TAGBILARAN CITY, Sept. 15 (PIA)– GI-ANUNSIYO gahapon sa Palasyo ang appointments nilang kanhi Muntinlupa Rep. Ruffy Biazon isip bag-ong Bureau of Customs (BOC) chief ug retired Gen. Danny Lim isip deputy commissioner for intelligence niini.
Pormal nang nanumpa karong buntag atubangan ni Presidente Benigno “Noynoy” Aquino III si Lim isip depcom for intel samtang ugma, adlaw’ng Biyernes gitakdang manumpa si Biazon.
Kahinumdoman nga gipahayag mismo ni Presidente Aquino nga si Biazon ang ihulip ni outgoing Commisioner Angelito Alvarez nga mokanaug sa pwesto sa dili pa ang Setyembre 16.
Wala nakontento ang Presidente sa anti-smuggling drive ni Alvarez sa BOC mao nga gihulipan siya niini. Kahinumdoman’g gitangtang si Alvarez tungod sa pagkawala sa may 2,000 ka container vans sulod mismo sa Customs.
Si Biazon ug Lim parehong midagan isip senador ubos sa Liberal Party ni Presidente Aquino niadtong Mayo 2010 nga piliay apan parehong wala midaug.
Misaad si Biazon nga magtabangay sila ni Lim nga masugpo ang smuggling sa BOC sa tabang na usab sa mga katawhan ug tibuok puwersa sa mga kawani sa Customs. (PIA-Bohol/ecb)