by admin | Sep 9, 2016 | Headlines, Local News / Bohol Balita
TAGBILARAN CITY, September 9 (PIA)–Naa na sa bisinidad sa Eastern Visayas ang low pressure area (LPA) nga unang nasigpatan sa sidlakang parte sa Mindanao.
Matud pa ni Philippine Atmospheric, Geophysical and Astronomical Services Administration (PAGASA) forcaster Glaiza Escullar, katapusang nasigpatan ang LPA sa Guiuan, Eastern Samar.
Gipaabot nga magdala ang maong weather disturbance og kusog nga ulan sa Eastern Samar, CARAGA, Dinagat, Zamboanga Peninsula ug Palawan.
Bisan ang Bohol, Cebu ug Negros, dayag usab sa kusog nga pag-ulan.
Gipasidan-an ang mga nagpuyo sa low lying areas tungod sa hulga sa pagbaha ug pagdahili sa yuta.
Samtang sa Metro Manila usab, gipaabot ang thunderstorm ilabi na sa kahaponon ug gabii.
(ecb/PIA7-Bohol)
by admin | Sep 7, 2016 | Headlines, Local News / Bohol Balita
TAGBILARAN CITY, September 7 (PIA)–Gibuksan na ang 24/7 call center hotline sa Department of Labor and Employment (DOLE) kagahapon didto sa kaulohan.
Ang mga adunay pangutana ug reklamo mahimong motawag sa 24/7 hotline nga 1349 alang sa Metro Manila, 1800-8888-1349 alang sa mga naa sa mga lalawigan ug 800-8888-1349 alang sa mga naa sa ubang nasod toll free.
Tubagon sa maong call center ang mga reklamo ug sumbong sa mga empleyado batok sa mga abusadong employer.
Mahimo usab motawag ang bisan kinsa alang sa ilang pangutana kalabot sa suholan, katungod ug benepisyo sa mga empleyado, local ug overseas employment opportunities, working condition, labor relations ug post employment issues.
Gawas niini, ang mga sumbong kalabot sa illegal recruitment, child labor ug endo dawaton usab sa call center.
Adunay 10 ka telepono ug computer set ang maong 24/7 action center nga atimanon sa 40 ka kawani sulod sa 24 oras.
Ang 24/7 action center nahimutang sa ikaupat nga andana sa buhatan sa DOLE sa Intramurous, Manila ug adunay katakos nga ma-track on-time ang status sa mga reklamo. (ecb/PIA7-Bohol)
by admin | Sep 6, 2016 | Headlines, Major Events, National News
MANILA, September 6 (PIA)–Gilagdaan na ni Presidente Rodrigo Duterte ang proklamasyon nga nagdeklarar og “state of lawless violence” sa tibuok nasod sa wala pa kini nibiya paingon sa Vientiane, Laos aron motambong sa ASEAN Summit.
Ubos sa maong proklamasyon, gitahasan ang Armed Forces of the Philippines (AFP) ug Philippine National Police (PNP) sa paghimo og tukmang aksyon aron pugngan ang tanang matang sa lawless violence sa Mindanao ug aron mapugngan ang pagkatap sa lawless violence sa ubang parte sa nasod nga adunay konsiderasyon sa sibil ug politikanhong katungod ug sa gilatid sa Konstitusyon.
Giingong kun makita na sa Presidente nga luwas na ang tibuok nasod, maghimo na usab kini og proklamasyon aron bakwion kini.
Matud pa ni Executive Secretary Salvador Medialdea Jr., gilagdaan sa Presidente ang maong proklamasyon human sa nahitabong pagpamomba sa syudad sa Davao niadtong Biyernes sa gabii.
Gitataw usab ni Medialdea nga walay ipatuman nga “curfew” sa tibuok nasod samtang gipatuman ang state of lawless violence apan magpahigayon og mga checkpoints ang militar ug polisya sa tibuok nasod. (ecb/PIA7-Bohol)
by admin | Sep 6, 2016 | Headlines, National News
MANILA, September 6 (PIA)–Milagda na sa usa ka memorandum of agreement (MOA) ang Philippine National Police (PNP) ug ang duha ka telecommunications company kagahapon didto sa Camp Crame sa kaulohan.
Gipangunahan ni PNP Chief Ronald “Bato” dela Rosa ang paglagda sa kasabotan kauban ang mga tinugyanan sa duha ka telcos alang sa paggamit sa police quick response hotline nga 2286.
Dungan niini, gipahigayon usab ang unveiling sa marker nga literal nga may bato ug sundang nga nagpakita sa pagtaga sa usa ka sundang sa usa ka dakong bato.
Alang sa pagsumpo sa krimen, mahimong mo-text sa ilang mga concerns ang publiko sa nahisgotang numero nga 2286 apan may P2.50 nga charge ang matag text.
May feature usab kini nga “auto call” kun adunay emergency.
Gawas sa 2286, mahimo usab gamiton ang 911 alang sa pagpangayo og tabang kun adunay emergency alang sa paspas nga pagtubag sa krimen ug pagsumpo sa ilegal nga droga. (ecb/PIA7-Bohol)
by admin | Sep 6, 2016 | Headlines, Local News / Bohol Balita
TAGBILARAN CITY, September 6 (PIA)–Pormal nang gi-deklarar sa Malakanyang nga usa ka regular holiday ang Setyembre 12, isip pagsaulog sa Eid’l Adha o Feast of Sacrifice.
Sa Proclamation Number 56 nga gilagdaan ni Executive Secretary Salvador Medialdea, gi-deklarar nga regular holiday sa tibuok nasod ang Setyembre 12, adlaw nga Lunes.
Kini human gi-rekomendar sa National Commission on Muslim Filipinos ang maong petsa aron isaulog ang obserbasyon sa Eid’l Adha,
Ang Eid’l Adha ang ikaduha sa pinakadakong festival alang sa mga Muslim.
Sinyales kini sa pagtapos sa tinuig nga Hajj pilgrimage sa Mecca. (ecb/PIA7-Bohol)
by admin | Sep 5, 2016 | Headlines, Major Events, National News
MANILA, September 5 (PIA)–Gipagawas sa Malakanyang ning bag-o lang ang duha ka bersyon sa anti-drug advertisement niini.
Matud pa ni Presidential Communications Office (PCO) Kalihim Martin Andanar, tuyo sa maong advertisement nga makuha ang atensyon sa matag pamilyang Pilipino aron makalikay sa paggamit sa ilegal nga droga.
May duha ka bersyon ang advertisement, ang una kalabot sa usa ka amahan nga nagumon sa ginadili nga droga diin gipakita ang daghang mahinungdanong kahigayonan nga wala niya nakauban ang iyang pamilya.
Samtang ang ikaduha nga bersyon usab kalabot sa usa ka inahang Overseas Filipino Worker (OFW) nga perting paningkamot og trabaho sa ubang nasod, samtang ang iyang anak sa Pilipinas tiggamitan sa ilegal nga droga.
Kapin sa duha ka minuto ang full version sa duha ka advertisements ug si Brillante Mendoza ang director niini.
Ang maong mga TV ads makita sa mga TV stations ug mga sinehan sa tibuok nasod. (ecb/PIA7-Bohol)
