PNoy, giseguro ang tabang sa mga biktima sa linog

by aimee | Oct 16, 2013 | Headlines

TAGBILARAN CITY, Bohol, Oct. 16 (PIA)–Giseguro ni Presidente Benigno ‘Noynoy’ Aquino III ang tabang alang sa mga apektado sa 7.2 magnitude nga linog nga miigo sa Visayas kagahapon.

Miyerkules sa buntag sa dihang miabot ang Presidente sa syudad sa Tagbilaran kauban ang iyang mga miyembro sa gabinete.

Personal nga gi-kumusta sa Presidente ang mga biktima sa linog nga nagpabilin sa CPG Sports Complex sa syudad sa Tagbilaran ug gipangunahan niini ang pagpanghatag og relief goods sa Department of Social Welfare and Development (DSWD).

Dungan sa iyang personal nga pagbisita dinhi, miingon ang Presidente nga bisan dili niya masaad ang kinatibuk-ang resources sa gobyerno, apan giingong mohimo siya og paagi aron makabarug sa kalamidad ang mga biktima sa linog katambayayong ang pribadong sector.

“I just don’t wanna commit right now but you can expect me to help getting the private sector to help,” matud pa sa Presidente.

Sa inisyal nga talaan sa National Disaster Risk Reduction and Management Council (NDRRMC), mikabat na sa 107 ang kumpirmadong patay diin pinakadaghan ang gikan sa lalawigan sa Bohol nga kapin na sa 90 samtang 9 usab sa Cebu. Gibanabanang kapin usab sa duha ka milyong katawhan ang apektado sa maong kusog nga linog sa parte sa Visayas.

Atol sa briefing nga gipahigayon kaganina sa People’s Mansion, giseguro ni Interior Secretary Mar Roxas nga hugot nilang gipatuman ang price freeze sa mga dapit nga naigo sa linog human gi-deklarar ubos sa state of calamity.

Samtang gi-angkon ni Department of Public Works and Highways (DPWH) Secretary Rogelio Singson nga mahimong mokabat pa sa usa ka buwan aron mabalik sa normal ang dagan sa transportasyon pinaagi sa pagpaayo sa mga nagubang tulay.

Sa pagkakaron, naa na sa 18 ka lungsod sa lalawigan sa Bohol ang walay supply sa kuryente nga matud pa sa Department of Energy (DOE) nga naa sa 65 porsiyento pa lamang ang nabalik nilang supply sa enerhiya sa mga dapit nga naigo sa kalamidad.

Gipasalig sa Presidente ngadto sa mga Bol-anon nga mabalik na ang 100% supply sa enerhiya sa lalawigan sa Bohol sulod sa 2 hangtud 3 ka adlaw gikan karon. (PIA7-Bohol/ECB)