by aimee | Jan 8, 2014 | National News
MANILA, Jan. 08 (PIA)–Gitataw sa Malakanyang nga dili kinahanglang sundon ang international standards sa pagpatukod og “bunkhouses” o mga kasamtang balay alang sa mga residenteng naapektuhan sa super typhoon Yolanda.
Kini taliwala sa mga pagsaway nga nadawat sa gobyerno kalabot sa giingong substandard nga pagpatukod sa maong mga bunkhouses.
Sa usa ka press briefing karong adlawa, gipasabot ni Presidential Spokesperson Edwin Lacierda nga adunay gi-sunod nga kaugalinong sumbanan ang Pilipinas sa pagpatukod sa maong bunkhouses.
Matud pa ni Lacierda nga ang mahinongdanon, adunay kasamtangang mapuy-an ang mga naapektuhan sa bagyong Yolanda.
“Our concern right now is to house them. Number one, safety and number two, you don’t want to have congestion. It’s not substandard. Our standard is we follow the building code,” matud pa ni Lacierda. (PIA7-Bohol/ECB)
by aimee | Jan 8, 2014 | Headlines, National News
MANILA, Jan. 08 (PIA)–Gikatakdang sugdan na sa sunod semana ang gun amnesty alang sa mga gun owners nga walay tukmang dokumento base sa Republic Act 10195, ang Comprehensive Law on Firearms and Ammunition Control.
Matud pa ni Philippine National Police (PNP) Chief Police Director General Alan Purisima, gi-andam na ang draft sa PNP Command alang sa Memorandum circular kalabot sa pagpatuman sa gun amnesty.
Gibutyag ni Purisima nga molanat og 6 ka buwan ang maong gun amnesty mao nga giingong angay kining pahimoslan sa mga nanag-iya og armas nga may mga expired nga lisensiya ug ipa-rehistro ang ilang mga armas sa Firearms and Explosive Office (FEO).
Gitumbok usab ni Purisima nga kini na ang katapusang higayon ug dili na masundan pa nga magpatuman og gun amnesty ang gobyerno tungod kay kini lamang ang gitakda sa bag-ong balaod kalabot sa pagpanag-iya og mga armas.
Una nang gilagdaan ni Purisima ang implementing rules and regulations sa RA 10195 niadtong Nobyembre 24. (PIA7-Bohol/ECB)
by aimee | Jan 7, 2014 | National News
MANILA, Jan. 07 (PIA)–Natala ang labing taas nga pagsaka sa presyo sa mga nag-unang panaliton o inflation rate niadtong Disyembre 2013.
Base sa datos nga gipagawas sa National Statistics Office (NSO), nitala sa 4.1 % ang consumer price index sa niaging buwan.
Ang kadaut nga gibilin sa Super Typhoon Yolanda (Haiyan) ang gitumbok nga rason sa mga eksperto sa maong pagsaka sa inflation rate sa nasud.
Apan nahisulod gihapon kini sa forecast sa Bangko Sentral ng Pilipinas (BSP) nga 3.8% hangtud 4.7%.
Labing daku ang gisaka sa presyo sa pagkaon. Tungod niini, naa sa 3.0% ang average inflation sa nasud niadtong 2013.
Taliwala sa pagsaka, nakita sa mga eksperto nga mahimong lig-on pa gihapon ang key policy rate sa Pilipinas. (PIA7-Bohol/ECB)
by aimee | Jan 7, 2014 | Headlines, National News
MANILA, Jan. 07 (PIA)–Ipakita na sa publiko sa Bureau of Customs (BOC) ang detalye sa tanang importasyon o mga produktong moabot sa nasud matag buwan.
Kini ang gibutyag ni BOC Commissioner John “Sunny” Sevilla, diin matud pa nga parte kini sa transparency ug accountability sa ilang operasyon.
Giingong ipakita sa maong binuwang report ang produktong gi-angkat, gibug-aton ug gidaghanon niini, importer, nasud diin kini gikan, ang kantidad ug ang mga gibayarang Customs duties.
Gani matud pa ni Sevilla, gipagawas na nila ang detalye sa importasyon niadtong Disyembre sa ilang website nga www.customs.gov.ph.
Samtang gibutyag usab ni Sevilla nga buksan nila og balik ang imbestigasyon sa rice smuggling human migawas nga pipila ka Customs broker ang nalambigit niini.
Giingong may mga consignee na silang gisusi karon ug dinhi nila sugdan ang imbestigasyon.
Una nang gitahasan sa Department of Justice (DOJ) ang National Bureau of Investigation (NBI) nga buksan pagbalik ang imbestigasyon niini human kini ipahunong sa dihang napakyas ang ulahi nga matumbok ang pag-ila ug nahimotangan sa usa ka David Tan, kinsa gitumbok nga maoy nagpaluyo sa smuggling activity sa nasud. (PIA7-Bohol/ECB)
by aimee | Jan 7, 2014 | Headlines
MANILA, Jan. 07 (PIA)–Nipasidaan ang kalihim sa Presidential Communications Operations Office (PCOO) sa publiko kalabot sa mga migamit sa pangalan niya aron makapangayo og tabang alang sa mga giingong biktima sa labing kusog nga bagyong “Yolanda” (Haiyan).
Matud pa ni PCOO Sec. Herminio “Sonny” Coloma, Jr. nga nahibaw-an niya ang gihimong paggamit sa iyang pangalan human kini gipadangat kaniya sa Management Association of the Philippines (MAP).
“Adunay mga nangilad nga nagpakaaron-ingnon nga tinugyanan sa PCOO nga giingong nangayo og donasyon alang sa mga biktima sa Bagyong Yolanda,” matud pa ni Coloma.
Base sa mga impormasyong niabot kaniya, gisulayan sa mga mangingilad nga biktimahon ang MAP ug ang Financial Executives Institute of the Philippines.
Samtang sa laing bahin, miingon usab si Coloma nga gigamit usab niining mga “scammer” ang pangalan niya sa dihang gitawagan ang usa niya ka higala ug nitanyag nga ikuha niya og iskedyul ang iyang higala kang Presidente Benigno S. Aquino III.
“Akong hugot nga gihimakak nga dili ako—ug dili nako himuon—ang maong pagtawag sa bisan kinsa man, ug ilabi na nga wala ako’y gihatagan sa pagtugot nga mag-representar sa paghimo niini,” pahayag pa ni Coloma.
Giingong klaro kaayong hinimo kini sa mga mangingilad ug tungod niini, magpagawas og tukmang pahayag ang kalihim sa PCOO sa mass media ug sa website sa opisina aron mapasidan-an ang tanan.
Samtang gihangyo ni Coloma ang MAP ug kadtong mga makadawat sa maong tawag nga hinumdoman gayud ang caller information nga gigamit sa “scammer” aron matumbok kun kinsa kini sila ug asa kini sila makita aron manubag sa ilang gipanghimong pagpangilad. (PIA7-Bohol/ECB)
