TAGBILARAN CITY, Bohol, July 17 (PIA)–Suportado sa Malakanyang ang pagsulod sa uban pang ahensya sa gobyerno aron imbestigahan ang nabutyag nga P10 bilyon pork barrel scam.
Gawas sa National Bureau of Investigation (NBI), mosulod na usab ang Office of the Ombudsman ug ang Bureau of Internal Revenue (BIR).
Matud pa ni Deputy Spokesperson Abigail Valte, wala silay nakitang problema sa pagpahigayon og parallel investigation sa tulo ka ahensya.
Si Valte nagkanayon nga mandato man ug sakop sa gahum sa maong mga ahensya nga mopahigayon kini og imbestigasyon sa nagkalain-laing aspeto sa hisgotan ilabi na nga makatabang kini sa mas paspas nga pagsulbad sa mga kontrobersya.
Giingong mo-sentro ang imbestigasyon sa Ombudsman sa mga “ghost projects” nga gigamitan og pork barrel sa mga magbabalaod samtang mo-sentro ang imbestigasyon sa BIR kun nibayad ba og saktong buwis ang tag-iya sa JLN Corporation nga si Janet Lim-Napoles. (PIA-Bohol/ecb)
45-minute turnaround, ipatuman sa CAAP sa tanang domestic flights
TAGBILARAN CITY, Bohol, July 17 (PIA)–Magpatuman og 45-minute turnaround ang Civil Aviation Authority of the Philippines (CAAP) alang sa tanang domestic flights.
Matud pa ni CAAP deputy director general Johnny Andrews, tuyo sa 45 minute turnaround nga mahatagan ang mga piloto ug airline crew og igong oras aron makapangandam.
Ang 45 minute ground time mao ang standard practice sa tanang regional ug international operations.
Ipatuman sa CAAP kining bag-ong sistema sugod Agosto 1.
Karong adlawa unta kini sugdan ipatuman apan giingong nihangyo ang Cebu Pacific nga i-uswag una ang pagpatuman niini aron maka-adjust ang ilang kumpanya sa ilang mga flight schedules.
Kining maong sistema ginapatuman na sa mga airport sa ubang nasud. (PIA-Bohol/ecb)