by anyajulia | Aug 28, 2008 | Headlines, Local News / Bohol Balita
KASAMTANGANG gihipno sa kagamhanang probinsyal sa Bohol ang mga lakng aron katabangan ang mga Bol-anong tua naipit sa giyera sa pipila ka lalawigan sa Mindanao.
Subay sa aghat ni Gob. Erico Aumentado, gilibkas sa usa ka kasaligang tinubdan sa Kapitolyo ang laraw nga magmugna ug bahan nga motabang sa mga Bol-anon nga apektado sa kagubot sa mga lalawigan sa Mindanao.
Sa usa ka contingency plan, gilaraw sa Kapitolyo nga tabangan ang mga Bol-anon nga buot manguli na sa Bohol aron makalikay sa kagubot didto.
Sa laing bahin, gitumong usab sa laraw nga kahatagan ug hinabang kadtong mga Bol-anon nga nakahukom nga dili na mouli ug adto na lamang manimuyo sa Mindanao.
Hinuon, matud sa tinubdan, hipnoon pa ang laraw sa dili pa ipahimutang sa Bool ang bahan nga personalmenteng makig-alayon sa mga tinugyanan sa mga lugar diin tua nahimutang ang mga evacuation centers. (rachiu/PIA)
by anyajulia | Aug 28, 2008 | Headlines, National News
GIPANAWAGAN ni Presidente Gloria Macapagal-Arroyo ang liderato sa Moro Islamic Liberation Front (MILF) sa dali nga pagtahan ngadto sa kagamhanan sa mga rebeldeng sakop kinsa naghimo ug salaud batok sa mga sibilyan sa Mindanao.
Partikular nga gipangayo ni GMA sila si Kumander Umbra Kato, Bravo ug Pangalian aron pa-tubagon sa ilang salaud nga nabuhat.
Ang mensahe sa Presidente ibabaw sa palisiya sa kagamhanan nga dili undangan ang pagsumpay sa proseso sa kalinaw taliwa sa mandu ngadto sa Armadong Kusog ug sa kapolisan nga dili lunga-an ang paghimog operasyon batok sa mga rebelde.
Walay all-out nga giyera, pasabot ni GMA samtang iyang gipahayag nga ang operasyon military tua magtutok sa mga gikatahapang rebelde nga nagpatay sa gatusan ka sibilyan ug nangsunog sa mga kabalayan ug kabtangan. (rachiu/PIA)
by anyajulia | Aug 28, 2008 | Headlines, National News
SUGDAN SA KAGAMHANAN ANG HALAPAD nga konsultasyon sa gisugyot nga Memorandum of Agreement alang sa Ancestral Domains (MOA-AD), kini luyo sa nabitay nga desisyon sa Kote Supreme kabahin sa legal nga basehan sa kasabutan.
Sa pamahayag ni Press Secretary Jesus G. Dureza, kinsa kanhi tigtambag sa nasud kabahin sa pagpatunhay sa kalinaw, ang konsultasyon ngadto sa mga katawhan sa mga apektadong lugar himoon kauban sa Bishop-Ulama conference nga una nang gitudlo sa Presidente.
Kini samtang gipasalig na nga adili na mopirma ang kagamhanan sa MOA-AD kon dili kini mapausab, subay sa konsultasyon nga himoon.
by anyajulia | Aug 28, 2008 | Headlines, National News
PAGLAMBIGIT sa kabatan-onan sa pagsumpo sa krimen maoy tutokan sa pagsaulog sa National Crime Prevention Week karong tuiga.
Tutokan ang panawagan sa mga kabatan-onan aron lihokon ang pagsumpo sa krimen aron makab-ot ang tunhay nga kalinaw, kini unod sa memorandum gikan sa DILG.
Matud ni Secretary Puno, ang kasaulogan maglakip sa kabatan-onan ubos sa tema nga “Kapit Bisig Kabataan tungo sa Kapayapaan, Now Na, samtang subayon ang slogan, Lakad Kabataan Laban sa Kriminalidad.
Niini, hingusgan sa kagamhanan ang katukoran sa Student Crime Prevention Network. (rachiu/PIA)
by anyajulia | Aug 28, 2008 | Headlines, National News
ABTON sa kagamhanan nga may pagtugot ang Moro Islamic Liberation Front (MILF) sa mga salaud sa mga sakop niining nanghasi kon dili itahan ang mga rebeldeng naghimog kadaut sa Mindanao.
Ug kon dili man niini kaya nga itahan, kinahanglang pasagdan una ang militar ug kapolisan sa pagpatuman sa balaod batok ug paglutos niadtong mga malapason.
Kini maoy tubag ni Press Secretary Jesus Dureza sa pahayag ni MILF Chairman Al-Haj Murad nga naghangyo ug paglurang sa opensiba military batok sa mga rebeldeng MILF.
Matud ni Dureza, ang military ug kapolisan dili mo-undang sa ilang operasyon hangtd ang mga nakasala dili mataral sa hukmanan aron manubag sa ilang ti-neroristang buhat. (rachiu/PIA)
