by admin | Jan 14, 2016 | Major Events, National News
MANILA, Jan. 14 (PIA)–Gipahibalo sa pipila ka ahensiya sa gobyerno ang liboang trabaho nga buksan duha ka bulan sa dili pa magsugod ang election ban sa hiring o appointment sa employees.
Nipahibalo ang Department of Health (DoH) nga plano nilang mang-hire og 21,000 doctors ug uban pang health workers karong tuig.
Matud pa ni Mary Ruth Politico, planning ug standards division medical officer sa DoH nga nanginahanglan pa ang ilang ahensiya og mga doctor, nurses, dentists ug medical technologists nga e-deploy sa mga government-run health facilities sa tibuok nasud.
Gawas sa DoH, mang-hire usab og empleyado and Department of Education (DepEd), Department of Social Welfare and Development (DSWD), Department of Finance (DoF), Department of Transportation and Communication (DOTC) ug ang Public Private Partnership Center.
Ang DepEd giingong nanginahanglan og mga abogado samtang ang DoE nanginahanglan og administrative officers.
Ang ubang ahensiya usab nanginahanglan og mga engineers, planning officers, information system analysts, economists, financial analysts, information officers, accountants ug clerks.
Ning bag-o lang, ang DepEd, DSWD, DoF-BLGF, DOTC, ug PPPC nakig-kumbuya sa Kalibrr, usa ka job-matching online platform aron mapausbaw ang recruitment ug contracting services sa maong mga ahensiya.
Sa Kalibrr, makita ang mga espisipkong bakanteng posisyon nga gibuksan sa maong mga ahensiya sa gobyerno. (ecb/PIA7-Bohol)
by admin | Jan 12, 2016 | Major Events, National News
MANILA, Jan. 12 (PIA)–May gibanabanang 2.6 mil¬yong pamilya ang nakasinati og gutom sa katapusang kwarter sa tuig 2015, matud pa sa survey sa Social Weather Station (SWS).
Apan kining gidaghanona mao ang pinaka-ubos sa milabay nga napulog-usa ka tuig.
Sa gipahigayong survey sa SWS sa 1,200 ka hamtong sa tibuok nasud niadtong Dis¬yembre 5-8, 2015, 11.7% sa respondents o kapareho sa 2.6 milyong pamilya ang miingon’g nakasinati sila nga wala mokaon bisan kausa sulod sa tulo ka buwan.
Kining gidaghanon mas ubos kun itandi sa 15.7% o 3.5 milyong pamilya niadtong Setyembre 2015.
Sa tibuok tuig sa 2015, ang ave¬rage hunger rate naa sa 13.4%, ubos og 4.9% kun itandi sa average niadtong 2014 nga 18.3%.
Kini na ang pinaka-ubos nga gidaghanon sa pa¬milyang gigutom niadtong 2004 diin ang average naa sa 11.8%.
Nunot niini, nanghinaot ang Malakanyang nga mas moubos pa ang gidaghanon sa pamilyang makasinati og gutom karong tuiga tungod kay dakung pahat sa P 3.002 trilyong budget ang nakareserba aron ma-solus¬yonan ang problema sa kakabos ug pagkagutom.
“Government is determined to sustain the gains achieved in terms of addressing poverty and hunger. That is why the biggest slice of the 2016 budget was allotted to social protection and human development,” matud pa ni Presidential Communications O¬perations Office (PCOO) Kalihim Herminio Coloma Jr. (ecb/PIA7-Bohol)
by admin | Jan 12, 2016 | Major Events, National News
MANILA, Jan. 12 (PIA)–Walay nakitang dautan ang Commission on Elections (Comelec) kun mokuha og video ang mga motorista sa pagpahigayon og checkpoint dungan sa pagpatuman sa election gun ban sa tibuok nasud.
Matud pa ni Comelec Chairman Andres Bautista, mahimong kuhaan og video sa bisan kinsang motorista ang himuong pang-inspeksyon sa mga polis sa ilang mga sakyanan nga ipahunong sa mga gibutangan og checkpoints sa Philippine National Police (PNP) ug Armed Forces of the Philippines (AFP).
Gipasabot ni Bautista nga tuyo lamang niini nga masigurong dili ma among-amongan ang tawhanong katungod sa bisan kinsang motorista batok sa mga abusadong polis ug militar.
Dungan niini, nanawagan usab si Bautista sa publiko ug sa mga motorista nga ipaabot dayon sa Comelec ang bisan unsang reklamo kun nabatyagan nilang may nalapas sa ilang tawhanong katunod ang mga polis sa pagpahigayon og checkpoint.
Apan gipasabot usab sa Comelec Chair nga angay usab mosunod ang mga motorista sa gitakdang balaod nga election gun ban. (ecb/PIA7-Bohol)
by admin | Jan 11, 2016 | Local News / Bohol Balita, Major Events
TAGBILARAN CITY, Jan. 11 (PIA)–Ang P6.5-bilyong proyekto sa nasudnong kagamhanan nga Konkreto at Ayos na Lansangan at Daan Tungo sa Pangkalahatang Kaunlaran (KALSADA) gilusad sa Bohol niadtong Enero 8, 2016.
Si Department of Public Works and Highways (DPWH) Kalihim Rogelio Singson nitunol sa kapsula ngadto kang Bohol Gob. Edgar Chatto, sa usa ka ‘symbolic turn-over’ atol sa paglusad sa KALSADA Program niadtong Biyernes nga gipahigayon sa Bohol Tropics Resort, ning dakbayan.
Kauban ni Singson sila Department of Budget and Management (DBM) Kalihim Butch Abad, Department of Interior and Local Government (DILG) Kalihim Mel Senen Sarmiento, Department of Social Welfare and Development (DSWD) Kalihim Dinky Soliman ug Department of Health (DOH) Kalihim Janette Garin.
Si Singson sa iyang keynote message mipadayag sa pasalig sa DPWH sa pag-usbaw sa kalidad ug kahilwasan sa mga nasudnong dalan ug tulay ug dugangan ang puhunan sa imprastraktura gikan sa ubos pa sa 2% sa gross domestic product sa 2010 ngadto sa 5% sa 2016.
Samtang matud pa sa Kalihim sa DBM, ang paglusad sa maong programa makahulogan ug makasaysayan tungod kay nagpadayag kini sa pasalig sa nasudnong kagamhanan sa inisyatiba niining ‘good governance’ nga maghatag og katakos sa gobyerno sa pagbuhat og mas maayo sa paghatud ug serbisyo.
Gidayeg ni Abad ang inisyatiba sa Bohol ug nitumbok kang Chatto isip kampeyon sa KALSADA program.
Gisunod sa ekspirinsiya sa Bohol, usa kini ka programa nga mo-rehabilitate ug upgrade sa kadalanan sa mga lalawigan ug ibalhin kining mga kabtangan’g kalsada permanente na ngadto sa provincial government nga mao nay mo-mintinar niini.
Paga-ugmaron usab niini ang Provincial Road Network Development Plan alang sa matag probinsiya ug ang pagdasig sa paggamit sa online open data portal isip mekanismo alang sa monitoring ug evaluation sa mga kadalanan sa probinsiya. (ecb/PIA7-Bohol)
by admin | Jan 11, 2016 | Major Events, National News
MANILA, Jan. 11 (PIA)–Dobleng silot ang atubangon sa bisan kinsang molapas sa gipatuman na karon sa Commission on Elections (Comelec) nga gun ban.
Matud pa ni Department of Interior and Local Government (DILG) Kalihim Mel Senen Sarmiento, base sa iyang pakig-alayon sa Comelec, mogawas nga duha ang posibleng atubangon nga kaso sa mga molapas niini.
Kini ang illegal possession ug ang usa ang violation sa gun ban nga nalakip sa omnibus election code.
Dugang pa sa Kalihim, may unom ka bulan hangtud sa unom ka tuig nga pagkabilanggo ang atubangon sa molapas niini.
Mao nga pahinumdom ni Sarmiento sa mga gun owners nga naanad na og bitbit sa ilang mga pusil nga mokuha una og exemption sa Comelec. (ecb/PIA7-Bohol)
by admin | Jan 11, 2016 | Major Events, National News
MANILA, Jan. 11 (PIA)–Nipasidaan sa publiko ang Department of Health (DOH) ug Department of Trade and Industry (DTI) sa mga ginikanan batok sa pagpalit og ‘hoverboard’ alang sa ilang mga anak nga may edad 14-anyos paubos tungod sa peligro ug disgrasyang mahimong ihatag niini sa ilang mga anak.
Nakabutang sa joint advisory nga gi-isyu sa DOH ug DTI, posibleng may dalang peligro sa mga bata ang hoverboard tungod kay nagtangag kini og baterya nga taas ang boltahe nga mokabat sa 36-volt o mas taas pang boltahe.
Lapas na kini sa gitakdang 24 volts nga baterya sa mga electronic toys, aron na usab masiguro ang kahilwasan sa mga bata.
Giingong mahimo usab maka-aksidente ang hoverboard sa mga bata tungod sa ‘unsteady driving position’ niini ug lisud kontrolon ug balansehon nga board.
Una na usab gidili ang pagdala sa mga hoverboard sa pagsakay sa eroplano tungod sa lithium battery niini nga mahimong mag-overheat ug mahimong hinungdan sa sunog ug pagboto.
Matud pa sa DOH ug DTI, sa Estados Unidos nakatala na og pagdaghan sa hoverboard-related injuries niadtong Agosto, 2015 diin apil na niini ang fractures, strains, sprains, contusions, lacerations ug head injuries. (ecb/PIA7-Bohol)
