by admin | Sep 14, 2016 | Headlines, Health and Medicine, Major Events
TAGBILARAN CITY, September 14 (PIA)–Opisyal nang gilusad kagahapon sa Holy Name University (HNU) ang Janssen Radio o DYJR 106.5 FM.
Gipasabot ni Fr. Ruel Lero, SVD, Vice President for Academic Affairs nga namugna ang paghingan niini sa DYJR Janseen Radio isip pasidunggog sa founder sa Society of the Divine Word (SVD) nga si St. Arnold Janssen.
Katuyoan niining bag-ong radio station ang pag-edukar sa mga tinun-an sa HNU ug maghatag og kalidad nga impormasyon lakip na ang kalingawan samtang mag-prodyus og maabtikon nga mga tinun-an sa Communication nga mamahimong media practitioners sa umaabot.
Isip ika-limang campus radio station nga gipadagan sa SVD sa tibuok nasod, ang Janssen Radio nisubay sa misyon ni St. Arnold Janssen nga mamahimong saksi sa pulong ug mensahiro sa ebanghelisasyon.
Gi-bendisyonan mismo ni HNU President Fr. Francisco Estepa, SVD ang lawak sa DYJR nga nahimutang sa 5th Floor, Scanion Building sa HNU, Janssen Heights, distrito sa Dampas, ning dakbayan.
Pormal kining napaminaw sa kahanginan niadtong adlawa, Setyembre 13 sa buntag.
Gipasalamatan ni Fr. Estepa ang tanang mitambong ug sa mga nihimo sa maong paglusad nga malamposon.
Ang maong paglusad gitambongan nila Tagbilaran City Mayor John Geesnell Yap, Bohol Chronicle Radio Corp. General Manager and President, Peter Dejaresco ug Word Broadcasting Corporation Chairman of the Board, Fr. Eduardo Rocha, SVD.
Gitambongan usab kini sa mga tinugyanan sa National Telecommunications Commission (NTC), HNU administration ug lakip na ang mga faculty ug estudyante. (ecb/PIA7-Bohol)
by admin | Sep 6, 2016 | Headlines, Major Events, National News
MANILA, September 6 (PIA)–Gilagdaan na ni Presidente Rodrigo Duterte ang proklamasyon nga nagdeklarar og “state of lawless violence” sa tibuok nasod sa wala pa kini nibiya paingon sa Vientiane, Laos aron motambong sa ASEAN Summit.
Ubos sa maong proklamasyon, gitahasan ang Armed Forces of the Philippines (AFP) ug Philippine National Police (PNP) sa paghimo og tukmang aksyon aron pugngan ang tanang matang sa lawless violence sa Mindanao ug aron mapugngan ang pagkatap sa lawless violence sa ubang parte sa nasod nga adunay konsiderasyon sa sibil ug politikanhong katungod ug sa gilatid sa Konstitusyon.
Giingong kun makita na sa Presidente nga luwas na ang tibuok nasod, maghimo na usab kini og proklamasyon aron bakwion kini.
Matud pa ni Executive Secretary Salvador Medialdea Jr., gilagdaan sa Presidente ang maong proklamasyon human sa nahitabong pagpamomba sa syudad sa Davao niadtong Biyernes sa gabii.
Gitataw usab ni Medialdea nga walay ipatuman nga “curfew” sa tibuok nasod samtang gipatuman ang state of lawless violence apan magpahigayon og mga checkpoints ang militar ug polisya sa tibuok nasod. (ecb/PIA7-Bohol)
by admin | Sep 5, 2016 | Headlines, Major Events, National News
MANILA, September 5 (PIA)–Gipagawas sa Malakanyang ning bag-o lang ang duha ka bersyon sa anti-drug advertisement niini.
Matud pa ni Presidential Communications Office (PCO) Kalihim Martin Andanar, tuyo sa maong advertisement nga makuha ang atensyon sa matag pamilyang Pilipino aron makalikay sa paggamit sa ilegal nga droga.
May duha ka bersyon ang advertisement, ang una kalabot sa usa ka amahan nga nagumon sa ginadili nga droga diin gipakita ang daghang mahinungdanong kahigayonan nga wala niya nakauban ang iyang pamilya.
Samtang ang ikaduha nga bersyon usab kalabot sa usa ka inahang Overseas Filipino Worker (OFW) nga perting paningkamot og trabaho sa ubang nasod, samtang ang iyang anak sa Pilipinas tiggamitan sa ilegal nga droga.
Kapin sa duha ka minuto ang full version sa duha ka advertisements ug si Brillante Mendoza ang director niini.
Ang maong mga TV ads makita sa mga TV stations ug mga sinehan sa tibuok nasod. (ecb/PIA7-Bohol)
by admin | Sep 2, 2016 | Headlines, Local News / Bohol Balita, Major Events
TAGBILARAN CITY, September 2 (PIA)–Sa tinguhang madasig sa pagkaon og brown rice ug mas mapalapdan pa ang impormasyon ka¬bahin niini, usa ka kampanya ang gilusad sa Department of Agriculture (DA) 7.
Gilusad ning bag-o lang sa DA ang BROWN4good challenge aron mapakatap ang kaayo nga mahatag sa maong klase nga bugas sa lawas sa tawo.
Pinaagi sa paggamit sa hashtag nga #BROWN4good challenge diin matag kaon og luto nga brown rice, i-post kini sa mga nagkadaiyang social networking sites sama sa Facebook, Twitter o Instagram.
Sa matag hashtag, kinahanglang ubanan og hashtag kun asa nga rehiyon tungod kay sa matag post, adunay usa ka cup nga brown rice ang idonar sa charitable institutions nga mapilian.
Gawas sa pag-post sa #BROWN4good #Region, kinahanglan usab i-tag ang mga kaila o higala sa social networking site aron moabot sa target nga hashtag.
Itandi sa naandan nga kan-on, giingong mas daghang makuhang kaayohan gikan sa brown rice sama sa mas taas kini og prutina, lanot, bitamina, mi¬nerals ug antioxidant.
Makatabang usab ang brown rice sa pagpaubos sa timbang, pagpaubos sa cholesterol, ug mas maayo usab kini sa mga diabetic tungod kay hinay ang pag-release niini sa sugar.
Matud pa ni DA 7 regional technical director Joel Elumba, ila usab gilusad ang upat ka kaayohan kun mokaon og brown rice diin naglakip sa kaayohan niini alang sa lawas, alang sa nasod, alang sa mag-uuma ug alang sa mga kabus.
Gipasalig ni Elumba nga aduna sila’y igong suplay sa brown rice nga gikan sa Bohol Rice Processing Complex nga nahimutang sa lungsod sa Pilar ug tinguha nila karon nga adunay mga center nga mapalitan sa katawhan sa dakbayan sa Sugbo ug mga silingang mga lugar. (ecb/PIA7-Bohol)
by admin | Sep 1, 2016 | Headlines, Major Events, National News
MANILA, September 1 (PIA)–Gisugat ni Presidente Rodrigo Duterte sa Ninoy Aquino International Airport (NAIA) Terminal 2 kagahapon ang mga overseas Filipino workers (OFW) nga na-repatriate gikan sa Saudi Arabia human sila nawad-on og mga trabaho.
Nasulod na usab karon sa Pantawid Pamilyang Pilipino Program o 4Ps ang maong 128 ka OFWs nga nawad-an og trabaho sa al Khobar Saudi Arabia.
Matud pa sa Presidente, kini aron makalabang ang mga OFWs sa pang adlaw-adlaw nila nga panginabuhi.
Ubos sa 4Ps, makadawat og pinansyal nga ayuda ang pamilyang benepisyaryo depende na usab sa gidaghanon sa mga anak nga nagtungha gikan elementarya hangtud high school.
Gawas sa 4Ps, gihatagan usab ni Presidente Duterte ang mga OFWs nga nawad-an og trabaho og tag-P5,000 ug gi-angkon na usab niini ang pagpatungha sa ilang mga anak.
Gihangyo usab sa Presidente ang mga gipapauling OFWs sa dili pagsulod sa ilegal nga buhat sama sa droga kay matud pa niini, gub-on lang sa droga ang ilang kinabuhi ug mahimo pa kining ikamatay nila sama sa ubang drug suspek nga gipatay sa kauban lang usab nila sa negosyo sa ilegal nga droga. (ecb/PIA7-Bohol)
by admin | Aug 30, 2016 | Headlines, Major Events, National News
MANILA, August 30 (PIA)–Gibuksan na sa Philippine National Police (PNP) ang ilang text hotline alang sa mga mohatag og impormasyon kalabot sa mga giingong “ninja cops” kun polis nga tig-recycle og mga droga ug protetor sa mga sindikato sa ilegal nga droga.
Matud pa sa tigpamaba sa PNP nga si S/Supt. Dionardo Carlos, 24/7 nga bukas o 24-oras matag aldaw sulod sa usa ka semana ang ilang PNP text hotline 09178475757 aron modawat ug mo-proseso sa mga confidential information gikan sa publiko.
Giseguro sa PNP nga ang tanang ihatag nga impormasyon ilang e-konsiderar nga “confidential” ug ipaubos sa makuting validation procedures.
Sa iyang mensahe atol sa pagtimaan sa National Heroes Day kagahapon sa Libingan ng mga Bayani, gipahibalo ni Presidente Rodrigo Duterte ang paghatag og P2 milyong reward matag ulo sa makahatag og kasayuran sa mga gitawag nga “ninja cops” isip parte sa kampanya sa gobyerno aron padayon nang maguba ang apparatus sa ilegal nga droga sa nasod.
Dungan niini, gi-awhag sa PNP ang publiko nga suportahan ang ilang kampanya aron padayon nang mahinlo ang PNP sa mga anomaluso ug nalambigit sa ilegal nga droga. (ecb/PIA7-Bohol)
