by admin | Jul 14, 2016 | Headlines, Local News / Bohol Balita, Major Events
TAGBILARAN CITY, July 14 (PIA)–Nihatag og mga pahinumdom ang Commission on Elections (COMELEC) sa mga nagplanong molansar sa brangay ug Sangguniang Kabataan (SK) elections.
Base sa gipagawas nga Resolution No. 10151 sa COMELEC, gitakda nila ang pagsang-at og certificates of candidacy (COC) sa mga modagan sa barangay ug SK elections sa Oktubre 3 hangtud 5 lamang.
Kalabot niini, mahatagan lamang ang mga kandidato gikan Oktubre 21 hangtud 29 aron mangampanya.
Pahinumdom pa usab sa COMELEC, ipatuman na sa panahon sa campaign period ang mga ginadili matag panahon sa piniliay sama sa pagpanghatag og mga donasyon, paggamit sa mga armadong sakyanan, ug bisan ang pagpahigayon og mga konstraksiyon sa mga kalsada ug uban pa.
Apan wala man gibawalan ang pagpahigayon og mga panagpulong sa barangay o sa mga kandidato.
Ipatuman usab ang gun ban sa panahon sa election period nga magsugod gikan Oktubre 1 hangtud Nobyembre 7. (ecb/PIA7-Bohol)
by admin | Jul 14, 2016 | Headlines, Local News / Bohol Balita, Major Events
TAGBILARAN CITY, July 14 (PIA)–Gilusad niadtong Martes sa Bureau of Customs (BoC) sa kaulohan ang balikbayan tax calculator app.
Tuyo sa maong computer application nga mahatagan og katin-awan ang mga Overseas Filipino Workers kun pila ang ilang mabayran sa pag-abot sa nasod.
Mahimo nang ma-download ang maong app sa mga mobile phones diin makita didto kun pila ang mabayran sa usa ka OFW sa mga ipadala nila base sa gideklarang kantidad niini.
Gamit ang mobile app, ibutang lamang ang pangalan sa brand, pilion kun unsang kategorya, ang gidaghanon ug kantidad sa mga napalit nga gamit.
I-save aron mahibaw-an kun pila ang kantidad sa tax ug duties nga angay bayran.
Segun sa balaod, tanang mga gamit nga gipalit sa gawas sa nasod buhisan sa BoC.
Apil na niini ang mga bag, sapatos, relo, alahas, pahumot, laptop, ug uban pa.
Matud pa sa BOC, daku ang matabang niini aron mahatagan dayon og ideya ang mga balikbayan sa kantidad nga angay nilang bayran.
Isulong usab niini ang transparency aron malikayan ang korapsyon.
Ang balikbayan tax calculator app, available pa lamang sa mga android ug mahimo na usab ma-download sa mga IOS devices sa umaabot nga panahon. (ecb/PIA7-Bohol)
by admin | Jul 14, 2016 | Headlines, National News
MANILA, July 14 (PIA)–Gisugyot sa Department of Health (DOH) sa publiko nga mag-andam sa kanunay ilabi na kun maatubang ang nasod sa bisan unsang matang sa kalamidad.
Matud pa ni DOH Kalihim Pauline Rosell Ubial, mahinongdanon ang panaghiusa sa tanan aron dili lamang magsalig sa mga doktor, nurse ug health workers sa pagtubag sa higayong adunay emergency.
Tungod niini, miingon si Ubial nga ilang hingosgan ang pagbansay sa tanang mga non-government organization ug kawani sa gobyerno alang sa basic life support.
Gitumbok sa Kalihim nga angay magbaton og emergency kit ang matag pamilyang Pilipino nga mahimong gamiton sa panahon nga may kalamidad.
Ang emergency kit usa ka butanganan o bag nga sudlan og mga butang nga mahimong kinahanglanon sa panahon sa aksidente o kalamidad.
Kini angay naka-andam sa tanang oras ug naa sa prominenteng lugar nga daling makuha kun kinahanglanon.
Ang pamilyang may kumpletong emergency kit adunay dakung tsansa nga maluwas sa panahon sa kalamidad. (ecb/PIA7-Bohol)
by admin | Jul 13, 2016 | Headlines, Major Events, National News
MANILA, July 13 (PIA)–Gitahasan na ni Presidente Rodrigo Duterte si Presidential Communications Office (PCO) Kalihim Martin Andanar nga pangunahan ang usa ka multi-agency task force nga tuyong imbestigahan ang serye sa mga pagpatay sa mga mamamahayag sa nasod.
Matud pa ni Andanar, gipaabot nga ipagawas ni Presidente Duterte ang administrative order karong bulana nga tuyong sugdan ang pagmugna og usa ka ‘superbody’ nga motutok sa daghang kaso sa mga pagpatay sa mga mediamen.
Gipaabot nga ipagawas ang maong kamanduan sa dili pa ang State of the Nation Address (SONA) ni Duterte sa Hulyo 25.
Giingong maapil sa pagamugnaong task force ang mga law enforcement agencies sama sa National Bureau of Investigation (NBI) ug Philippine National Police (PNP) ug mga tinugyanan sa nagkalain-laing news organizations.
Giingong pinaagi niini, mahibaw-an ang motibo sa nagpaluyo sa mga media killings.
Mahimong dalan usab ang imbestigasyon aron mahatagan og tabang ug suporta ang mga pamilyang nabilin sa mga napatay nga mamamahayag. (ecb/PIA7-Bohol)
by admin | Jul 13, 2016 | Headlines, Major Events, National News
MANILA, July 13 (PIA)–Gitakdang magpagawas og memorandum ang Malakanyang nga maghatag og dalan aron pa-imbestigahan ang mga mayor ug barangay kapitan nga may taas nga kaso sa ilegal nga droga sa ilang lugar.
Sa gipahigayong press briefing sa Malakanyang kagahapon, miingon si Abella nga gi-andam na ang draft memorandum apan wala kini miingon kun kanus-a ipagawas ug kanus-a sugdan ang pagpatuman niini.
Gipasabot ni Abella nga ang maong lakang parte pa gihapon sa pagtumbok sa mga nagsilbing protektor sa ilegal nga droga ug mahimong basehan usab aron mahibaw-an kun adunay ‘neglect of duty’ o pagpabaya ang mga lokal nga opisyal mao nga mikatap ang operasyon sa droga sa ilang nasakupan.
Wala pa usab gitumbok ni Abella kun unsa ang mahimong liability sa mga lokal nga opisyal nga mapamatud-ang nagpabaya sa katungdana mao nga mikatap ang problema sa droga sa ilang lugar.
Ang Department of Interior and Local Government (DILG) ang magdumala sa himuong imbestigasyon sa mga lokal nga opisyal.
Gibutyag usab ni Abella nga target usab sa gobyerno nga magtukod og mga regional rehabilitation center sa tibuok nasod diin didto ipaubos sa rehabilitasyon ang mga naulipon sa droga. (ecb/PIA7-Bohol)
by admin | Jul 13, 2016 | Headlines, Local News / Bohol Balita
TAGBILARAN CITY, July 13 (PIA)–Ang kagamhanang probinsiyal sa lalawigan sa Bohol nagplano sa pagpatukod og rehabilitation center sa islang lungsod sa President Carlos P. Garcia diin ang mga naulipon sa droga ibutang alang sa ilang reformation.
Gibutyag kini ni Gob. Edgar Chatto atol sa convocation program sa Kapitolyo niadtong Lunes sa buntag.
Napili ang islang lungsod sa President Carlos P. Garcia nga tarokan sa maong proyekto tungod sa kalayo niini nga angayan alang sa mga sesyon sa mga naulipon sa droga nga ipaubos sa reformation.
Dugang niini, ang Office of the Provincial Social Welfare and Development (OPSWD) nag-preparar usab og usa ka intervention program alang sa mga tigamitan ug tigpayohot sa ilegal nga droga nga mitahan sa kapolisan.
Sa pinakaulahing ihap, nikabat na sa 10,000 ang nitahan nga mga drug user ug drug pusher sa lalawigan.
Ang mga lokal nga opisyal usab sa mga kalungsoran, nagmugna na og mga alternatibong panginabuhian sa mga nitahan aron pagsiguro nga mobiya na gayud sila sa ilang mga ilegal nga buhat ug bisyo sa droga.
Ang kagamhanang probinsiyal, nagplano na usab kaniadto sa pagtukod og youth rehabilitation center sa lungsod sa Bilar diin didto usab ibutang nga mga kabataan nga nakalapas sa balaod.
Gi-planohan kining panganlan og Bohol Youth Home, magsilbing component sa implementasyon sa Republic Act 9344 o ang Juvenile Justice and Welfare Act of 2006 ug Presidential Decree 603 o The Child and Youth Welfare Code. (ecb/PIA7-Bohol)
