakit nga tipdas.
Sa usa ka DepEd memo, gimanduan ni Education Secretary Armin Luistro ang tanang school heads nga papaulion sa ilang panimalay ang mga estudyanteng nagpakita og “flu-like symptoms” o mga timailhan sa sakit nga tipdas.
Gimando usab sa kalihim ang pagpakatap sa kasayuran kabahin sa tipdas, pagpabakuna ug ang pakigtambayayong sa local government health units alang sa kompletong pagpabakuna sa mga bata.
“The regional directors and student division superintendents (SDS) shall mobilize all school officials to undertake supportive activities,” matud pa sa memo.
Gihangyo usab sa DepEd ngadto sa mga tunghaan sa pagtino pinaagi sa Preventive Alert System for Schools (Pass) ang mga kaso sa tipdas sa ilang mga tunghaan ug ipahibalo kini dayon sa ilang local health units.
The Pass usa ka sistematikong pagpaabot sa kasayuran kalabot sa kahimtang sa panglawas sa mga estudyante ug magtutudlo ngadto sa mga ahensya sa ilang lugar.
Ubos niining sistema, gi-require ang mga principal sa pagpahigayon ug daily health checks. (PIA7-Bohol/ECB)
