by admin | Jan 27, 2016 | Headlines, Local News / Bohol Balita, Major Events
BOHOL, Jan. 27 (PIA)–Gikan sa unang gitakdang petsa nga Pebrero 1, gi-irog na usab sa Commission on Elections (COMELEC) sa Pebrero 8 ang pag-imprenta sa mga balotang gamiton sa piniliay sa Mayo 9.
Matud pa ni COMELEC Commissioner Christian Robert Lim, mao na kini ang pinaka-pinal ug katapusang pag-oktaba sa pag-imprenta ug kun may mo-apelar pang i-irog kini, giingong angay andam silang i-oktaba na usab ang mismong petsa sa eleksyon.
Ang unang petsang target sa COMELEC alang sa pag-imprenta sa balota gitakda niadtong Enero 26, apan gi-irog kini sa en banc sa Pebrero 1 tungod kay kinahanglan pang isa-pinal ang listahan sa mga kandidato.
Matud pa usab ni COMELEC Chair Andres Bautista, ang desisyon sa pagpa-irog sa petsa bunga sa nahimong diskusyon ug gi-konsiderar usab nila ang pipila pa ka mga nag-ungot nga kaso batok sa ubang mga kandidato.
Gipasabot ni Lim nga sa Peb. 1 na unta nila ipagawas ang pinal nga listahan, apan mibotar ang en banc nga i-irog na lang kini sa Peb. 8.
Kini usab, matud pa isip pagtubag sa panawagan sa pipila aron dili sila mapasanginlang mi-bulilyaso sa kandidatura sa pila ka partikular nga politiko o kaha mi-pabor sa uban.
Kahinumdoman nga naa sa deliberasyon pa sa Korte Suprema ang disqualification cases batok kang presidential candidate Sen. Grace Poe, samtang nag-ungot pa sa COMELEC ang mga kasong diskwalipikasyon usab batok sa usa pa ka kandidato sa pagka-presidente nga si Mayor Rodrigo Duterte.
Gitataw ni Bautista nga bisan unsa man ang mahimong desisyon sa maong mga kaso, magpabilin ang ilang desisyon.
Apan gi-angkon ni Bautista ug Lim nga nanghinaot sila nga sayong maresolba ang mga kaso batok kang Poe aron makatabang sa ilang pagsa-pinal sa listahan sa mga kandidato. (ecb/PIA7-Bohol)
by admin | Jan 20, 2016 | Headlines, Major Events, National News
MANILA, Jan. 20 (PIA)–Pasado na sa senado ang Customs Modernization and Tariff Act o CMTA nga maglibre sa taripa sa mga pasalubong nga cargo o sa mga Balikbayan Box nga ginapadala sa mga overseas Filipino workers (OFWs) ug nagkantidad lamang og dili molapas sa P150,000. ang sulod.
Ang maong balaodnon nagsaka sa ceiling sa kantidad sa Balikbayan Box nga libre sa taripa gikan sa kanhi P10,000.
Matud pa ni Senate President Pro Tempore Ralph Recto, ang pagpasar sa CMTA nga gitawag niyang Balikbayan Box Law o BBL maghatag og pribilehiyo sa mga OFWs nga mag-ule o magpadala sa Pilipinas og mga butang nga ilang gihaguan nga dili buhisan.
Sa Section 800 sa maong balaodnon, nakalatid nga mahimong magpadala og duha ka boxes ang usa ka OFW nga iphon isip usa ka shipment lamang kun dili molapas ang kantidad niini sa P150,000.
Gipasabot ni Recto nga ang maong pribilehiyo mahimo lamang gamiton katulo sulod sa usa ka tuig sa mga OFWs.
Kinahanglan usab nga ang sulod sa mga Balikbayan Boxes mga personal ug gamit sa panimalay lamang ug dili angay dinaghan nga mahimong gamitong pang-negosyo.
Kung hingpit na kining mahimong balaod, mahimong libre na usab sa buhis ang mga donasyon ug mga relief goods kun adunay kalamidad.
Malikayan na usab ang “human intervention” o pagpang-abri sa mga Balikbayan Boxes tungod kay himuon nang electronic ang pamaagi sa Customs ug isaka ang silot sa mga magtinguhang gamiton ang mga Balikbaybayan Boxes sa smuggling. (ecb/PIA7-Bohol)
by admin | Jan 20, 2016 | Headlines, Major Events, National News
MANILA, Jan. 20 (PIA–Gilagdaan na ni Presidente Benigno ‘Noynoy’ Aquino III ang Republic Act No. 10742 o Sangguniang Kabataan Reform Act isip hingpit nang balaod.
Matud pa ni Presidential Communications O¬perations Office (PCOO) Kalihim Herminio Coloma Jr., gilagdaan kini niadtong Enero 15 ning tuig ni PNoy diin tumong niing hingosgan ang Sangguniang Kabataan.
Apil sa mahinungdanong probisyon ning bag-ong balaod ang pagtakda sa bag-ong age limit alang sa mga SK members nga gikan sa kanhi 15-17 anyos, gihimo na kining 18-anyos taman 24-anyos.
Tuyo niining mahatagan og gahom ang mga SK members o kabataang opisyal nga mosulod sa kontrata ug mahimong accountable sa ilang mga aksiyon.
Ug tungod kay legal na ang edad, mahimo nang manubag ang mga SK members kun mosulod kini sa usa ka kuwestyunable o maanomaliyang transaksyon o kasabotan.
Ubos usab niining balaod, nahisulod ang probisyon alang sa anti-dynasty diin ang mga paryente sa elected o appointed officials hangtud sa second degree of consanguinity o affinity bawal nga modagan sa SK nga posisyon.
Lakip nga gibawalan nga mahimong opisyal sa SK ang anak, igsuon, bayaw o bilas sa napili o natudlo sa usa ka posisyon sa gobyerno.
Matud pa usab sa nagsulat sa maong balaodnon nga si Senador Bam Aquino, mahimong dalan sa tinuod nga kabag-ohan sa electoral system ang SK Reform Act tungod kay dili na kini magamit sa mga pamilyang politiko aron mapalapdan pa ang ilang pagkupot sa gahom. (ecb/PIA7-Bohol)
by admin | Jan 19, 2016 | Headlines, Major Events, National News
MANILA, Jan. 19 (PIA)–Walay ipagawas nga mga lisensyadong plaka sa mga sakyanan human gibasura sa Commission on Audit (COA) ang apela sa Land Transportation Office (LTO) nga ipalibkas ang notice of disallowance nga gipagawas sa komisyon niadtong Hulyo 2015 sa pagpahunong sa kontrata tali sa Dutch-Filipino consortium nga PPI-JKG Philippines sa pag-suplay og plaka.
Ang kompanyang Dutch-Filipino ang nakakuha sa P3.8 bilyong kontrata nga mo-suplay sa LTO sa mga vehicle license plates sa tuig 2013.
Duha ka tuig ang milabay, ang COA mipagawas og notice of disallowance ug nimando sa LTO sa pagpahunong sa pagbayad sa supplier tungod sa kalapasan sa procedures nga gimando ubos sa Republic Act 9184 o ang Government Procurement Reform Act.
Apan gi insister sa tigpamaba sa LTO nga si Jason Salvador nga ang bidding alang sa maong kontrata walay lipudlipod.
Ang LTO nagsulay pa usab og resolbar sa laing problema kalabot sa supplier sa driver’s license cards.
Ang Manila Regional Trial Court nimando sa LTO sa pagpahunong sa award ug pagbayad sa P336 milyong driver’s license card suplay nga proyekto sa Allcard Plastics Philippines Inc.
Matud pa nga ang solusyon lamang nga mahimong himuon sa LTO mao ang pagpangita og laing supplier alang sa mga plaka sa mga sakyanan. (ecb/PIA7-Bohol)
by admin | Jan 19, 2016 | Headlines, Local News / Bohol Balita
BOHOL, Jan. 19 (PIA)–Aprubado na sa Senado ang balaodnong dugangan ang maternity leave sa mga babayeng kawani sa pribado ug pampublikong sektor ug himuong tulo ka buwan o 100 ka adlaw.
Sa kasamtangang balaod, mokabat lamang sa 60 ka adlaw ang maternity leave alang sa mga kawani sa gobyerno ug 60 taman 78 usab sa mga kawani sa pribadong sektor, depende sa ‘mode of delivery’ niini.
Matud pa ni Sen. Pia Cayetano, sponsor sa Senate Bill No. 2982, ang kasamtangang maternity leave mas ubos sa 98 ka adlaw nga minimum requirement sa International Labor Organization (ILO).
Giingong ang Pilipinas naulahi usab sa ubang nasud sa ASEAN region kalabot sa “maternity leave duration”.
Pasabot pa ni Cayetano, ubos sa SBN 2982 o Expanded Maternity Leave Law of 2015, tuyo niining mahatagan og igong panahon ang mga inahan nga mabalik ang ilang kusog ug mahimo ang ilang ‘maternal roles’ sa dili pa mobalik sa ilang trabaho. (ecb/PIA7-Bohol)
by admin | Jan 19, 2016 | Headlines, Local News / Bohol Balita
BOHOL, Jan. 19 (PIA)–Ang Civil Service Commission (CSC) mi-klaro sa polisiya sa mga lalaking kawani sa pribado ug pampublikong sektor nga nag-planong mo-file og paternity leave.
Sa usa ka resolusyon nga gi-proklamar niadtong Disyembre 21, 2015, ang CSC mi-preparar og mando ug patakaran sa implementasyon sa Republic Act 8185 o ang Paternity Leave Act of 1996.
Matud pa sa Section 20 sa RA 8185, ang paternity leave nga 7 ka adlaw kinahanglang non-cumulative ug non-convertible to cash.
Pareho kining magamit sulod sa 7 ka adlaw nga way bugto o putol-putol nga paagi sa adlaw mismo, sa dili pa, atol ug human sa pagpanganak o pagkakuha sa bata sa iyang lihitimong asawa.
Kining maong leave ma-avail sa dili pa matapos ang 60 ka adlaw human sa petsa sa pagpanganak o pagkakuha sa bata. (ecb/PIA7-Bohol)
