TAGBILARAN CITY, Bohol, June 19 (PIA)–Hingpit nang balaod ang duha ka balaodnon nga adunay katuyoan nga mahimong transparent ang mga financial transactions sa Pilipinas.
Kini human gilagdaan na ni Presidente Benigno “Noynoy” Aquino III ang “An Act To Further Strengthen The Anti-Money Laundering Law” ug “The Terrorism Financing Prevention And Suppression Act of 2012.”
Matud pa ni Presidential Spokesperson Edwin Lacierda, mas mapakusog pa sa duha ka balaod ang katakos sa gobyerno nga malikayan ang mga transakasyong adunay kalabot sa bisan unsang iligal nga aktibidad.
Dugang pa niini, hingusgan pa sa duha ka balaod ang katakos sa gobyerno nga masayran ang mga iligal transaksyon isip tubag na usab sa sumbanan nga gitakda sa Financial Action Task Force (FATF) sa Organization for Economic Co-operation and Development (OECD). (PIA-Bohol/ecb)
Palasyo, mitanyag og ceasefire sa CPP-NDF
TAGBILARAN CITY, Bohol, June 19 (PIA)–Gi-awhag sa Malacañang ang Communist Party of the Philippines-National Democratic Front nga seryosong ikonsiderar ang paglagda og ceasefire agreement human ang informal talks niadtong miaging semana sa Oslo.
Matud pa ni Presidential Spokesman Edwin Lacierda, makatabang ang ceasefire deal aron makab-ot ang kalinaw sa mga rebelde.
Sigun pa kang Lacierda, welcome sa ilaha ang pagbalik sa CPP-NPA-NDF sa negosasyon ug naglaum nga makakab-ot og kasabotan human pila ka higayon nga nabulilyaso ang panaghisgot.
Nibalibad si Lacierda nga hisgotan ang detalye sa negosasyon ug niingon nga itugyan na lamang kini sa government chief negotiator Alex Padilla.
Una nang gisugyot sa NDF ang mga kanhi niining demand nga maoy hinungdan sa pagkadiskaril sa panaghisgot sa kalinaw sama sa pagpugos sa JASIG list nga wala giila sa gobyerno.
“This (informal talks) is a step in the right direction. We hope something can be ironed out,” matud pa ni Lacierda. “It will be in the interest of all to arrive at a peace framework. A ceasefire is worth discussing with our security forces. We certainly hope the other side as well will consider the ceasefire proposal as a mechanism to advance peace.” (PIA-Bohol/ecb)