BOHOL, July 19 (PIA)–Gipasidunggan kagahapon sa local government unit sa Candijay, ning lalawigan ang nisikat na karon sa social media nga Bol-anong janitor sa Ninoy Aquino International Airport 2 (NAIA 2) nga si Julito P. Amoy.
Si Amoy, 36 anyos usa ka janitor sa Terminal 2 sa NAIA gipasigarbo sa mga taga-lungsod sa Candijay sa pagpakita sa kaligdong sa pagkamatinud-anon pinaagi sa pag-uli ngadto sa tag-iya sa bag nga nagsulod og mga credit/debit cards nga may pin numbers ug uban pang importanteng kabtangan nga iyang nakit-an sa iyang gi-trabahuan.
Gihatagan ni Mayor Christopher Tutor ug mga miyembro sa Sangguniang Bayan sa Candijay si Amoy og Certificate of Appreciation ug cash incentive atol sa seremonya nga gipahigayon sa munisipyo sa maong lungsod niadtong Lunes.
Gisaksihan kini sa amahan ni Julito nga si Jacinto Amoy, Barangay Kapitan sa Tambongan nga si Agripino Mapute, mga kawani sa lokal nga kagamhanan sa Candijay, PNP, BFP ug local-based government agencies nga nitambong sa regular flag raising ceremony sa maong lungsod.
Atol sa maong seremonya, gipasidunggan ni Mayor Tutor ang integridad ug disiplina sa kaugalingon ug nitumbok ni Amoy isip ‘role model’ sa matag konstituwente nga angay sundogon.
Si Amoy, minyo na ug adunay upat ka anak nga lumad nga taga Purok 2, Tambongan, lungsod sa Candijay apan kasamtangang nagpuyo karon sa syudad sa Pasay. (MPIO-Candijay/ecb-PIA7-Bohol)