TAGBILARAN CITY, Bohol, Jan. 14 (PIA)–Gitin-aw sa Commission on Elections (Comelec) nga samtang wala pa nagsugod ang election campaign, dili pa gihapon mahimong magbutang og bisan unsang election materials sa bisan asang lugar.
Matud pa ni Comelec Executive Director James Jimenez, sa Pebrero 12, 2013 pa ang pagsugod sa kampanya alang sa mga national candidate ug partylist group samtang sa Marso 29 usab magsugod ang kampanya alang sa mga lokal nga kandidato.
Giangkon ni Jimenez nga gipaabot na nila ang pagdagsa sa mga poster, tarpaulins ug paggawas sa mga telebisyon sa mga kandidato tungod kay pag-abot sa campaign period, limitado na ang paggawas nila sa media.
Giingong mas hugtan pa sa Comelec ang paglimita sa pagpamaskil og mga campaign posters.
Nakig-alayon na usab sila sa Department of Public Works and Highways (DPWH) alang sa mga probinsiya ug sa Metro Manila Development Authority (MMDA) alang usab sa mga taga-Metro Manila sa pagtangtang sa mga gipamaskil na nga mga election materials.
Bantayan usab sa Comelec ang media exposure sa mga kandidato nga aduna lamang 120 minuto sa ilang exposure nga apil na sa cable ug local channels nga dili na susama sa niaging eleksyon.
Si Jimenez nagkanayon nga angay usab sundon sa mga kandidato ang budget sa kampanya nga P3.00 matag botante alang sa mga kandidatong may partido ug P5.00 sa mga independent candidate.
Bantayan usab sa Comelec ang pagdagsa sa mga kandidato nga mogamit sa social network campaign. Giingong ilang bantayan ang mga gibaligyang ads sa nagkalain-laing websites. (PIA-Bohol/ecb/I-gg)