Batang babaye nga gipatay human gilugos, gilubong kagahapon

by boholbalita | Mar 1, 2010 | Local News / Bohol Balita

Amahan sa biktima ug usa ka silingan gilakip nga mga suspek
samtang laing usa wa pa madakpi

GILUBONG kagahapon ang 7-anyos nga batang babaye nga gipatay human gilugos didto sa pinuy-anan sa biktima sa Sitio Calumbangon, barangay Bantolinao, Antequera, Bohol.

Si PO2 Bernard Erojo sa Antequera Police Station nibutyag sa Bohol Balita nga ang patay’ng lawas ni Arriane Kaye Bulig gilubong sa sam-ang nga Katoliko didto sa maong lungsod diin tinambungan kini sa iyang mga kaparyentihan ug mga silingan.

Ang amahan sa biktima nga si Artemio Baldisco mao lamang ang nakakuyog sa paghatud sa patay’ng lawas ni Arriane ngadto sa sementeryo gumikan kay ang iyang inahan atua man sa kaulohan.

Si Baldisco ug ang inahan sa biktima dili kini kasado sigun sa impormasyon sa kapulisan.

Nibutyag usab si Erojo nga si Baldisco gikonsiderar usab nga suspek sa krimen kauban sa unang nadakpan nga si Rogelio Regenado alias Tata, 33, ulitawo ug gipaslak sa bilangguan sa Antequera PNP. Ang laing usa mao ang nisibat nga suspetsado nga si Emilio Panillon, 40-anyos, ulitawo ug silingan sa maong biktima.

Si Panillon nagpabiling wa pa madakpi ug padayon pang gipangita sa mga sakop sa Antequera PNP.

Sayo niini, si Bulig napalgan sa iyang amahan nga walay nay kinabuhi mga alas 6 sa buntag niadtong Huwebes didto sa sud sa iyang lawak.

Sa wala pa mahitabo ang krimen, si Panillon ug Renegado kauban ni Baldisco nag-inom didto sa iyang balay mga alas 9 sa gabii. Si Baldisco nipahayag nga nahubog siya adtong tungora ug nakatulog ug wala na niya mamatngoni ang hitabo.

Dunay mga silingan nakadungog og siyagit sa biktima apan wala kini panumbalinga gumikan sa kadaghang mga bata didto sa palibot.

Sigun sa gihimong pakisusi ni Municipal Health Officer, Dr. Daisy Dabalos nga dunay dakong samad sa likod nga bahin sa ulo ang biktima ug dunay daghang bun-og ang nawong nga malagmit nga gisumbag kini sa suspetsado ug pagkahuman gidakdak ang ulo sa salog nga semento human kini lugosa.

Nahibaw-an usab nga nagkadugo ang kinatawo sa biktima ug dunay hugaw sa lalaki nga nagpamatuod nga gilugos kini.

Ang sperm cell nga nakuha gitakdang isumiter ngadto sa labarotoryo sa Gov. Celestino Gallares Memorial Regional Hospital sa dakbayan sa Tagbilaran aron matino kun kinsa ang nibuhat sa mangilngig nga krimen nga natala sa maong lungsod. (Andy Nalzaro)

13–anyos nga batang lalaki nga biktima sa pagpangidnap, narikober didto sa dakbayan sa Sugbu

by magnolia_eic | Feb 27, 2010 | Local News / Bohol Balita

13-ANYOS nga batang lalaki nga gikatahong gikidnap sa wala mailhing suspetsado didto sa lungsod sa Getafe, narikober sa mga sakop sa Waterfront Police Station didto sa barangay Lahug, dakbayan sa Sugbu niadtong nakalabay nga adlaw.

Biktima nailhan nga si Vic Torreon, usa ka tinun-an ug taga-Sitio Cogon, barangay Poblacion, Getafe, Bohol.

Sigun sa taho nga ang biktima napalgan sa mga sakop sa Waterfront Police mga alas 5 sa hapon niadtong Miyerkulis hinungdan nga gitawagan ang Getafe Police Station kabahin sa gipuy-an niini.

Nahibaw-an sa Getafe PNP nga ang amahan sa biktima mao si Anecito Torreon kinsa nitaho nga ang iyang anak napakyas sa pagpauli sa ilang pinuy-anan human nieskuwela niadtong nakalabay nga Martes.

Giubanan ni PO3 Vicente Ortiz Jr. sa Getafe PNP ang amahan sa bata aron pagakuhaon ang biktima didto sa natumbok nga dapit. (Andy Nalzaro)

Kolektor sa lending gitulis sa 2 ka armadong lalaki nagtabon og bonnet didto sa lungsod sa Carmen-P24 mil nga koleksiyon gidala

by magnolia_eic | Feb 27, 2010 | Local News / Bohol Balita

KOLEKTOR sa usa ka kompaniya sa lending gitulis ug nakuhaan og dakong kantidad sa salapi sa duha ka wala mailhing armadong lalaki nga pulos nagtabon og bonnet sa ilang mga nawong didto sa Sitio Himataw, baragay Guadalupe, Carmen, Bohol niadtong Miyerkulis sa buntag.

Biktima nailhan nga si Germi Duque, 28-anyos, minyo, kolektor sa Card Lending Inc. ug nagpuyo sa barangay Poblacion Sur sa samang lungsod.

Nahitabo ang insidente mga alas 11:45 sa buntag samtang ang biktima nipahigayon og usa ka lecture ug nangolekta og mga utang sa mga sakop sa maong kompaniya.

Matud sa taho nga samtang ang biktima nagsakay sa iyang motorsiklo padulong ngadto sa ilang buhatan dihang nidistansiya na og tunga sa kilometro gikan sa iyang gikolektahan, duha ka wala mailhing lalaki nga nagtabon og bonnet sa ilang mga nawong kalit nga niatang kaniya ug gitionan sa wala matino nga kalibre sa armas ug giilog ang iyang handbag nga may sulod nga salapi nga moabot ngadto sa P24,000.

Nisibat ang mga tulisan agi sa kabasakan sa maong dapit.

Mga sakop sa Carmen Police Station kinsa nakadawat sa alarma sa hitabo, nirespondi sa natumbok nga lugar apan wala na nila maabti ang mga gikatahapan. (Andy Nalzaro)

Gidudahang tigpayuhot og shabu dakpan, daghang shabu ug armas nakuha

by magnolia_eic | Feb 27, 2010 | Local News / Bohol Balita

NAKAISKOR na usab ang kapulisan human usa ka gidudahang tigpayuhot sa ilegal nga drugang shabu nadakpan ug nakuhaan og daghang shabu ug mga armas sa gihimong ronda sa balay sa suspetsado didto sa dalan Pamaong, barangay Cogon, dakbayan sa Tagbilaran kagahapon sa buntag.

Giila ang suspetsado nga si Jessie Estonina, 30-anyos.

Nasayran sa taho nga ang mga hiniusang sakop sa Criminal Investigation and Detection Team kun CIDT-Bohol, Philippine Drug Enforcement Agency (PDEA-Bohol) ug Tagbilaran City Police Station pinangoluhan ni Chief Inspector Germano Mallari, hepe sa CIDT-Bohol nipahigayon og usa ka ronda sa pinuy-anan ni Estonina mga alas 8:30 sa buntag pinasikad sa duha ka search warrant nga giisyo ni Maghuhukom Fernando Fuentes III sa Regional Trial Court Branch 49 nga nakabase sa siyudad.

Nasakmit gikan sa balay sa maong suspetsado mao ang usa ka dakong bolto nga gituohang dunay shabu, lang upat ka sachet nga gituohang dunay shabu, mga shabu paraphernalia ug salapi nga mobalor og P200 nga gituohan nga halin sa ilegal nga druga.

Lakip nga nabawi mao ang usa ka kalibre .22 magnum rebolber nga pistola nga may serial numbers 25687, tulo ka buhing bala alang sa kalibre .22 magnum, usa ka kalibre .45 Armscor nga pistola nga may usa ka magasin ug 12 ka mga buhing bala.

Ang natumbok nga suspek gidala ug gikustodiya sa buhatan sa CIDT-Bohol didto sa Kampo Dagohoy samtang tukmang sumbong giandam aron ipasaka batok kaniya. (Andy Nalzaro)

Dalaga nga may suliran sa pangisip gilugos-suspetsado dakpan

by magnolia_eic | Feb 27, 2010 | Local News / Bohol Balita

Usa ka 21-anyos nga dalaga nga giingong may suliran sa pangisip gilugos sa usa ka ulitawo sa usa ka dapit sa dakbayan sa Tagbilaran human gipasakay ang biktima sa suspetsado sa motorsiklo niini didto sa lungsod sa Maribojoc niadtong Martes sa gabii.

Ang suspetsado nga giila nga si Adelo Acero, 38-anyos, nagpuyo sa barangay San Roque, Maribojoc, Bohol nadakpan sa gihimong operasyon sa kapulisan niadtong nakalabay nga gabii.

Sigun sa taho nga ang biktima nga taguon lamang sa ngalan nga Trixie gikatahong gipasakay sa suspetsado sa iyang motorsiklo ug gidala sa usa ka lugar sa siyudad diin ang biktima gipahimuslan. Human sa nahitabo, gidala pagbalik ang biktima ug giuli sa natumbok nga suspetsado didto sa pinuy-anan niini. Apan nagduda ang iyang inahan nga gilugos ang iyang anak hinungdan nga nagpatabang kini sa mga sakop sa Maribojoc Police Station.

Sila si SPO2 Teodoro Arais ug PO3 Edilberto Calipes kinuyugan ni Konsehal Gomersendo Arocha nihimo sa pag-follow-up nga niresulta sa pagkasikop sa maong suspek.

Sa wala pa mahitabo ang insidente, gi-report sa mga ginikanan ang pagkawala sa maong biktima niadtong Martes sa alas 6 sa gabii.

Gipailalom sa medical examination ang maong biktima samtang gitugyan ang kaso didto sa Tagbilaran City Police Station. (Andy Nalzaro)