Balaodnon nga dugang tax exemption sa 13th month pay ug bonus, nakalusot na sa 2nd reading sa Senado
MANILA, Nov. 20 (PIA)–Pasado na sa ikaduhang pagbasa sa Senado ang balaodnon nga magsaka sa tax exemption ceiling sa 13th month pay ug mga Christmas bonus sa mga mamumuo.
Sa pagkakaron, hangtud P30,000 pa lamang nga 13th month pay ug uban pang benepisyo ang walay buhis.
Base sa orihinal nga Senate Bill 2437, gi-planong isaka hangtud P75,000 ang tax exemption ceiling.
Apan gidawat pa sa sponsor nga si Senador Sonny Angara ang amendment ni Sen. Ralph Recto mao nga sa gi-aprobahang balaodnon sa ikaduhang pagbasa, hangtud P82,000 sa 13th month pay ug mga bonuses ang walay buhis.
Gi-base ang P82,000 sa inflation rate o pagsaka sa presyo sa mga nag-unang panaliton.
Matud pa ni Angara, mismong si BIR Commissioner Kim Henares ang niingon sa usa ka pagdungog sa Senado nga ang P30,000 niadtong 1994 kapareho na karon sa P82,000 mao nga gidawat niya ang amendment ni Recto.
Nanghinaot ang mga senador nga mapalabang dayon kining balaodnon aron mahimong pinaskohan sa mga kawani sa gobyerrno ug pribadong sektor.
Kun mapalabang kining balaodnon, mokabat sa 500,000 ka empleyado ang makapahimos niini. (ecb/PIA7-Bohol)