MANILA, October 18 (PIA)–Gilagdaan na ni Presidente Rodrigo Duterte isip hingpit nga balaod ang balaodnong mag-oktaba sa piniliay sa Barangay ug Sangguniang Kabataan nga gitakda untang ipahigayon sa Oktubre 31, 2016.
Ang maong paglagda gi-anunsyo ni Presidential Communications Office (PCO) Asec. Ana Marie Banaag sa gipahigayong press briefing sa Malakanyang karong adlawa.
Matud pa ni Banaag, gikumpirmar ni Executive Sec. Salvador Medialdea nga gilagdaan na ni Presidente Duterte ang maong balaod.
Giingong sa Brunei mismo nahitabo ang paglagda sa balaod dungan sa pagbisita didto sa Presidente.
Sa pagkakaron, gipaabot na lamang nga moabot sa Malakanyang ang opisyal nga kopya sa maong dokumento.
Kaniadto pa miingon na si Presidente Duterte nga suportado niya ang pag-oktaba sa piniliay sa Barangay ug SK sa kahadlok nga magamit sa piniliay ang salapi sa negosyo sa ilegal nga droga. (ecb/PIA7-Bohol)