by magnolia_eic | Oct 4, 2010 | Headlines, Local News / Bohol Balita
Hangtud makapasa sa ilang mga sertipiko de kandedatura, dili pa masuta sa mga military dinhi
kon linaw ba ang nag-singabot nga dungan nga piniliay sa Sangguninag Kabataan ug sa barangay.
Matud ni Captain Anshary Pumbaya sa 2nd Special Forces Batallion, mailhan lamang kon unsa
ang dagan sa kahusay ug kalinaw sa piliay kon may magpasa na sa ilang kandidatura. Si Capt.
Pumbaya maoy deputy ni Lt. Col. Romeo Brawner, commanding Officer sa 2nd SF Batallion, ang
pwersa nga gisangonan sa pagpatunay sa kahusay ug kalinaw sa Bohol, uban sa 802nd Brigade.
Magsugod na karong adlawa ang pagduso sa mga papeles sa mga interesado nga molansar sa pagka
opisyal sa barangay ug kini matapos sa Octubre 13 sa tungang gabii, matud ni Atty Eliseo Labaria.
Kadto lamang makapakita nga rehistrado sila sa lugar nga ilang lansaran ug nga nakapuyo silay usa
ka tuig labing menos sa wala pa ang piniliay ang mahimong molansar. Gani, matud ni Atty Labaria,
may gahum ang Board of Election Tellers nga isalikway gilayon ang kandidatura sa usa ka tawo nga
dili makasunod sa lagda sa kinsay mahimong molansar.
Sumpay ni Captain Pumbaya, ang mga ginsakopan sa 2nd SF Batallion may mga 2 ngadto sa tulo ka
pagbisita sa mga kabarangayan nga himoon sa matag semana, ug wala pa silay namatikdang dili
kasarangang kalihukan nga may kalabutan sa nagsingabot nga piniliay. (PIA)
by magnolia_eic | Oct 4, 2010 | Headlines, Local News / Bohol Balita
ANG mga security guards nga magbitbit og armas pag-uli sa panimalay gikan sa trabaho mahimong
makasuhan sa nagpadayon nga gun ban.
Aron segurohon ang linaw ug hapsay nga piniliay sa barangay ug Sangguniang Kabataan karong
Oktubre 25, gipahigayon na sa hiniusang bahan sa kapolisan, COMELEC ug army ang mga
checkpoints kalabot niini.
Matud ni Comelec Provincial Election Supervisor Atty Eliseo Labaria sa Kapihan sa PIA, usa nagdto sa
unom ka tuig ang mahimong silot sa masakpang magbitbit og armas sa panahon sa gunban, ilabi na
sa panahon sa piniliay.
Kay espesyal ang balaod niini, gipasabot ni Labaria nga bisan pag may tukmang papeles ang
nagbitbit sa armas apan wala maapil sa mga gitugotan sa Comelec nga magpatuman sa kahusay
ug kalinaw sama sa mga otoridad, mahimong delikado kon masakpang may armas karon.
Natigum na ang hiniusang bahan sa kapolisan, military ug Comelec aron sabotan ang pamaagi
sa pagpahimutang sa mga checkpoints alang sa maong katuyuan, taho ni Atty Labaria. (PIA)
by boholbalita | Sep 30, 2010 | Headlines, Local News / Bohol Balita
Ulitawo gipusil, iyang likod nabuslot
GRABENG hingsamdan ang usa ka ulitawo human gipusil sa wala mailhing armadong suspetsado samtang nitan-aw og salida sa tv sa ilang pinuy-anan didto sa barangay Upper Cabanictan, Batuan, Bohol niadtong Dominggo sa gabii.
Ang biktima nga si Bernardo Oque, 36 naigo sa iyang likod diin ang bala nilusot ngadto sa iyang kuto-kuto ug daling gidala didto sa Congressman Simeon Toribio Memorial Hospital sa lungsod sa Carmen apan gumikan sa iyang kahimtang, gibalhin sa usa ka tambalanan sa dakbayan sa Tagbilaran.
Nasayran sa taho nga samtang ang biktima nag-inusara sa ilang balay ug nitan-aw og salida sa tv pasado alas 7 sa gabii dihang dunay nilili sa amakan nga bongbong ug kalit lamang kining gipusil sa wa mahibaw-i nga responsable.
Padayon pang gisusi sa kapulisan sa Batuan ang naasoy nga hitabo. (Andy Nalzaro)
by boholbalita | Sep 30, 2010 | Headlines, Local News / Bohol Balita
UPAT ka mga lalaki usa niini minor de edad kinsa maoy gitumbok sa pagpanglungkab sa usa ka delivery truck sa sigarilyo ag gisikop didto sa lungsod sa Valencia niadtong Sabado.
Giila ang mga suspetsado nga sila si Pedro Maglubay Jr., 30, Dindo Furtogakliza, 19, ulitawo, Eric Macalandag, 19, ulitawo ug usa ka Ricky, 17, pulos nagpuyo sa barangay Panas sa maong lungsod.
Sayo niini, usa ka Remigio Suello, usa ka auditor sa Anglo American Tobacco Corporation nitaho sa kapulisan nga gilungkab ang ilang delivery truck niadtong Biyernes sa gabii samtang sila namahulay didto sa Richem Vacation House Lot sa maong dapit.
Matud sa taho nga giguba sa mga suspek ang kandado sa maong sakyanan gamit ang usa ka puthaw ug gikuha ang usa ka karton nga dunay 50 ka ream sa klase-klaseng brand sa sigarilyo nga mokabat ngadto sa P3,000.
Nadakpan ang mga responsable sa gihimong pag-follow-up sa Valencia Police Station pinangoluhan sa ilang hepe nga si Inspector Joseph Villas. (Andy Nalzaro)
by boholbalita | Sep 30, 2010 | Headlines, Local News / Bohol Balita
NEWSBOY sa Bohol Balita aksidenteng nabanggaan og usa ka motorsiklo samtang ang biktima nagmaneho sa iyang bisikleta didto sa barangay West Poblacion, Garcia-Hernandez, Bohol kagahapon sa buntag.
Biktima nailhan nga si Monito Dalen, 33, ulitawo, taga-barangay West Poblacion.
Nasayran sa taho nga samtang ang biktima nagmaneho sa iyang bisikleta mga alas 9 sa buntag aron manuroy og kopya sa BBDN dihang pag-u-turn niini atubangan sa merkado publiko aksidenteng nabanggaan sa usa ka Honda Dream 100 kolor puti nga motorsiklo nga may plaka 7AB-158 nga gimanehoan ni Jovenal Jumawid, 33, minyo ug may backrider nga si Leonilo Jimenez, 52, pulos taga-Sogod, Southern Leyte.
Ang duha ka drayber pulos nakaangkon og mga angol ug daling gihatod sa Guido Lim Hospital didto sa lungsod sa Valencia. (Andy Nalzaro)
by boholbalita | Sep 30, 2010 | Headlines, Local News / Bohol Balita
GIDAKOP sa kapulisan ang usa ka drayber sa usa ka motorsiklo human wala kini mohunong sa gihimong Comelec checkpoint didto sa Poblacion, Lila, Bohol niadtong Lunes sa buntag.
Suspetsado nailhan nga si Alfredo Baliste, 57, minyo, taga-Poblacion, Lila.
Sigun sa taho nga samtang ang ginsakpan sa Lila Police Station nagpahigayon og usa ka Comelec checkpoint sa nasudnong dalan atubangan sa munisipyo sa maong lungsod mga alas 7 sa buntag dihang ang suspetsado kinsa nagsakay og usa ka Rusi MP100 kolor itom nga motorsiklo nga walay plaka gipara ug gipahunong apan wala kini mosunod ug nipaturatoy og padagan.
Gigukod ang maong drayber ug nadakpan ug nahibaw-an nga walay lisensiya sa pagmaneho, walay gisuot nga helmet ug nagsinelas.
Kasong disobedience to persons in authority ang giandam nga ipakasa batok sa maong suspek didto sa piskaliya. (Andy Nalzaro)
