TAGBILARAN CITY, July 7 (PIA)–Ang kagamhanang probinsiyal sa Bohol midaog sa Gawad Tugas Awards sa Department of Environment and Natural Resources (DENR) sa natad sa patent issuance.
Ang kagamhanang probinsiyal ubos ni Gob. Edgar Chatto usa sa 15 ka national government agencies, partner private companies, local government units (LGUs) ug non-government organizations (NGOs) nga gigantihan atol sa 2nd Gawad Tugas Awarding Ceremony nga gipahigayon sa Marcelo B. Fernan Cebu Press Center, Sudlon, Lahug, sa syudad sa Sugbo niadtong Hunyo 30.
Ang Tugas Awards ipasidungog ngadto sa mga LGU, indibidwal, people’s organization ug non-government organization nga nagpasiugda og mga kalihokan sa maayong pagdumala sa kalikopan.
Tumong usab sa pasidungog ang paghimong modelo ug sumbanan sa maayong programa o kalihokan, sumala pa ni DENR Regional 7 Director Isabelo Montejo.
Ang seremonya gipahigayon agi og pagtaok-op sa 2016 Philippine Environment Month sa DENR-7. (ecb/PIA7-Bohol)