by admin | Oct 12, 2016 | Headlines, Major Events, National News
MANILA, October 12 (PIA)–Nanumpa na ni Presidente Rodrigo Duterte ang 124 ka mga bag-o niyang appointees sa gobyerno.
Gipangunahan kini nila Atty. Amado Valdez isip bag-ong Chairman sa Social Security System (SSS) ug Martin Dino isip Chairman sa Subic Bay Metropolitan Authority (SBMA).
Nailhan si Valdez isip kanhi Dean sa University of the East (UE) – College of Law ug usa sa mga nagpa-disqualify kang Sen. Grace Poe niadtong niaging piniliay.
Samtang si Dino usab ang Chairman sa Volunteers Against Crime and Corruption, ug Deputy Secretary General sa PDP-Laban. Kahinumdoman nga siya usab ang orihinal nga pambato sa maong partido sa pagka-presidente, sa wala pa nidesisyon si Duterte nga modagan.
Apil usab sa uban pang mga key appointees nga nanumpa kagahapon silang Atty. Karen Jimeno isip Undersecretary for Legal Affairs sa Department of Public Works and Highways; Berna Romulo Puyat isip Agriculture Undersecretary; Felipe Judan ug Garry de Guzman isip Transportation Undersecretaries; Jorge Sarmiento isip Communications Undersecretary; ug Riccojudge Echiverri isip Assistant Secretary usab sa Department of Interior and Local Government.
Kauban usab sa mga nanumpa sa Presidente si Atty. Kristoffer James Purisima isip Deputy Administrator sa Office of Civil Defense nga kanhi abogado ni PNP Chief Alan Purisima.
Gihulipan sa mga appointees apil na ang mga bag-ong ambassadors, judges, ug undersecretaries sa mga buhatan, ang mga posisyon nga gi-deklarang bakante sa Presidente niadtong Agosto sa tinguhang sugpuon ang korapsiyon. (ecb/PIA7-Bohol)
by admin | Oct 12, 2016 | Headlines, National News
MANILA, October 12 (PIA)–Dili na maningil og buhis ang Bureau of Customs (BOC) sa mga imported goods nga ubos lamang ang kantidad.
Gipahibalo kini ni BOC Commissioner Nicanor Faeldon duha ka bulan sa dili pa isaulog ang Kapaskohan.
Matud pa ni Faeldon, sugod niadtong Oktubre 5, wala na gipaninglan og Customs duties ug taxes ang mga kargamento o produktong nagkantidad og P10,000 paubos.
Kining bag-ong patakaran nakalatid sa Customs Administrative Oder (CAO) nga naglangkob sa mga imported nga produkto nga adunay de minimis value o gamay lamang ang kantidad. (ecb/PIA7-Bohol)
by admin | Oct 12, 2016 | Headlines, Local News / Bohol Balita
TAGBILARAN CITY, October 11 (PIA)–Gisubhan ang pagbukas karong adlawa sa Center for Drug Education and Counseling (CEDEC) nga nahimutang sa Oak Brook Building ning dakbayan.
Kini ang labing unang drug counseling center sa lalawigan nga nagtinguha sa rehabilitasyon sa mga drug users o drug dependents aron makalingkawas sa maong bisyo.
Gipangunahan ni Gob. Edgar Chatto ang pagbukas sa CEDEC nga gitambongan usab sa ubang opisyal sa probinsiya sama ni Department of Health (DOH) Asst. Reg. Dir. Sofia Mancao ug tinugyanan sa Tagbilaran City Host Island Lions Club nga si George Lim.
Gilagdaan ni Chatto ug Lim ang Memorandum of Agreement (MOA) sa paggamit sa Lions Club Oak Brook Building isip center. Ang Lions Club mag-organisa usab og drug information forums isip parte sa ilang socio civic activities.
Ang paglagda sa MOA gisaksihan nilang DOH Asst. Reg. Dir. Sofia Mancao, Provincial Health Officer Dr. Reymoses Cabagnot, Provincial Social Welfare and Development Officer Carmelita Tecson, 302nd Infantry Brigade Commander Col. Arnulfo Matanguihan, Police Provincial Director PSSupt. Felipe Natividad, Board Member Jade Acapulco Bautista, CEDEC head Dr. Yul Lopez, Provincial Administrator Ae Damalerio ug Board Member Victor Balite.
Matud pa ni Chatto nga ang Kagamhanang Probinsiyal, sa tanan niining kahimuan, ni-angkla sa ilang mga programa sama sa drug abuse ug kriminalidad sa pakig-tambayayong sa nagkalain-laing sektor sa pag-rekognisa nga ang isyu sa droga dili lamang ‘police concern’ apan ‘health concern’ usab.
Ang panagtambayayong nga buhat sa CEDEC maglambigit sa suporta sa DOH diin si Dr. Yul Lopez ang manguna kauban sa PHO, OPSWD ug grupo sa Psychiatrist, Psychologist, nurses, mga opisyal sa Social Welfare, ug opisyal sa PNP.
Malaomon si Chatto nga dako kining lakang paingon sa panlantaw nga drug-free ug malinawon nga lalawigan sa Bohol.
Ang CEDEC ang himuong sumbanan alang sa mga centers nga pagatukoron sa mga munisipalidad nga ang tahas mao ang pag-assess sa drug affectation ug pag-determinar sa intervention. (ecb/PIA7-Bohol)
by admin | Oct 11, 2016 | Headlines, Local News / Bohol Balita, Major Events
TAGBILARAN CITY, October 11 (PIA)–Gilusad ning bag-o lang sa Technical Education and Skills Development Authority (TESDA) ang ilang online application alang sa mga interesadong mopahimolos sa ilang scholarship programs ubos sa Technical Vocational Education and Training (TVET).
Matud pa ni TESDA Director General Secretary Guiling Mamondiong, ang pag-apply sa TESDA scholarship online mahimo na karon sulod lamang sa 5-10 minutos.
Ang mga kursong pilian naglakip sa Training for Work Scholarship Program (TWSP), Private Education Student Financial Assistance (PESFA) ug Special Training for Employment Program (STEP).
Giingong ang bag-ong form mahimong paspas ug sayon na lamang pagkuha sa scholarship sa mga aplikante.
Ang mga aplikante kinahanglan lamang mobisita sa TESDA website (www.tesda.gov.ph/Education or Barangay) o e-click lamang ang Online Application sites icon.
Human niini, ang aplikante makadawat og confirmation pinaagi sa e-mail nga may Learner’s ID o e-click lamang ang “barangay kasanayan para sa kabuhayan at kapayapaan”.
Kinahanglang e-submit sa aplikante ang application form ngadto sa ilang TESDA Provincial Offices.
Human makapili sa gustong technical vocational course, ang application form iduso ngadto sa Technological Institutions o private-owned TVET provider.
Human sa pag-proseso sa aplikasyon sa TESDA Provincial Office, ang aplikante makadawat og email nga nagsulod sa impormasyon sa petsa sa training ug lugar sa training institution.
Ang mga aplikante makapili sa gusto nilang pinulongan sa pag-apply online. Mahimo kining English, Pilipino, Visaya ug Ilocano.
Ang online application usa sa mga programa ubos sa Reform and Development Agenda sa TESDA nga gimugna aron pagsiguro nga mahimong sayon lamang ang scholarship application. (ecb/PIA7-Bohol)
by admin | Oct 11, 2016 | Headlines, National News
MANILA, October 11 (PIA)–Nitanyag si Presidente Rodrigo Duterte og P2 mil¬yong ganti sa bisan kinsang makatudlo sa gitawag nga ninja cops nga nag-recycle sa nga nasakmit nga mga shabu.
Gipahibalo kini sa Presidente atol sa iyang pagbisita kagahapon sa Camp Col. Romeo Abendan sa syudad sa Zamboanga nga headquarter sa Philippine National Police Region 9.
Matud pa ni Duterte, makonsiderar nga treason o pagbudhi sa nasod ang ginahimo sa mga gitawag nga ninja cops.
Nagtanyag ang Presidente og P2 milyong ganti sa matag madakpang ninja cop nga ang trabaho mao ang pag-recycle sa mga nasakmit nga shabu ug ibaligya pa sa mga kawatang polis.
Gimanduan niya ang mga polis sa rehiyon 9 nga mokuha og kopya sa listahan sa mga ninja cops aron sikopon na kini.
Apan gipahinumdom usab niya sa mga pulis nga dili gayud mokumpiyansa sa operasyon tungod kay mahimong sila ang mapatay sa mga ares¬tohong ninja cop nga armado usab og pusil.
“Pa ninja ninja pa kayo kunin nyo listahan sa reward na P2 million per head ako special price yan pag pulis imagine pulis yan gumawa ka that’s treason. Basta ninja, pero ang importante nakuha nyo message ko …..wag kayo magkumpyansa ,” dugang pa sa Presidente. (ecb/PIA7-Bohol)
by admin | Oct 11, 2016 | Headlines, National News
MANILA, October 11 (PIA)–Gipahinumdoman ni Department of Interior and Local Government (DILG) Kalihim Ismael Mike Sueno ang tanang mga opisyal sa barangay nga mahimo pa gihapon silang matangtang sa serbisyo sa higayong mapamatud-ang may kalambigitan sa mga ilegal nga aktibidad sama sa ilegal nga droga, korapsyon ug uban pa.
Kini taliwala sa pagsuspinder sa barangay elections sa nasod karong tuig apan gitataw nga matangtang lamang sila kun mapamatud-an sa imbestigasyon ang ilang kalambigitan.
Nipasidaan usab ang Kalihim sa publiko batok sa mga tawong giingong nang-recruit og mga bag-ong opisyal sa barangay sa nasod bugti sa dakong kantidad.
Matud pa ni Sueno, tuyo lamang sa maong mga tawo nga gub-on ang nasudnong kagamhanan ug mangilad aron makakuha og salapi diin ang uban nigamit pa sa iyang pangalan.
Sa higayong mabiktima niining maong modus, ipahibalo kini dayon sa mga otoridad. (ecb/PIA7-Bohol)
