TAGBILARAN CITY, August 10 (PIA)–Dili na pagawason sa nasod ni Presidente Rodrigo Duterte ang mga adunahang negosyante nga wala nagbayad og saktong buhis.
Matud pa sa Presidente, gitahasan na niya ang Bureau of Immigration (BI) nga bawalan kini sila nga makagawas sa Pilipinas.
Dungan niini, miingon si Duterte nga nangayo na siya karon og listahan sa mga tax evaders kang Bureau of Internal Revenue (BIR) Kalihim Caesar Dulay.
Kun makuha na sa Presidente ang maong listahan sa mga tax evaders, manduan niya ang mga polis ug sundalo kauban ang media nga adtuon ang puluy-anan niini aron pangutan-on kun nganong wala sila nagbayad og saktong buhis.
Giseguro usab ni Duterte nga sa oras nga magbayad og saktong buhis ang mga tax evaders, dili na sila makasinati og bisan unsang matang sa harassment gikan sa BIR.
Giingong makadismaya tungod kay nakaya pa sa mga tax evaders nga mokuha og mga polis ug sundalo aron mahimong personal nga bodyguard.
Pagseguro sa Presidente, bungkagon niya ang mga polis ug militar nga nagsilbing personal bodyguard sa mga tax evaders. (ecb/PIA7-Bohol)