NANUMPA si Deputy Director General Raul Bacalzo isip ika 16 nga hepe sa kapolisan sa nasud atubangan ni Presidente Benigno S. Aquino III niadtong Sept. 13.
Si Bacalzo maoy puli ni PNP Director General Jesus Versoza kinsa moretiro na.
Siya, kinsa usa usab ka bar-topnotcher sa pasulit sa mga abogado niadtong 1984 kanhi maoy nangulo sa Task Force Usig, ang bahan sa kapolisan nga gitahasan pag-imbestiga sa mga extrajudicial killings.
Si Bacalso mao nay tahurong pangulo sa 135 mil ka kapolisan sa tibuok nasud.
Gradwado sa Philippine Military Academy “Masikap” class niadtong 1977, nasuwayan na usab niya ang pagka company commander sa Mindanao ug Luzon.
Sa iyang pagka-abogado, natudlo siyang sa makaduha ka higayon isip special prosecutor sa Department of Justice, ug natudlo usab nga sakop sa Peace Negotiating Panel gikan sa 1993 hangtod sa 1998. (PIA)
