MANILA, Jan. 15, 2014 (PIA)–Gilusad karon ni Presidente Benigno ‘Noynoy’ Aquino III ang Cashless Purchase Card (CPC) Program sa gobyerno aron malikayan ang anomaliya sa mga transaksyon.
Sa Good Governance Summit, miingon si Presidente Aquino nga solusyon kini nga sistema sa naandang transaksyon sa pagpalit og mga government supplies.
Matud pa sa Presidente nga target nila nga sa dili pa mahuman ang tuig, 100% nga checkless o wala nay tseke ug 80% cashless na ang transaksyon sa gobyerno.
Ang CPC ipatuman ning unang kwarter sa 2014 sa tabang sa Department of Budget and Management (DBM), Department of National Defense (DND) ug ang Armed Forces of the Philippines (AFP) isip mga pilot agencies alang sa implementasyon niini.
Limitadong cards lamang ang ipanghatag sa mga ahensiya sa gobyerno nga adunay allowable purchases apil na sa mga medical supplies, meals, transportation sa official documents, airline tickets, ug construction supplies alang sa mga minor repairs.
Ugma usab ilusad sa gobyerno ang website nga Open Data Philippines nga makita sa www.data.gov.ph.
Makita dinhi ang mga up-to-date national data—gikan sa total enrollment sa public secondary schools, budget ug mga gigastuhang proyekto ug kun unsa ang proseso sa bidding nga gi-agian niini.
Giingong aduna usab mga statistics niini nga sayon lang masabtan tungod sa reader-friendly visualizations, gawas pa sa mga application.
Tungon niini, mas dali ug paspas nga mahibaw-an sa publiko ang mga labing-ulahing impormasyon kalabot sa mga programa sa gobyerno.
Sama sa CPC, ang Open Data Philippines parte usab sa reporma sa administrasyon alang sa mas maayong pagdumala sa gobyerno. (PIA7-Bohol/ECB)