TAGBILARAN CITY, Bohol, Feb. 19 (PIA)–GIPAGAWAS na karon sa Malakanyang ang Administrative Order No. 37 nga nagmugna sa Task Force on Bangsamoro Development.
Nahisulod sa maong AO ang nasugdan nang gipatuman sa gipahigayong Bangsamoro Sajahatra diin nanghatag og health cards, scholarship certificates ug uban pang social services ang gobyerno sa Sultan Kudarat, Maguindanao niadtong Pebrero 11, 2013.
Pangulohan sa Office of the Cabinet Secretary ang task force samtang miyembro ang mga kalihim sa Office of the Presidential Adviser on the Peace Process, Department of Social Welfare and Development, Department of Labor and Employment, Department of Health, Department of Education, Department of Agriculture, Department of Interior and Local Government, Presidential Management Staff, Department of Budget and Management, Presidential Communications Development and Strategic Planning Office, Presidential Communications Operations Office, Office of the Press Secretary, Commission on Higher Education, Technical Education and Skills Development Authority ug Philippine Health Insurance Corporation.
Apil sa mga trabaho sa task force ang pag-ugmad ug pagpatuman sa mga proyektong motubag sa panginahanglan sa pang-edukasyon, panglawas ug panginabuhian sa mga naa sa MILF areas.
Gamiton sa mga hingtungdang ahensya sa gobyerno ang ilang kaugalingong pondo nga naaprubahan sa General Appropriations Act.
Apan gitumbok usab sa maong AO nga mahimong makagamit ang task force sa pondo sa President’s Social and Contingent Funds kun gikinahanglan.
“The Task Force shall coordinate with the Transition Commission, created pursuant to Executive Order No. 120 (s. 2012), in the development and implementation of the foregoing programs and projects,” parte sa Section 2 sa AO 37. (PIA-Bohol/ecb/i-sjp)