by magnolia_eic | Jan 24, 2011 | Headlines, Local News / Bohol Balita
Tagbilaran City, Bohol – ANG walay puas nga pag-ulan sukad naidtong Enero 17 nimugna og pagbaha sa mga kabasakan nga naka-apekto sa mga abot sa uma sa probinsiya sa Bohol.
GiKataho nga naapektuhan ang mga kabasakan sa mga lungsod sa Alicia ug Carmen.
Ang nasudnong dalan sa Larapan Jagna, kadali usab nga wala maagi-i tungod sa mga nangatumbang ponuan sa lubi apan ang mga tinugyanan sa Department of Public Works and Highways (DPWH) nihimo dayon og clearing operations.
Nisaka ang tubig sa suba sa lungsod sa Sevilla apan wala kini naghatag og kakuyaw tungod kay wala may mga kabalayan o mga tawo nga nagpuyo duol sa suba.
Ang lungsod sa Loboc nipahonong usab sa operasyon sa floating restaurant ug river cruise tungod sa pagsaka sa tubig sa suba.
Gimanduan sa Provincial Disaster and Risk Reduction Management ang mga police station sa pagpahibalo dayon sa sitwasyon sa ilang areas of responsibilities.
Hingpit nga gi monitor ang posibleng paglapaw sa tubig sa suba sa mga lungsod sa Sevilla, Loboc, Loay, Maribojoc, Cortes, Antequera, Loon, Calape, Tubigon, Clarin, Inabanga, Buenavista, Getafe, Trinidad, Alicia, Duero, Jagna, Valencia ug Lila.
Gi monitor usab ang posibleng landslides sa mga barangay sa kabukiran sa lungsod sa Jagna ug Candijay, Loboc ug San Isidro. (ecbPIABohol)
by magnolia_eic | Jan 24, 2011 | Business, Headlines, National News
MOABOT sa 4.6 porsyento ang Pag-uswag sa ekonomiya sa nasud ning tuiga, matud pa sa usa ka taho gikan sa United Nations (UN).
Base usab sa “World Economic Situation and Prospects 2011”, niingon ang UN nga gi bana-banang mo usbaw sa 5.1 porsyento ang gross domestic product (GDP) sa nasud sunod tuig.
Ang GDP ang kinatibuk-ang kantidad sa mga produkto ug serbisyo nga naggikan sa nasud.
Bisan og positibo ang mga migawas nga bana-bana, ang “UN GDP projection” alang sa Pilipinas mas ubos kon itandi sa target sa kagamhanan nga gikan pito hangtud walo ka porsyento’ng paglambo sukad ning tuiga hangtud tuig 2016.
una niini, nagpagawas og kaugalingong bana-bana ang World Bank ug giingong moabot sa lima ka porsyento ang isaka sa atong ekonomiya alang sa tuig 2011 ug 2012.
Bisan pa niini, niingon ang UN nga moabot sa 4.2 porsyento ang inflation rate sa nasud karon ug sa sunod pang tuig.
Matud pa sa UN nga sa tuig 2011 usab gilauman ang paglambo sa atong export revenue. (ecbPIABohol)
by magnolia_eic | Jan 21, 2011 | Headlines, Local News / Bohol Balita
AMENADO si Land Transportation Office Tagbilaran registrar Joel Maloloy-on nga wala siyay mahimo sa pagpa-undang sa fixers sa gawas sa iyang buhatan.
Kini human gigisa si Maloloy-n sa mga pangutana atul sa Provincial Peace and Order Council meeting sa miaging semana kabahin sa mga pamaagi sa pagpatuman sa balaod sa trapiko ug sa pagpadagan sa buhatan sa LTO.
Matud niya, tinuod nga may daghang fixers sa gawas sa LTO apan wqala siyay mahimo niini hangtud nga mosulod kini nga mga tawhana sa iyang buhatan.
Walay mga fixers sa sulod sa LTO, matud niya.
Hinuon gi-ukit sa mga sakop sa PPOC ang posibilidad nga mahimong si Maloloy-on wala masayud nga may mga contak sa mga fixers nga naa sa sulod sa buhatan ug maoy makapalusot sa mga papeles.
Niini, gimandu ni Gob Edgar Chatto ngadto kang PSSupt Constantino Barot nga abutangan og tinugyanan sa balaod sa LTO aron mabadlong ang mga fixers nga mang biktima sa mga may tuyo sa LTO. (racPIABohol)
by magnolia_eic | Jan 21, 2011 | Headlines, National News
Pormal nang nisugod pagtrabaho sa Commission on Elections (Comelec) si newly-appointed chairman Atty. Sixto Brillantes kagahapon.
Kalabot niini, ni apela si Brillantes sa publiko nga hatagan siya og higayon nga mapamatud-an ang iyang katakus isip bag-ong pangulo sa poll body.
Si Brillantes gi tudlo ni Presidente Benigno Simeon Aquino III sa puwesto niadtong Sabado sa hapon human nidesisyon si kanhi Comelec chairman Jose Melo nga mas sayong moluwat sa pangatungdanan, agig paghatag og higayon sa iyang appointment.
Gihimakak usab ni Brillantes ang pasangil sa pipila ka kritiko nga usa siyA ka “operator” sa eleksyon tungod sa iyang pagka election lawyer, diin pipila sa mga nahimo niyang mga popular nga kliyente nag-apil nilang Presidente Benigno Simeon Aquino III, kanhi Preisdente Joseph Estrada ug apil na usab sa pamilya sa mga Ampatuan.
Giseguro usab ni Brillantes nga aduna na usab usa ka malampuson ug fully-automated nga piniliay sa nasud sa tuig 2016. (ecb/PIABohol)
by magnolia_eic | Jan 21, 2011 | Headlines, National News
Gimanduan ni Presidente Benigno Aquino III ang pulisya kagahapon nga maglusad og halapad nga manhunt operations ug lalom nga imbestigasyon sa kaso sa anak ni Atty. Oliver Lozano nga nakit-ang patay sa Pampanga.
Si Aquino niingon nga dili angay maka-ikyas ang utok sa pagpatay sa anak ni Atty. Lozano ug driver niini.
Gidagit ang anak ni Atty. Lozano nga si Edmer, 44 anyos ug driver niining si Ernane Sensil niadtong Miyerkoles samtang padung sa usa ka kliyente. Nakit-an pagka sunod adlaw ang patay’ng lawas sa driver ug ang van samtang ang patay’ng lawas ni Lozano nakit-an sa Mega dike sa Porac, Pampanga niadtong Biyernes. Gisunog pa ang patay’ng lawas sa biktima.
Samtang nagtukod usab si PNP chief Raul Bacalzo og Task Force Lozano aron motutok sa maong kaso. (ecbPIABohol)
