by admin | Jan 29, 2016 | Headlines, Local News / Bohol Balita, Major Events
BOHOL, Jan. 29 (PIA)–Makadawat ang mga magtutudlo nga mo-alagad isip Board of Election Inspectors (BEIs) gikan sa Commission on Elections (Comelec) og dugang P2,000 nga allowance.
Kini matud pa ni Comelec Chairman Andres Bautista diin ang maong dugang insentibo giingong gamiton sa mga magtutudlo alang sa training human sa paglagda sa ahensiya sa memorandum of agreement sa Department of Science and Technology (DOST) ug Department of Education (DepEd).
Nalakip sa maong kantidad ang travel allowance ug uban pang galastohon sa magtutudlo sa training nga magsugod sa Marso.
Gibanabanang mokabat sa 300,000 ang gidaghanon sa mga magtutudlo nga mo-alagad isip BEIs sa piniliay sa Mayo 9, 2016.
Samtang giseguro usab sa Comelec nga igo ang mga magtutudlo nga mo-alagad isip BEIs sa umaabot nga piniliay.
Naa sa 630,000 ang gidaghanon sa mga magtutudlo sa DepEd sa tibuok nasud apan kinatibuk-ang 300,000 lamang ang kinahanglanon alang sa umaabot nga piniliay. (ecb/PIA7-Bohol)
by admin | Jan 28, 2016 | Headlines, Major Events, National News
MANILA, Jan. 28 (PIA)–Giseguro sa pamunuan sa Bangko Sentral ng Pilipinas (BSP) nga ampingan nila ang source code alang sa piniliay sa Mayo 9, 2016 human kini gi-deposito sa Commission on Elections (Comelec).
Matud pa ni Deputy Governor Vicente Aquino, ilang ampingan ang source code alang sa kahapsay ug kredibilidad sa eleksyon ug ang Comelec lamang ang maka-abri niini gikan sa safety vault.
Giingong gawas sa mga padlock, hugot usab ang pagbantay sa lawak nga gibutangan niini hangtud sa panahon sa eleksiyon.
Matud pa nga mahimong kuhaon sa Comelec ang maong source code kun may ipahigayong review ug imbestigasyon. (ecb/PIA7-Bohol)
by admin | Jan 28, 2016 | Headlines, Local News / Bohol Balita, Major Events
BOHOL, Jan. 28 (PIA)–Midaus-os sa ika-10 nga pwesto ang Pilipinas sa 2015 Corruption Perceptions Index (CPI) nga gipagawas sa Berlin-based Transparency International (TI) kagahapon.
Mi-ubos karon sa ika-95 nga pwesto gikan sa kanhi ika-85 ang Pilipinas human nahulog sa 35 ang corruption index sa nasud gikan sa kanhi 38 niadtong 2014.
Mas ubos kini kun itandi sa Indonesia nga naa sa ika-88 nga pwesto samtang ang Singapore ika-8.
Sa tibuok sidlakang Asya, ang Pilipinas ug Malaysia ang migawas nga mas nahimong corrupt karong tuig.
Nalabwan sa Pilipinas ning tuiga ang Vietnam nga naa sa ika-112 nga pwesto; Laos, ika- 139; Myanmar, ika-147; ug Cambodia, ika-150.
Samtang ang 5 least corrupt nga mga nasud sa tibuok kalibotan mao ang Denmark, Finland, Sweden, New Zealand ug Netherlands.
Matud pa sa Chairman sa Transparency International nga si Jose Ugaz, masolusyonan lamang ang korapsiyon kun magtinabangay ang katawhan ug ang gobyerno sa pagsumpo sa maong problema.
Apan gipahayag ni Presidential Communications O¬perations Office (PCOO) Kalihim Herminio Coloma Jr., nga ipadayon sa administrasyong Aquino ang ilang kampanya batok sa korapsiyon hangtud mahuman ang termino ni PNoy . (ecb/PIA7-Bohol)
by admin | Jan 27, 2016 | Headlines, Major Events, National News
MANILA, Jan. 27 (PIA)–Nakaalerto na ang Department of Health (DOH) aron pugngan ang pagsulod sa nasud sa zika virus nga mikatap karon sa Latin Amerika.
Matud pa ni Dr. Lyndon Le Suy, tigpamaba sa DOH nga mokatap ang maong sakit pinaagi sa pinaakan sa lamok ug ang sintomas sa virus mao ang hilanat, trangkaso ug rashes.
Susamang lamok ra kini nga nagdala usab sa dengue ug chikungunya virus apan grabeng maapektuhan niini ang mga nagsabak.
Kini ang hinungdan mao nga susamang sistema ra usab aron makontrol ang dengue ug chikungunya ang ilang gamiton aron mapugngan ang zika virus sama sa pagpabilin sa kahinlo ug pagpanglimpyo sa palibot.
Niadtong tuig 2012, nakatala ang DOH og usa ka kaso sa zika virus sa nasud apan wala na kini nadugangi sukad kaniadto.
Giingong ang naapektuhang buntis sa zika virus nihimugso og puya nga mas gamay ang ulo sa normal nga bata.
Wala pay bakunang nadiskubre alang sa maong sakit. (ecb/PIA7-Bohol)
by admin | Jan 27, 2016 | Headlines, Major Events, National News
MANILA, Jan. 27 (PIA)–Nangandam na ang Department of Labor and Employment (DOLE) sa posibleng epekto sa mga Overseas Filipino Workers (OFWs) sa pagsadsad sa presyo sa lana sa Tunga-tungang Sidlakan.
Human kini sa pagkumpirmar sa Philippine Association of Service Exporters, Inc. (PASEI) nga nagsugod na og panaktak og kawani ang pipila ka kumpanya didto human sa paghinay sa ekonomiya sa Saudi Arabia ug Qatar.
Matud pa ni DOLE Kalihim Rosalinda Baldoz, nakig-alayon na sila sa nagkalain-laing grupo aron mahibaw-an ang kahimtang sa mga OFW ug matino kun unsa ang mahimong itabang kanila human mihinay ang ekonomiya sa mga nasud nga producer og lana.
Giingong andam ang gobyerno nga tabangan ang mga OFWs alang sa ilang repatriation kun mataktak sa trabaho ug hatagan og bag-ong trabaho dinhi sa Pilipinas depende sa job opportunity sa ilang lugar.
Gawas sa pagsadsad sa presyo sa petrolyo, gidunganan pa kini sa paghinay sa ekonomiya sa China, pagbaton og kaugalingong supply sa lana sa Estados Unidos ug pagtangtang sa export ban sa Iran mao nga sobra na karon ang supply sa lana didto.
Gibanabanang kapin sa 1 ka milyon ang mga trabahanteng Pinoy ang nagtrabaho sa Tunga-tungang Sidlakan. (ecb/PIA7-Bohol)
by admin | Jan 27, 2016 | Headlines, Local News / Bohol Balita, Major Events
BOHOL, Jan. 27 (PIA)–Gikan sa unang gitakdang petsa nga Pebrero 1, gi-irog na usab sa Commission on Elections (COMELEC) sa Pebrero 8 ang pag-imprenta sa mga balotang gamiton sa piniliay sa Mayo 9.
Matud pa ni COMELEC Commissioner Christian Robert Lim, mao na kini ang pinaka-pinal ug katapusang pag-oktaba sa pag-imprenta ug kun may mo-apelar pang i-irog kini, giingong angay andam silang i-oktaba na usab ang mismong petsa sa eleksyon.
Ang unang petsang target sa COMELEC alang sa pag-imprenta sa balota gitakda niadtong Enero 26, apan gi-irog kini sa en banc sa Pebrero 1 tungod kay kinahanglan pang isa-pinal ang listahan sa mga kandidato.
Matud pa usab ni COMELEC Chair Andres Bautista, ang desisyon sa pagpa-irog sa petsa bunga sa nahimong diskusyon ug gi-konsiderar usab nila ang pipila pa ka mga nag-ungot nga kaso batok sa ubang mga kandidato.
Gipasabot ni Lim nga sa Peb. 1 na unta nila ipagawas ang pinal nga listahan, apan mibotar ang en banc nga i-irog na lang kini sa Peb. 8.
Kini usab, matud pa isip pagtubag sa panawagan sa pipila aron dili sila mapasanginlang mi-bulilyaso sa kandidatura sa pila ka partikular nga politiko o kaha mi-pabor sa uban.
Kahinumdoman nga naa sa deliberasyon pa sa Korte Suprema ang disqualification cases batok kang presidential candidate Sen. Grace Poe, samtang nag-ungot pa sa COMELEC ang mga kasong diskwalipikasyon usab batok sa usa pa ka kandidato sa pagka-presidente nga si Mayor Rodrigo Duterte.
Gitataw ni Bautista nga bisan unsa man ang mahimong desisyon sa maong mga kaso, magpabilin ang ilang desisyon.
Apan gi-angkon ni Bautista ug Lim nga nanghinaot sila nga sayong maresolba ang mga kaso batok kang Poe aron makatabang sa ilang pagsa-pinal sa listahan sa mga kandidato. (ecb/PIA7-Bohol)
