LOON, Bohol, Feb. 25 (PIA)–Gibisita og balik ni Presidente Benigno ‘Noynoy’ Aquino III ang mga naapektuhan sa niaging kalamidad sa wala pa isaulog ang ika-28 anibersaryo sa EDSA People Power Revolution.
Lunes sa hapon sa dihang niabot si PNoy gikan sa Cateel, Davao Oriental sa Cogon Norte sa Loon, Bohol diin iyang gi-inspeksyon ang mga bunkhouses alang sa mga nawad-an og puy-anan tungod sa magnitude 7.2 nga linog niadtong Oktubre 15, 2013.
Si PNoy gi-ubanan sa iyang mga kabinete nga sila si PCOO Sec. Sonny Coloma, DILG Sec. Mar Roxas, DPWH Sec. Rogelio Singson, DSWD Sec. Dinky Soliman ug DND Sec. Voltaire Gazmin.
Gisusi ni PNoy ang 10 ka bunkhouses nga aduna usab 10 ka units sa matag bunkhlouse alang sa 100 ka mga banay.
May 5 kini ka communal service facilities nga gi-andam alang sa mga mopuyo niini. Ang matag communal service facility adunay 8 ka pansayan, 4 ka kaliguanan, 4 ka hugasanan ug 20 ka lung-agan.
Ang duha ka bunkhouses na kumpleto na og gipuy-an na karon, samtang ang 8 gipadayon pa sa pagtukod ug hapit na mahuman.
Si DPWH Regional Director Ador Canlas ang nihatag kang PNoy og briefing kabahin sa proyekto nga gitumong aron kabalhinan sa mga biktima sa linog kang kinsang mga balay nangaguba.
Gipunduhan kini pinaagi sa P20 milyones nga donasyon sa Philippine Port Authority (PPA) alang sa mga biktima sa linog sa Bohol.
Gisugdan niadtong Enero ning tuig, ang proyekto apil sa 20 ka mga emergency bunkhouses nga gipundohan sa P20 milyones sa PPA, diin ang laing 10 ka bunkhouses tua ipahimutang sa Tubigon.
Kasamtangang naa na sa kapin sa 80% ang proyekto nga gipatuman, samtang anaa pa sa 40% ang pagpatuman sa proyekto sa Tubigon.
Human sa pagsusi sa mga bunkhouses, si PNoy mi-deretso ngadto sa Cong. Natalio Castillo Memorial Hospital sa Loon diin iya usab gisusi ang mga nahimo sa kagamhanan sa naguba nga tambalanan.
Atol sa programa sa ika-28 anibersaryo sa EDSA People Power Revolution nga gipahigayon kilid sa maong tambalanan, si PNoy mipasalig sa mga Bol-anon nga ang nasudnong kagamhanan mobulig gayud alang sa pagbangon pagbalik sa lalawigan. (PIA7-Bohol/ECB)