MANILA, Dec. 08 (PIA)–Giseguro sa Malakanyang nga mahatagan dayon og tabang ang
mga lalawigang naapektuhan sa bagyong Ruby.
Matud pa ni Deputy Presidential Spokesperson Abigail Valte, agig pagsunod sa direktiba
ni Presidente Benigno ‘Noynoy’ Aquino III sa national frontline team, gi-dali na nila ang
assessment sa kadaot sa bagyo ug pagtumbok sa panginahanglan sa mga naapektuhan.
“The President gave specific orders on the quickness and fitness of damage
assessment at kung ano po ‘yung mga kailangan nating resources na mailagay doon sa
mga areas na affected.”
Giseguro usab ni Valte nga adunay igong gidaghanon sa mga food packs ang Department
of Social Welfare and Development (DSWD) ug giingong naka-andam na ang 53,375 food
packs sa national warehouse niini sa syudad sa Pasay apil na usab sa packing hub sa
ahensya sa Cebu.
Giingong nakig-alayon na usab si DSWD Sec. Dinky Soliman sa mga lokal nga kagamhanan
kalabot sa pagpagawas sa suplay sa mga pagkaon alang sa mga naapektuhan sa bagyo.
Gitataw usab ni Valte nga dili pa kinahanglan ang pagpagawas sa dugang pondo tungod kay
giingong igo pa ang Quick Response Fund nga gigahin sa gobyerno sa wala pa niabot ang
bagyong Ruby.
Naa sa P68 milyon pa ang pondo sa DSWD alang sa pagtabang sa mga naapektuhan sa
bagyo.
Nikabat usab sa 1,290 evacuation centers ang natukod sa ahensya alang sa kapin 300,000
residente, gawas pa sa mga evacuation center nga gitukod sa mga lokal nga kagamhanan.
Mahibaw-an sa mga mosunod nga adlaw kun kinahanglanon pa ang pagpagawas og dugang
pondo gikan sa Calamity Fund o Contingency Fund.
Samtang usa ka adlaw human sa pagpanghasi sa bagyong Ruby sa Borongan, Eastern
Samar, gitahasan ni PNoy si Defense Secretary Voltaire Gazmin sa pag-adto dayon sa lugar
alang sa kinahanglanong tabang ug ekipo kun maayo na ang dagan sa panahon.
Gusto sa Presidente nga masigurong paspas nga mapahatud ang tabang sa gobyerno sa
mga naapektuhan ug biktima sa kusog nga bagyong Ruby. (ecb/PIA7-Bohol)