by aimee | Feb 5, 2013 | Headlines, National News
TAGBILARAN CITY, Bohol, Feb. 05 (PIA)–GITIN-AW sa National Printing Office (NPO) nga walay nahitabong aberya sa unang gabii sa pag-imprenta sa mga balota alang sa midterm elections sa Mayo 13.
Matud pa ni NPO Printing Committee Chairman Dulce Sagle, gitinguha nila nga mas mahimong klaro ang pag-imprenta sa logo sa Commission on Elections (Comelec) mao nga nahunong kadali ang operasyon kagabii, apan nipadayon ra ang pag-imprenta sa tulo ka bag-ong makina sa ahensya.
Kumpiyansa usab ang NPO nga kun walay aberya, mahuman nila og mas sayo pa sa gitakdang deadline nga Abril 25 ang pag-imprenta sa 52,014,648 balota alang sa tibuok nasud.
Pasabot pa ni Sagle, target nilang maka-imprenta og 600,000 hangtud 1 milyon matag adlaw.
Sa pagkakaron, unang gi-imprenta ang mga balota alang sa Cotabato.
Magpadayon ang ilang operasyon ug sa Biyernes Santo lamang ang ilang pahulay. (PIA-Bohol/ecb/i-gg)
TRO sa Cybercrime law, gi-uswag pa sa Korte Suprema
TAGBILARAN CITY, Bohol, Feb. 05 (PIA)–GI-USWAG pa sa Supreme Court (SC) ang temporary restraining order (TRO) batok sa implementasyon sa Republic Act 10175 o Cybercrime Prevention Act of 2012.
Matud pa ni Atty. Gleo Guerra ang tigpamaba sa SC, magdugay ang bag-ong TRO hangtud walay bag-ong kamanduan ang ipakanaug. Ikaduhang higayon na kining gi-uswag sa SC.
Kahinumdoman nga karong adlawa unta matapos ang 120-day TRO sa SC batok sa Cybercrime Law nga gipakanaug sa Korte Suprema niadtong Oktubre 9, 2012.
Dunggon unta karong adlawa, dungan sa pagkahuman sa TRO, ang 15 petisyon nga mi-kuwestiyon sa constitutionality sa Cybercrime Law.
Matud pa ni Guerra nga naa na sa discretion sa mga mahistrado kun hangtud kanus-a mahimong epektibo ang maong TRO.
Gipabasura sa mga mi-kuwestiyon ang maong kontrobersyal nga balaod tungod kay giingong nakalapas kini sa freedom of expression sa mga tiggamitan sa social media. (PIA-Bohol/ecb/i-gg)
by aimee | Feb 5, 2013 | Headlines, National News
TAGBILARAN CITY, Bohol, Feb. 05 (PIA)–MAY natudlo nang bag-ong National Disaster Risk Reduction and Management Council (NDRRMC) executive director si Presidente Benigno “Noynoy” Aquino III human niluwat sa pangatungdanan si Benito Ramos niadtong Enero 11.
Matud pa ni Deputy Presidential Spokesperson Abigail Valte, pirmado na ang appointment papers ni Ret. Maj. Gen. Eduardo del Rosario isip acting administrator sa Office of the Civil Defense (OCD).
Si Del Rosario ang namuno kaniadto sa Task Force Kalihim nga mitutok sa search operations sa nihagsang eroplano nga gisakyan ni anhing Interior and Local Government Secretary Jesse Robredo.
Si Valte nagkanayon nga epektibo ang appointment ni Del Rosario sugod Pebrero 1, 2013, dungan usab sa effectivity sa resignation ni Ramos.
Dungan niini, gitudlo usab ni Presidente Aquino si Lt. Gen. Alan Luga isip bag-ong vice chief of staff sa Armed Forces of the Philippines (AFP). (PIA-Bohol/ecb/p-gg)
Comelec, mangandam batok sa signal jammers karong umaabot eleksyon
TAGBILARAN CITY, Bohol, Feb. 05 (PIA)–PANGANDAMAN sa Commission on Elections (Comelec) ang mga nagtinguhang pugngan o babagan ang pag-transmit sa mga boto sa umaabot nga 2013 midterm elections.
Matud pa ni Comelec Chairman Sixto Brillantes Jr., nakig-alayon na ang ilang komisyon sa National Telecommunications Commission (NTC) ug sa mga kumpanyang Smart Telecommunications ug Globe Communications aron masiguro nga dili makalusot ang mga nagplanong mag-jam sa mga automated elections.
“Che-checkin na ho natin yan (jamming scheme), meron na rin kaming report na ganyan.”
Gi-angkon ni Brillantes nga ang pinaka-importanteng parte sa automated elections ang pag-transmit sa resulta mao nga tutokan nila kini ug tun-an ang tanang posibleng paagi aron mahimong epektibo ang proseso.
Una nang mipagawas og pahayag ang Malakanyang nga dili angay e-balewala ang bisan unsang hulga sa integridad sa nagsingabot nga eleksyon.
Kini human sa napabalita nga pagdagsang sa mga signal jamming devices nga gikahadlokang gamiton sa pagpanikas sa eleksyon. (PIA-Bohol/ecb/i-gg)
by aimee | Feb 1, 2013 | Headlines, National News
TAGBILARAN CITY, Bohol, Feb. 01 (PIA)–NAGPASALAMAT ang gobyerno sa Pilipinas sa pagtubag sa Saudi Arabia sa 2.3 milyon Saudi Riyal nga kulang nga blood money alang sa overseas Filipino worker (OFW) nga si Rodelio “Dondon” Lanuza.
Sa gipagawas nga statement sa Department of Foreign Affairs (DFA), nagpasalamat usab si Foreign Affairs Secretary Albert Del Rosario kang Vice President ug Presidential Adviser on OFW Concern Jejomar Binay alang sa natigom nga 700,000 Saudi Riyals sa pamilya ni Lanuza. Gipasalamatan usab sa kalihim ang tabang sa mga Pilipino alang sa kababayang OFW.
Una nang gikumpirmar ni Binay nga dili madayon ang pagbitay kang Lanuza.
Giingong gitawagan siya sa embahada sa Saudi Arabia kagahapon ug gipaabot ang balita nga gitubag ni King Abdullah ang 2.3 milyon Saudi Riyals o kapin P25 milyon nga blood money.
Apan gi-klaro niini nga dili dayon makagawas sa bilangguan si Lanuza tungod kay kinahanglan pang dalhon sa korte ang Royal decree aron makapagawas og release order ang Saudi court.
Tuig 2000 sa dihang napatay ni Lanuza ang usa ka Saudi national nga nanutok niya og kutsilyo ug giingong padung siya panamastamasan niini.
Plano usab sa gobyerno sa Pilipinas nga mangayo og tabang sa hari sa Saudi Arabia alang sa kinabuhi sa usa ka OFW nga napahamtangan usab og silot nga kamatayon.
Nameligro pa gihapon nga mabitay si Joselito Zapanta tungod sa giingong pagpatay sa usa ka Sudanese landlord niadtong 2009.
Matud pa ni Binay, mahuman na sa Marso ang upat ka buwang gitakda sa pamilya ni Zapanta aron makumpleto ang P44 milyong blood money diin P10 milyon pa lang ang natigom karon.
Apan ang maayong balita usab, gikunhoran sa P33 milyon ang blood money. Bisan pa niini, P23 milyon pa gihapon ang kinahanglang matigom. (PIA-Bohol/ecb/i-gg)
by aimee | Feb 1, 2013 | Headlines
TAGBILARAN CITY, Bohol, Feb. 01 (PIA)–NAGTUO ang Malakanyang nga dakung kontribusyon sa ekonomiya na nasud ning tuig ang mga galastuhon sa mga kandidato sa nagsingabot nga eleksyon.
Karong tuig, naa sa 6 hangtud 7 percent ang target nga paglambo sa ekonomiya tungod sa nasinating momentum.
Matud pa ni Presidential Spokesman Edwin Lacierda, mosulod ang dakung kwarta gikan sa campaign expenditures nga magamit sa nagkalain-laing proyekto.
Si Lacierda nagkanayon nga naglaum silang sama sa niaging tuig, malabwan na usab ang growth target sa 2013 hangtud sa 2014.
Dugang pa niya, kini ang resulta sa mga repormang gisugdan ni Presidente Benigno “Noynoy” Aquino III ug bunga usab sa maayong pagdumala.
Sama sa ilang giingon, “good governance” adunay “good economics.”
“Well, that’s the target. We just asked DBCC (Development Budget Coordination Committee), what was the target for this year. They said, 6 to 7 percent, and so with the growth of… This is… coming election season, so we’ll expect expenditures to rise and so we also expect our infrastructure to continue. (Socioeconomic Planning) Secretary (Arsenio) Balisacan has already mentioned the growth target as well as how we look at the past year and how we’re looking forward to the next year. So we’re confident that we will be able again to reach the target six to seven percent GDP growth,” matud pa ni Lacierda. (PIA-Bohol/ecb/i-ed)
Malakanyang, suportado ang panaghisgotay tali sa KBP ug Comelec
TAGBILARAN CITY, Bohol, Feb. 01 (PIA)–SUPORTADO sa Malakanyang ang gihimong panaghisgot sa Comelec ug mga stakeholders kalabot sa gi-kwestiyong mga bag-ong sumbanan sa piniliay.
Kahinumdoman nga gawas sa bag-ong airtime limit sa mga campaign ads, gi-kwestiyon usab sa Kapisanan ng mga Brodkaster ng Pilipinas (KBP) ang probisyong nag-ingon nga angay mokuha og clearance o mo-abiso una ang usa ka media station sa Comelec sa dili pa mo-interview og usa ka kandidato. Nagtuo ang KBP nga paglapas kini sa Batakang Balaod.
Matud pa ni Deputy Presidential Spokesperson Abigail Valte, maayo nga venue kini aron masulbad ug madungog ang tanang mga concerns ilabi na sa media.
Apan si Valte nagkanayon nga sa katapusan, naa lamang sa Comelec ang pagdesisyon kun unsa ang mga angay ipatuman nga election rules.
Giingong basta angay lamang masiguro nga tanang ipatuman nga patakaran, mahisubay sa Batakang Balaod. (PIA-Bohol/ecb/i-gg)
by aimee | Jan 31, 2013 | Headlines
TAGBILARAN CITY, Bohol, Jan. 31 (PIA)–NIPASIDAAN ang Bureau of Internal Revenue (BIR) sa publiko batok sa mga pekeng ahente sa ilang ahensya nga motawag sa publiko aron maningil.
Kini human sa sunod-sunod nga tawag nga nadawat sa BIR nga nagreklamo kun nganong gi-singil sila sa kulang nga gibayad nga buhis.
Gibutyag ni Deputy Commissioner Nelson Aspe sa BIR Operations Group ang modus nga nagpaluyo niining bag-ong scam.
Matud pa nga tawagan sa mga suspek ang usa ka tawo ug ingnon nga naay problema sa iyang gibayran nga tax. Harason kini sa mga suspek ug pugson og pabayad sa kantidad.
Ang uban, mogamit pa sa iyang pangalan ug sa BIR Operations Group.
Pagtin-aw sa BIR, walay transaksyon nga himuon lamang sa telepono.
“Before we audit you, we usually give you a notice that we are auditing you, please prepare your books,” matud pa usab ni BIR Commissioner Kim Henares.
Tambag pa sa BIR, dili mahadlok kun makadawat og ingon niining tawag ug ipahibalo dayon sa ilang ahensya sa mga numerong 981-8888 o 981-880 hangtud 82 o mag -email sa jacinto-henares@bir.gov.ph. (PIA-Bohol/ecb/p-gg)
by aimee | Jan 31, 2013 | Headlines, National News
TAGBILARAN CITY, Bohol, Jan. 31 (PIA)–SUPORTADO sa pipila ka magbabalaod sa Estados Unidos ang lakang sa Pilipinas nga ipasaka sa United Nations ang pagresolba sa territorial issues tali sa China ug parte sa West Philippine Sea.
Ang U.S. Congressional Delegation (CODEL) nga gipangulohan ni House committee on Foreign Affairs ug California Rep. Ed Royce mipadayag sa ilang suporta sa argumentong gihikyad sa Pilipinas kalabot sa baruganan niini sa gi-ilogang teritoryo atol sa ilang courtesy call sa Malakanyang kagahapon.
Ang CODEL mibisita sa nasud niadtong Enero 28 hangtud 30 isip parte sa ilang pagbisita sa rehiyon. Nibisita na usab sila sa Seoul ug Taiwan una niabot dinhi sa Pilipinas ug moadto usab sa Beijing.
Una niini, nipadayag na og hingpit nga pagsalig ang Malakanyang nga dawaton sa United Nations partikular sa International Tribunal on the Law of the Sea (ITLOS) ang pormal nga pagdulog sa Pilipinas aron masolbad ang territorial dispute sa China.
Nagtuo usab ang gobyerno nga dili kini makaapekto sa relasyon sa Pilipinas ug China tungod kay giingong usa kini ka “friendly and peaceful move” aron masolbad ang problema. (PIA-Bohol/ecb/i-gg)
Ekonomiya sa PH, nilambo og 6.6% sa 2012; milapas sa target
TAGBILARAN CITY, Bohol, Jan. 31 (PIA)–NAKATALA og 6.6 percent nga paglambo ang ekonomiya sa niaging tuig, mas taas sa target sa merkado, lending institutions ug bisan sa gobyerno.
Matud pa ni National Statistical Coordination Board (NSCB) chief Jose Ramon Albert, sa katapusang quarter sa tuig 2012, natala nila ang 6.8 percent output gikan sa services, trade, real estate ug construction sectors.
Tungod niini, natala ang full-year gross domestic product (GDP) nga mas taas sa 5 to 6 percent growth nga gipaabot sa gobyerno.
Niining semanaha lang, sa ikatulong nagsunod nga trading session, nagpabilin pa gihapon sa lokal nga merkado ang record-breaking rally niini.
Duol na sa 6,300 mark ang composite index sa Philippine Stock Exchange, human matala ang 6,293.37 o mas taas og 58.64 points.
Kini na ang pang-12th record high sa local marker karong tuiga.
Una nang mihatag og pahayag si Presidente Benigno “Noynoy” Aquino III nga ikapasigarbo gayud sa tanan ang natalang paglambo sa ekonomiya sa niaging tuig. (PIA-Bohol/ecb/i-ed)
