by anyajulia | Jun 11, 2009 | Headlines, National News
MIPASALIG si Presidente Gloria Macapagal-Arroyo nga pasagdan niya ang mga kaanib sa Ubos Balay Balaoranan aron ipahunong ang pagtulak sa kausaban sa Batakang Balaod pinaagi sa Constitutional assembly.
Una na nga gidudahang ang pag-pausab sa balaod maoy pamaagi sa Presidente aron magpabilinsa gahum, apan pasabot ni Presidential Adviser on Political Affairs Secretary Gabriel Claudio nga dili palaisiya sa Presidente nga manginlabot alang sa Chacha.
Kini bisan pa sa lig-on nga suporta sa Presidente sa pag-usab sa konstitusyon sukad pa niadtong 2004.
Mismong ang mga tigsaway sa Presidente manasangil ni Mrs. Arroyo sa pagmastermind sa Cha-cha sa Ubos Balay Balaoranan ilabi na sa pagpasupot sa House Resolution 1109 aron tawgon ang Congreso sa paghisgut sa kausaban sa Konstitusyon.
Kini usab maoy unod sa argumento ni kanhi ConCon delegate ug gobernador Victor dela Serna sa usa ka debate sa kahanginan batok ni Kongresista Adam Relson Jala.
Inay magtanyag sa lig-on nga mga datos aron isulong ang iyang argumento, si dela Serna kinsa usa ka bar topnotcher mitanyag hinuon sa iyang spekulasyon, sahi sa tradisyon sa mga magdedebate. (rachiu/PIA)
by anyajulia | Jun 11, 2009 | Headlines, National News
GIKINAHANGLAN na nga makapagawas na og ruling ang Korte Suprema kabahin sa grey area sa pamaagi sa pag-usab sa Konstitusyon.
Kini maoy aghat ni Speaker Prospero Nograles, kinsa buot na nga malamdagan ang hisgutanan nga nakapahimong kontrobersyal sa pagpasupot sa Kongreso sa House Bill 1109 o ang balaodnon nga mgatogum sa Senado ug Kongreso ngadto sa usa ka Constituent Assembly.
Ang lakang usab gisabot sa mga tigpanaway nga usa ka paagi aron aron mapadayon sa termino ang Presidente.
Dungan niini, iya usab nga gipangayo niadtong may laraw sa paghimog rally nga mopasaka na lang hinuon sa Korte Suprema sa ilang mga hisgutanan.
Inay magsayang sa oras ug maghimong makalilisang nga traffic gridlocks sa ilang mga protesta, kadtong buot mokwestyon sa HB 1109 moadto na lang sa Korte Suprema. (rachiu/PIA)
by anyajulia | Jun 11, 2009 | Headlines, Local News / Bohol Balita
MISMO si Kongresista Adam Relson Jala supak sa term extension ug sa No elections apan iyang gipasupot ang panginahanglan nga usbon ang batakang balaod pinaagi sa labing sayon, paspas ug labing barato nga pamaagi sa Constitutional Assembly.
Kini human aprobahi sa Kongreso ang House Bill 1109 aron sabotan ang mga punto nga angay irepaso sa Batakang Balaod.
Sa usa ka dabate nga gipaiugdahan sa DyRD ug Bohol Chronicle, sa Jala mipasabot nga ang Konstitusyon nga wala na magtubag sa kasamtangang panginahanglan angay na nga ipahaum.
Sa laing bahin, admitido usab si Speaker Prospero Nograles nga angayan na nga magtapok ang Kongreso aron hisgutan ang mga buluhaton sa proseso pag-usab sa batakang balaod.
Matud niya, kini kinahanglan pa usab nga ikonsulta sa mga pangulo sa Senado ug Ubos Balay Balaoranan aron mahipno kon unsay angayan pang sunod nga buhaton.
Sa samang paagi, si Cong Nograles mipadayag sa iyang kasubo sa gisulsol sa katawhan nga magrally kabahin niini. (rachiu/PIA)
by anyajulia | Jun 10, 2009 | Headlines, National News
GITUDLO ni Presidente Gloria Macapagal si Solicitor General Agnes Devanadera isip acting Secretary sa Department of Justice, samtang si Kalihim Raul Gonzales mihangyo pa ug dispensa sa trabaho dala sa masakiton nga anak.
Una na usab nga gipalanog ni Gonzales nga moluwat sa pangatungdanan sa Nobyembre pohon.
Matud ni Presidential Spokesperson Lorelei Fajardo, si Gonzales mao nay mohawid sa posisyon isip Presidential Legal Counsel puli usab ni Jesus Dureza kinsa usab may masakitong asawa.
Si Devanadera kanhi mayor, nagtrabaho usab sa nagkadaiyang taas nga posisyon sa kagamhanan lakip na ang sa Office of the Government Corporate Counsel (GOCC) diin iyang gipa-uso ang zero backlog policy. Siya usab Acting DOJ Secretary sa milabayng tuig dala sa pagpa-opera ni Sec. Gonzales. (PIA)
by anyajulia | Jun 10, 2009 | Headlines, Local News / Bohol Balita
DINHI sa Tagbilaran himoon ang Civil Service Professional ug sub-professional examinations sa umaabot nga Hulyo 28.
Kini alang sa buot makasulod sa public service alang sa first ug second levels, matud ni Civil Service Commission (CSC) provincial director Nissi Cherith Asis.
Tungod niini, manawat na ang Bohol CSC office sa mga aplikasyon hangtud ugma, Miyerkoles.
Gikinahanglan lang ang mga aplikante ang P350 nga fee, magsubmitir ug accomplished application forms, labing bag-ong passport sized (1 1/2 x 2 inches) nga hulagway nga may tag, identification cards nga may pirma.
Mahimong makuha ang application forms gikan sa CSC Bohol Field Office duol sa Land Transportation Office sa Dampas, sa municipal human resource management officers o sa CSC website: www.csc.gov.ph. (rachiu/PIA)
