by aimee | Apr 24, 2014 | Headlines
MANILA, April 24, 2014 (PIA)–Gitangtang na sa Hong Kong ang sanction ug black travel alert batok sa Pilipinas sa pagdawat niini sa apology kalabot sa dugoong bus hostage crisis sa Manila niadtong 2010.
Matud pa ni Hong Kong Chief Executive Leung Chun-ying, nagtuo siyang ang bilateral relations tali sa Hong Kong ug Pilipinas magbaton og bag-ong chapter.
Sa pagkab-ot sa pinal nga resolusyon sa krisis nga nakaingon sa tensiyon sa relasyon sa Manila ug Hong Kong, malaumon si Leung nga magmalinawon na usab ang kalag sa mga biktima ug .
Sigun pa kang Leung, sa milabay nga unom ka bulan, grabe ang pagtrabaho sa duha ka panig aron masolusyonan ang tensyon.
Gidawat sa Hong Kong ang apology human giseguro sa gobyerno sa Pilipinas pinaagi ni Secretary to the Cabinet Jose Rene Almendras, ang proteksyon sa mga Hong Kong tourists sa nasud ug ideklarar ang Hulyo 14 ug Agosto 23 isip days of prayer alang sa mga biktima sa trahedya.
Hulip niini, gitangtang sa Hong Kong ang mga gipahamtang nga silot sa Pilipinas sama sa suspensyon sa visa-free access alang sa mga opisyal sa gobyerno.
Gitangtang na usab sa HK ang pagbawal sa ilang katawhan sa pag-biyahe sa Pilipinas. (PIA7-Bohol/ECB)
by aimee | Apr 24, 2014 | Headlines, Health and Medicine
MANILA, April 24, 2014 (PIA)–Matud pa sa Department of Health (DOH), ang MERS-CoV usa ka klase sa corona virus nga dala usab sa severe acute respiratory syndrome (SARS).
Pipila sa mga sintomas niining maong sakit mao ang hilanat, ubo, lisud sa pagginhawa ug pagkalibang sulod sa duha ka semana.
Gitambagan ang mga nakasinati niining mga sintomas nga magpatan-aw gayud sa tambalanan aron malikayan ang pag-grabe niini.
Gipasabot ni DOH Assistant Sec. Eric Tayag nga kuhaan og sample sa tutonlan ang usa ka gidudahan una pa kini tambagan kun kinahanglang ipasulod sa ospital o i-quarantine.
Giingong bagsik ang MERS-CoV nga paspas makatakod ug mahimong ikamatay sa usa ka pasyente sulod sa 10 ka adlaw.
Bisan wala pay kasigurohan kun unsa ang hinungdan niini, gidudahang sa mga camel nagsugod ang maong sakit.
Sugod Marso 2013 hangtud Abril 13, 2014, may natala nang 228 ka kaso sa MERS-CoV sa tibuok kalibotan diin 92 niini ang namatay apil na ang usa ka Pinoy health worker sa usa ka tambalanan sa UAE.
Aron malikayan ang MERS-CoV, gitambagan sa DOH ang publiko nga kanunay manghugas sa kamot, sap-ungan ang baba kun mo-ubo ug likayan ang mga lugar nga gidugokan sa katawhan.
Samtang padayong gi-monitor karon sa Bureau of Quarantine sa Pilipinas ang tanang pasaherong mo-abot gikan sa Middle East nga adunay hilanat. (PIA7-Bohol/ECB)
by aimee | Apr 16, 2014 | Headlines, National News
MANILA, April 16, 2014 (PIA)–Epektibo kagahapon, Abril 15, gitugotan na ang pito ka nasud nga makasulod sa Pilipinas bisan walay visa.
Matud pa sa Department of Foreign Affairs (DFA), ang mga langyaw sa mga nasud sa Belize, Croatia, Kazakhstan, Kyrgyzstan, Tajikistan, Turkmenistan ug Uzbekistan gihatagan na sa gobyerno sa Pilipinas og pribilehiyo nga “visa-free” entry ug mahimong magpabilin sa nasud hangtud sa 30 ka adlaw.
Giingong gihatag ang maong pribilehiyo aron mas mapalambo pa ang turismo ug pamuhunan sa Pilipinas gikan sa maong mga nasud.
Matud pa ni DFA Usec. Rafael Seguis, target sa Department of Tourism (DOT) nga makab-ot sa ahensya ang 10 milyong foreign tourist arrivals sa tuig 2015.
Ang desisyon nga hatagan og visa free privilege ang 7 pa ka nasud naggikan sa inter-agency coordination sa Bureau of Immigration, Department of Tourism, Department of Justice, Philippine Center on Transnational Crime, National Intelligence Coordinating Agency ug National Security Council.
Samtang gitangtang sa gobyerno ang Somalia sa listahan sa mga nasud nga gihatagan sa visa-free privilege ug gimanduan ang mga Somali nationals nga mo-apply sa ilang visa sa mga Embahada ug Konsulado sa Pilipinas sa ilang countries of origin o residence sa pagbisita sa Pilipinas.
Ang mga nasud nga adunay visa-free privilege mahimong makuha ang pribilehiyo pinaagi sa pag-prisintar sa ilang national passport nga balido og hangtud 6 ka bulan apil na ang panahon sa ilang pagpabilin sa nasud ug return ticket diin sila naggikan o onward ticket sa sunod nga destinasyong nasud.
Ang mga nasud nga adunay visa-free privilege mikabat na sa 157 ug mahimo kining makita sa DFA website. (PIA7-Bohol/ECB)
by aimee | Apr 11, 2014 | Headlines, National News
MANILA, April 11, 2014 (PIA)–Mokabat sa P1.456 bilyon ang makolekta sa Bureau of Internal Revenue (BIR) kun ang tanang mga Pilipino mamayad og saktong buhis matag tuig.
Kini ang gibutyag ni BIR Commissioner Kim Henares tungod kay nagkaduol na ang deadline sa filing sa buhis sa Abril 15.
Sa talaan sa BIR, mokabat lamang sa 24% ang nagbayad og buhis sa 1.8 milyong Pilipinong “self-employed”.
Giingong mahimong istrikto ang BIR sa katapusang adlaw sa filing ug eksaktong alas 5 impunto isarado na nila ang ilang mga buhatan.
Apan kun dili maka-apas sa deadline ang mga mag-file og buhis, mosaka ang surcharge fee sa 25%.
Ang silot usab sa mga dili mobayad og saktong buhis mao ang pagkabilanggo gikan usa hangtud upat ka tuig ug posibleng molanat pa sa 10 ka tuig.
Mao nga subling gipahinumdom sa BIR ang pagbayad og sayo ug saktong buhis. (PIA7-Bohol/ECB)
by aimee | Apr 11, 2014 | Headlines
MANILA, April 11, 2014 (PIA)–Nipasidaan ang Food and Drug Administration (FDA) sa publiko nga magbinantayon gayud batok sa mga barato ug dili rehistradong bottled water nga gibaligya sa kamerkadohan, partikular na sa mga pasahero ug motorista nga naa sa kadalanan.
Matud pa sa tigpamaba sa FDA nga si Joyce Cirunay, pipila sa mga bottled water nga gibaligya sa mga kadalanan ug mga sidewalk ug mapalit lamang sa barato nga presyo, wala mi-agi sa FDA.
Giingong mahimong matumbok kun rehistrado ang mga bottled water kun aduna kini registration number sa likod sa plastic container.
Ang registration number gina-isyu sa FDA sa higayong mopasar sa ilang standard ang usa ka produkto.
Gitambagan ni Cirunay ang mga mamamalit nga sa dili pa mopalit og bottled water, susihon una ang packaging niini aron matino kun peke kini.
Giingong pipila sa angay susihon og maayo mao ang takob niini ug susihon kun dili pa guba ang seal tungod kay mahimong gi-refill lamang kini.
Matud pa nga angay usab tan-awon og maayo ang tubig kun adunay mga hugaw nga naglutaw-lutaw ug susihon ang integridad sa packaging material.
Gitataw usab sa FDA nga ang mga refilling stations wala gihatagan og pagtugot nga mamaligya og bottled water bisan regulated pa sila sa local government units. (PIA7-Bohol/ECB)
by aimee | Apr 9, 2014 | Headlines
TAGBILARAN CITY, Bohol, April 08, 2014 (PIA)–Si Presidential Communications Operations Office (PCOO) Secretary Herminio “Sonny” Coloma Jr. ang pinasidunggang dinapit ugma, Abril 9 sa pagbukas sa Bayani Challenge 2014 dinhi sa lalawigan.
Isip pagsaulog sa Adlaw sa Kabayanihan o Araw ng Kagitingan ugma, mubarog ang Bohol sa panawagan sa kabayanihan pinaagi sa pagboluntaryo sa paglusad sa Bohol Bayani Challenge.
Pangunahan ni Gob. Edgar Chatto ang mga kawani ug opisyal sa probinsyal, syudad ug nasudnong kagamhanan, NGOs ug civil society sa himuong kalihokan sa pagbukas ugma sa alas 4:00 sa hapon didto sa CPG Sports Complex ning syudad.
Kini human sa ipahigayong Bohol Bayani Challenge Walk diin ipalihok ang nagkalain-laing sektor didto sa grandstand gikan sa 3 ka starting points: sa Plaza Rizal, sa dalan F. Rocha ug sa Tagbilaran City Pier, diin magtapok ang tanan sa alas 3:00 sa hapon.
Nagdala sa temang “Walang Iwanan,” ang Bayani Challenge ning tuiga magtipon sa usa ka milyong volunteers sa 12 ka lalawigan— Aklan, Antique, Bohol, Capiz, Cebu, Eastern Samar, Iloilo, Leyte, Negros Occidental, Palawan, Samar ug Zamboanga.
Ang mga bukas nga kalihokan naglangkob sa pagpatukod og mga balay, paghatag higayon ikauban ang mga bata, makig-uban sa health missions, makiglambigit sa clean-up drive, mag-ayo sa mga tunghaan ug magpahiule sa kalikopan.
Kini pagahimuon sulod sa kinatibuk-ang 9 ka semana nga magsugod sa Abril 12 ug motak-op sa Hunyo 12, Adlaw sa Kaugalingnan kun Independence Day.
Kini gipangunahan sa Pilipinas Natin, sa pakigtambayayong sa Gawad Kalinga, ang pinakadakung bayanihan nga kalihokan sa tibuok kalibotan nga nagtinguhang maka-alagad sa 5 ka milyong pamilya karong tuiga. (PIA7-Bohol/ECB)
