TAGBILARAN CITY, Bohol, May 07 (PIA)–Gikumpirmar kagahapon ni Presidente Benigno “Noynoy” Aquino III nga gawas sa usa pa ka barkong maggikan sa Estados Unidos, aduna pay usa nga maabot gikan sa Europa.
Kahinumdoman nga niabot sa niaging tuig ang usa ka coast guard class-cutter nga gitawag karong BRP Gregorio del Pilar ug karong buwana, gipaabot ang barko nga gikan sa Estados Unidos.
Gibutyag sa Pangulo atol sa kasaulogan sa ika-70 nga pagtimaan sa Fall of Corregidor kagahapon nga hinganlan og Ramon Alcaraz ang ikaduhang warship sa nasud nga gikan sa Estados Unidos.
Si Alcaraz nga bayani sa Corregidor niadtong panahon sa World War II ang nagdala sa usa sa tulo ka motor torpedo nga barko sa nasud nga gitawag og Q-boats.
Ang iyang Q-112 naka-igo og tulo sa siyam nga Japanese “Zero” fighters sa wala pa siya nadakpan.
Matud pa sa Pangulo nga mahimo nang tulo ang warship sa Pilipinas diin tig-usa na ang Luzon, Visayas ug Mindanao.
Gipahayag sa Pangulo nga usa lamang kini sa mga nahimong bunga sa gisugdan niyang kabag-ohan mao nga nakapalit ug dugang kahimanan. (PIA-Bohol/ecb)