TAGBILARAN CITY, Mar. 05 (PIA)–Ang tibuok lalawigan sa Bohol makasinati og tibuok adlaw nga blackout sa Sabado, Marso 7, 2015.
Kini tungod sa pagpalong sa 138KV Maasin-Ubay power line sa National Grid Corporation of the Philippines (NGCP).
Ang tigpamaba sa NGCP nga si Rosette Martinez, nipahibalo sa publiko nga ang sugang dagitab mapalong sugod sa alas 6 sa buntag ug ibalik sa alas 5 sa hapon.
Matud pa ni Martinez, ang 11 ka oras nga power interruption gamiton alang sa tinuig nga preventive maintenance sa Maasin-Ubay transmission line.
Kini nagpasabot nga ang tanang konsumidor sa elektrisidad sa Bohol nga gi-alagaran sa Bohol Light Company Inc. (BLCI), Bohol Electric Cooperative (BOHECO) I ug II apektado.
Gi dugang usab ni Martinez nga ang 100MVA ug 5MVA transformers apektado usab sa maong tinuig nga preventive maintenance apil na ang 15 MVAR Shunt Reactor ug ang 138kV switch yard equipments.
Kining mga ekipo anaa nahimutang sa Ubay Sub-Station ug Tugas Cable Terminal Station.
Ang maong mga estasyon adunay gitipigan nga high voltage equipment ug line protection relays. (ecb/PIA7-Bohol)
