by admin | Dec 23, 2016 | Edukasyon Updates, Headlines, Malakanyang Updates, National News
MANILA, December 23 (PIA)–Gilagdaan na kagahapon ni Presidente Rodrigo Duterte ang Republic Act 10924 o ang General Appropriations Act nga nagkantidad og P3.35 trilyon.
Sama sa nahisulod sa atong Batakang Balaod, makakuha ang Department of Education (DepEd) sa pinakadakong pondo nga nagkantidad og P544.1 bilyon.
Sa iyang pahayag human gilagdaan ang 2017 National Budget, miingon ang Presidente nga makonsiderar nga “golden age of infrastructure” ang sunod tuig diin naggahin ang administrasyon og P454.7 bilyon nga pondo alang sa Department of Public Works and Highways (DPWH).
Daghan usab og mga proyekto ang gobyerno aron makuhaan ang gibug-aton sa dagan sa trapiko mao nga naggahin kini og P53.3 bilyon nga budget alang sa Department of Transportation (DOTr).
Dako usab ang gigahing pondo alang sa mga State Universities and Colleges nga mokabat sa P58.7 bilyon samtang P18.7 bilyon usab ang alang sa Commission on Higher Education (CHED).
Giseguro usab sa Presidente nga padayon ang kampanya sa gobyerno batok sa ilegal nga droga mao nga gipasakaan ang pondo sa Department of Interior and Local Government (DILG) sa P148 bilyon.
Ang Department of National Defense (DND) usab adunay pondo sa 2017 nga mokabat sa P137 bilyon.
Gibalik usab sa gobyerno ang health care program sa mga kalongsoran mao nga adunay budget ang Department of Health (DOH) nga mokabat sa P96 bilyon.
Aron mas maalagaran ang mas daghang kabos nga Pinoy, naggahin ang gobyerno og P53.2 bilyon alang sa Philhealth.
Giseguro usab sa Presidente nga magsilbing pro-people, pro-investment, pro-growth ug pro-development ang pondo sa iyang administrasyon alang sa 2017. (ecb/PIA7-Bohol)
by admin | Dec 22, 2016 | Headlines, Malakanyang Updates, National News
MANILA, December 22 (PIA)–Gipagawas na sa Bangko Sentral ng Pilipinas (BSP) ang mokabat sa P8.25 bilyong kantidad sa mga bag-ong salaping papel nga may lagda ni Presidente Rodrigo Duterte.
Matud pa ni BSP Deputy Governor Diwa Guinigundo, nagpagawas sila og 100 boxes nga adunay sulod nga P20, P50, P100, P500 ug P1,000 bills.
Ang matag box may sulod nga 50,000 ka mga bank notes.
Pasabot ni Guinigundo, ang matag denomenasyon adunay lima ka milyon ka bills nga ibutang sa sirkulasyon dili lamang sa National Capital Region (NCR) apan apil na usab sa Luzon, Visayas ug Mindanao.
Matud pa nga ang P200 bills may duha ka milyong bills lamang ang gipagawas tungod kay giingong ubos ang demand niini.
Gipagawas na ang mga bag-ong salaping papel sa mga bangko sa NCR ug mosunod na usab sa mga umaabot nga adlaw sa mga probinsiya.
Gi-klaro usab sa BSP nga walay kabag-ohan sa disenyo sa mga salapi ug security features gawas lamang sa pirma ni Presidente Duterte. (ecb/PIA7-Bohol)
by admin | Dec 21, 2016 | Edukasyon Updates, Major Events, Malakanyang Updates, National News
MANILA, December 21 (PIA)–Gitataw sa Malakanyang nga tuition o matrikula lang ang libre sa mga state universities ug state colleges sa sunod tuig.
Matud pa ni Presidential Spokesman Ernesto Abella, may pagabayran pa gihapong miscellaneous fees ang mga estudiyante sa ilang pag-enrol sa mga tunghaang pampubliko.
Pasabot pa ni Abella, ang kapin P8.3 bilyon nga alokasyon o dugang sa budget sa Commission on Higher Education (CHED) alang lamang sa matrikula.
Giingong ipatuman ang libreng tuition sa mga state universities and colleges (SUCs) sa tibuok nasod sa school year 2017.
“The appropriation will cover the tuition of over 1.4 million students of 114 SUCs in the country and students will, however, still have to pay miscellaneous and other fees,” matud pa ni Abella. (ecb/PIA7-Bohol)
by admin | Dec 20, 2016 | Headlines, Major Events, Malakanyang Updates, National News
MANILA, December 20 (PIA)—Gihupay sa Malakanyang ang kahadlok sa mga Pilipino sa mga nahitabong extrajudicial killings o summary execution kalabot sa anti-drug war ni PresidenteRodrigo Duterte.
Reaksiyon kini sa Malakanyang sa resulta sa Social Weather Stations (SWS) survey karong katapusang kwarter diin 78% sa mga Pinoy ang giingong nahadlok sa ilang seguridad taliwala sa extrajudicial killings sa nasod.
Matud pa ni Presidential Communications Office (PCO) Kalihim Martin Andanar, gi-ila sa Malakanyangang “concern” sa katawhang Pilipino kalabot sa ilang kahilwasan sa gihingosgang kampanya batok sa ilegal nga droga.
Dugang pa sa Kalihim, ang anti-illegal drug campaign sa gobyerno wala naka-sentro sa mga inosenteng katawhan ug dili usab polisiya sa estado ang pagpahigayon sa extrajudicial killings tungod kay supak man kini sa balaod.
Gitataw ni Andanar nga ang mga napatay nga kriminal nga nalambigit sa ilegal nga droga hinimo man sa mga “common criminal” ug gipasangil lamang sa mga operatiba sa gobyerno.
Apan giseguro sa Kalihim nga patubagon sagobyerno ang mga polis nga nakalapas sa operational procedure batok sa mga illegal drug suspects.
Gitumbok pa ni Andanar nga sa susamang survey sa SWS, napadayon ni Presidente Duterte ang taas nga pagsalig sapubliko sa iyang anti-illegal drugs campaign human makakuha og 85% nga satisfaction rating.
Tungod niini, nagpasalamat ang Malakanyang sa padayon nga pagsalig nga gihatag sa publiko kang Presidente Duterte.
Pasalig pa ni Andanar, siguradohon sa administrasyon nga respetuhon ang balaod ug ang tawhanong katungod sa matag usa. (ecb/PIA7-Bohol)
